مەمۇرلار دىققەت! يېقىندا سىچۈەن، ئىچكى موڭغۇل، جىلىن قاتارلىق كۆپلىگەن جايلار ئادەم كۈچى بايلىقى ۋە ئىجتىمائىي كاپالەت خىزمىتى يىغىنى ئېچىپ، بۇ يىل ئورگان، كەسپىي ئورۇنلارنىڭ ئاساسىي مۇئاش ئۆلچىمىنى تەڭشەشنى ئېنىق ئوتتۇرىغا قويدى.

بۇ يىل كۆپلىگەن ئۆلكىلەردىكى ئورگان، كەسپىي ئورۇنلارنىڭ مۇئاشى تەڭشىلىدۇ.

        مۇخبىر يېقىندا كۆپلىگەن جايلارنىڭ ئادەم كۈچى بايلىقى ۋە ئىجتىمائىي كاپالەت تارماقلىرىنىڭ يىغىن ئېچىپ، بۇ يىل ئورگان، كەسپىي ئورۇنلارنىڭ ئاساسىي مۇئاش ئۆلچىمىنى تەڭشەشنى ئېنىق ئوتتۇرىغا قويغانلىقىغا دىققەت قىلدى. 19-يانۋار، سىچۈەن ئۆلكىسى پۈتۈن ئۆلكە بويىچە ئادەم كۈچى بايلىقى ۋە ئىجتىمائىي كاپالەت خىزمىتى يىغىنى ئاچتى. يىغىندا بۇ يىل ئورگان، كەسپىي ئورۇنلارنىڭ ئاساسىي مۇئاش ئۆلچىمىنى تەڭشەش ئېنىق بېكىتىلدى. بۇ پارتىيە مەركىزى كومىتېتى، گۇۋۇيۈەننىڭ يېقىندا ئېلان قىلغان ھەر ئىككى يىلدا بىر قېتىم ئاساسىي مۇئاش ئۆلچىمىنى تەڭشەش توغرىسىدىكى قارارىنى ئەمەلىيلەشتۈرۈشتىكى تۇنجى قېتىملىق تەڭشەش ئىكەنلىكى، ئورگان، كەسپىي ئورۇنلارنىڭ مۇئاش تۈزۈمىنى مۇكەممەللەشتۈرۈش، مۇئاشنى نورمال تەڭشەشنى ئىشقا ئاشۇرۇشتا مۇھىم ئەھمىيەتكە ئىگە ئىكەنلىكى كۆرسىتىلدى.

       شۇ كۈنى ئېچىلغان ئىچكى موڭغۇل ئاپتونوم رايونى ئادەم كۈچى بايلىقى ۋە ئىجتىمائىي كاپالەت خىزمىتى يىغىنىدىمۇ، دۆلەتنىڭ تەلىپىگە ئاساسەن بۇ يىل ئورگان، كەسپىي ئورۇنلارنىڭ ئاساسىي مۇئاش ئۆلچىمى تەڭشىلىدىغانلىقى، بۇ قېتىمقى تەڭشەشنىڭ ئاساسىي مۇئاش ئۆلچىمىنى نورمال تەڭشەش تۈزۈمى تۇرغۇزۇلغاندىن بۇيانقى تۇنجى قېتىملىق تەڭشەش ئىكەنلىكى، ھەرقايسى جاي، ھەرقايسى تارماقلارنىڭ مۇئاش كىرىم تەقسىماتى تۈزۈمىنىڭ ئىجرا قىلىنىشىنى تەكشۈرۈپ ئېنىقلاپ، بايقالغان مەسىلىلەرنى قەتئىي ھەل قىلىش كېرەكلىكى ئېنىق ئوتتۇرىغا قويۇلدى.

       بۇنىڭدىن ئىلگىرى يەنى 2015-يىلى 31-دېكابىر، جىلىن ئۆلكىسىنىڭ ئادەم كۈچى بايلىقى ۋە ئىجتىمائىي كاپالەت خىزمىتى تېلېۋىزىيەلىك يىغىنىدا، بۇ يىل ئورگان، كەسپىي ئورۇنلارنىڭ تەقسىمات تۈزۈمى مۇكەممەللەشتۈرۈلىدىغانلىقى، دۆلەتنىڭ ئورۇنلاشتۇرىشىغا ئاساسەن چەت، جاپالىق جايلار ياردەم پۇلىنى ئۆستۈرۈش مېخانىزىمىنى مۇكەممەللەشتۈرۈش، رايون قوشۇمچە ياردەم پۇلى تۈزۈمىنى يولغا قويۇشنى مۇكەممەللەشتۈرۈش، دۆلەت ئىلكىدىكى دوختۇرخانىلارنىڭ مۇئاش تۈزۈمىنى تەتقىق قىلىپ مۇكەمەللەشتۈرۈش، ئورگان، كەسپىي ئورۇنلارنىڭ ئاساسىي مۇئاش ئۆلچىمىنى تەڭشەش، پېنسىيەگە چىققان خادىملارنىڭ تەمىنات ئۆلچىمىنى ئۆستۈرۈش، خەلق ساقچىلىرىنىڭ مۇئاش تەمىناتىنى تەڭشەش سىياسىتىنى ئەمەلىيلەشتۈرۈش، سوتچى، تەپتىشلەرنىڭ مۇئاش تۈزۈمى ئىسلاھات سىناق نوقتا خىزمىتىنى قانات يايدۇرۇش قاتارلىقلار ئاشكارىلانغان. بۇنىڭدىن باشقا جياڭسۇ ئۆلكىسى بۇ يىل «ئورگان، كەسپىي ئورۇنلارنىڭ مۇئاش كىرىم تەقسىماتى تۈزۈمى»نى ئوتتۇرىغا قويدى، بېيجىڭ شەھىرى بۇ يىل «ئورگان، كەسپىي ئورۇنلارنىڭ مۇئاش تۈزۈمى ئىسلاھاتىنى مۇقىم ئىلگىرى سۈرۈش»نى ئوتتۇرىغا قويدى، شەنشى ئۆلكىسىمۇ بۇ يىل «ئورگان، كەسپىي ئورۇنلارنىڭ مۇئاش تۈزۈمى ئىسلاھاتىنى ئىلگىرى سۈرۈش»نى ئوتتۇرىغا قويدى.

