ئېنگلاند دۆلەت كوماندىسىنىڭ ئەزاسى جېرراد 21- ئىيۇل بايانات ئېلان قىلىپ، دۆلەت كوماندىسىدىن چېكىنگەنلىكىنى جاكارلىدى. ئۇ مۇنداق دېدى: «مېنىڭ ئېنگلاند كوماندىسىغا ۋاكالىتەن مۇسابىقە ئويناۋاتقىنىمغا 14 يىل بولدى، بۇ 14 يىلدا ئېنگلاند كوماندىسى بىلەن بىللە 2000-، 2004- ۋە 2012- يىللىق ياۋروپا پۇتبول لەۋھە تالىشىش مۇسابىقىسىگە؛ 2006-، 2010- ۋە 2014- يىللىق دۇنيا لوڭقىسى پۇتبول مۇسابىقىسىگە قاتناشتىم. ھازىر يېشىممۇ 34 كە بېرىپ قالدى، شۇڭا ياشلارغا ئورۇن بېرىش ئۈچۈن، دۆلەت كوماندىسىدىن چېكىنىپ پۈتۈن كۈچۈمنى ‹لېۋىرپول› كوماندىسىغا قارىتىشنى قارار قىلدىم».
جېرراد 2000- يىلى ئېنگلاند كوماندىسى 0:2 نەتىجە بىلەن ئۇكرائىنا كوماندىسىنى ئۇتقان مۇسابىقىدە تۇنجى قېتىم ئېنگلاند كوماندىسىغا ۋاكالىتەن مۇسابىقىگە چۈشكەنىدى، كوستارىكا كوماندىسى بىلەن بولغان بۇ يىللىق دۇنيا لوڭقىسى پۇتبول مۇسابىقىسى ئۇنىڭ ئېنگلاند كوماندىسىغا ۋاكالىتەن ئوينىغان ئاخىرقى مەيدان مۇسابىقىسى بولۇپ قالدى. بۇ 14 يىلدا ئۇ ئېنگلاند كوماندىسىغا ۋاكالىتەن 114 مەيدان مۇسابىقە ئويناپ، خىلتون (125 مەيدان) ۋە بېكھام (115 مەيدان) دىن كېيىن 3- ئورۇندا تۇردى.
جېرراد ئېنگلاند كوماندىسىدىن چېكىنگەندىن كېيىن، كىم كوماندا باشلىقى بولىدۇ؟ دېگەن مەسىلىگە ئېنگلاند كوماندىسىنىڭ باش مەشقاۋۇلى تېخى ئىپادە بىلدۈرمىگەن بولسىمۇ، بىراق ھەرقايسى ئاخبارات ۋاسىتىلىرى بۇ ھەقتە ئوخشىمىغان پەرەزلەرنى ئوتتۇرىغا قويدى. جېرراد بۇ ھەقتە مۇنداق دېدى: «مېنىڭچە، رۇنى ئەڭ باب كېلىشى مۇمكىن، ئۇنىڭ كوماندىنى غەلىبىگە ئېرىشتۈرۈش ئارزۇسى كۈچلۈك، يەنە پەقەت رۇنىلا كوماندا ئەزالىرىغا ئۈلگە بولالايدۇ».