3-نۆۋەتلىك ئاسىيا-ياۋروپا يىپەك يولى كىيىم-كېچەك بايرىمى 2-سېنتەبىر ئۈرۈمچى دېخۇي خەلقئارا كىيىم شەھەرچىسىدە باشلاندى .

بۇ قېتىمقى كىيىم-كېچەك بايرىمى تۆت كۈن ئۆتكۈزۈلىدىغان بولۇپ ، بايرام مەزگىلىدە 2014-يىللىق جۇڭگو كىيىم كۆرگەزمىسى ، جۇڭگو ئاسىيا-ياۋروپا كۆرگەزمىسى توقۇلما كىيىم-كېچەكلەر كەسپى كۆرگەزمىسى ، 2014-يىللىق ياۋروپا -ئاسىيا مودا كىيىم ھەپتىلىكى ، 3-نۆۋەتلىك شىنجاڭ خانىم-قىزلار ماھارەت كۆرسىتىش مۇسابىقىسى ھەمدە مەھسۇلاتلىرى كۆرگەزمىسى ، 2-نۆۋەتلىك شىنجاڭدىكى 10 داڭلىق مىللىي كىيىم-كېچەك كارخانىلىرىنى باھالاش ۋە تونۇشتۇرۇش پائالىيىتى ئۆتكۈزۈلىدۇ .

ياۋروپا -ئاسىيا يىپەك يولى كىيىم-كېچەك بايرىمى جۇڭگو ئاسىيا-ياۋروپا كۆرگەزمىسىنىڭ مۇھىم تەركىبى قىسمى بولۇپ ، 4-نۆۋەتلىك جۇڭگو ئاسىيا-ياۋروپا كۆرگەزمىسىنىڭ ئاساسلىق مەيدانى بولغان — شىنجاڭ خەلقئارا كۆرگەزمە مەركىزىگە مەخسۇس ‹‹ توقۇلما كىيىم-كېچەكلەر كۆرگەزمە سارىيى ›› تەسىس قىلىندى .

كىيىم-كېچەك بايرىمىدىكى مۇھىم پائالىيەتنىڭ بىرى بولغان 2014-يىللىق ئاسىيا-ياۋروپا مودا كىيىم ھەپتىلىكى 2-سېنتەبىردىن 5-سېنتەبىرگىچە دېخۇي خەلقئارا كىيىم شەھەرچىسى كۆرگەزمە مەركىزىدە ئېلىپ بېرىلىدىغان بولۇپ ، جەمئىي 19 مەيدان كىيىم-كېچەك كۆرگەزمىسى ئۆتكۈزۈلىدۇ .