ھەر ئىككى يىلدا بىر قېتىم ئاساسىي مۇئاش تەڭشىلىدۇ

بۇلتۇر 14-يانۋار، «گۇۋۇيۈەننىڭ ئورگان، كەسپىي ئورۇن خىزمەتچىلىرىنىڭ ياشانغاندا كۈتۈنۈش سۇغۇرتىسى تۈزۈمى ئىسلاھاتى توغرىسىدىكى قارارى» ئېلان قىلىنىپ، 2014-يىلى 1-ئۆكتەبىردىن باشلاپ يولغا قويۇلدى. 40 مىليونغا يېقىن ئورگان، كەسپىي ئورۇن خىزمەتچىسى ئاساسىي ياشانغاندا كۈتۈنۈش سۇغۇرتىسىنى تاپشۇرۇشقا باشلىدى، شۇنىڭ بىلەن بىر ۋاقىتتا مۇئاشىمۇ تەڭشەلدى. 2015-يىلى ئىيۇلنىڭ ئاخىرىغىچە، ئورگان، كەسپىي ئورۇنلارنىڭ ئاساسىي مۇئاش ئۆلچىمىنى نەقلەشتۈرۈش خىزمىتى پۈتۈنلەي تاماملاندى. بۇ قېتىمقى مۇئاش تەڭشەشتە مۇئاش قۇرۇلمىسى ئەلالاشتۇرۇلۇپ، قىسمەن قېلىپلاشقان ياردەم پۇلى ياكى ئۈنۈم مۇئاشى ئاساسىي مۇئاش ئىچىگە كىرگۈزۈلۈپ، ئاساسىي مۇئاشنىڭ ئىگىلىگەن سالمىقى يۇقىرى كۆتۈرۈلدى. شۇنىڭ بىلەن بىر ۋاقىتتا مۇھىم نۇقتا ئاساسىي قاتلامغا يۈزلەندۈرۈلۈپ، بارلىق خىزمەتچىلەرنىڭ مۇئاشىنىڭ ئۆسۈشىگە كاپالەتلىك قىلىندى. مەملىكەتنىڭ ئوتتۇرىچە سەۋىيەسى بويىچە ھېساپلىغاندا، ھەر بىر ئادەمنىڭ ھەر ئايلىقى ئوتتۇرىچە 300 يۈەن ئەتراپىدا ئۆستى.

كۆرسىتىپ ئۆتۈشكە تېگىشلىكى شۇكى، بۇلتۇر ئادەم كۈچى بايلىقى ۋە ئىجتىمائىي كاپالەت مىنىستىرلىقىنىڭ ئالاقىدار مەسئۇلى ئورگان، كەسپىي ئورۇنلارنىڭ مۇئاشىنى تەڭشەش توغرىسىدا مۇخبىرلارنىڭ سۇئالىغا جاۋاپ بەرگەندە، بۇ قېتىمقى مۇئاش تەڭشەش خىزمىتىنىڭ، ئاساسىي مۇئاش ئۆلچىمىنى نورمال تەڭشەش مېخانىزىمى تۇرغۇزۇشنى يەنىمۇ ئىلگىرلىگەن ھالدا ئايدىڭلاشتۇرۇپ بېرىدىغانلىقىنى، بۇندىن كېيىن ھەر ئىككى يىلدا بىر قېتىم ئاساسىي مۇئاش ئۆلچىمى تەڭشىلىدىغانلىقىنى كۆرسەتكەن. قانداق تەڭشەش توغرىسىدا، ئادەم كۈچى بايلىقى ۋە ئىجتىمائىي كاپالەت مىنىستىرلىقى مۇئاشنى تەكشۈرۈپ سېلىشتۇرۇش نەتىجىسىگە ئاساسەن، خەلق ئىگىلىكى تەرەققىياتى، مالىيە ئەھۋالى ۋە مال باھاسىنىڭ ئۆزگىرىشش ئەھۋالى قاتارلىق ئامىللار ئۇنىۋېرسال ئويلىشىلىپ، تەڭشەش دەرىجىسى بېكىتىلىپ، ئاساسىي مۇئاشنىڭ مۇئاشتا ئىگىلىگەن نىسبىتىنىڭ قەدەممۇ-قەدەم يۇقىرى كۆتۈرۈلىدىغانلىقىنى بىلدۈردى.