ئاپتونوم رايوننىڭ 10 – قارارلىق ئىسلام دىنى ۋەتەنپەرۋەر دىنىي زاتلارنى تەربىيەلەش كۇرسىنىڭ ئاخىرلىشىش مۇراسىمى شۇنداقلا 2015 – يىللىق تەربىيەلەش خىزمىتىنى خۇلاسىلەش يىغىنى 25 – دېكابىر چۈشتىن بۇرۇن ئۈرۈمچىدە ئۆتكۈزۈلدى. بۇ يىل ئاپتونوم رايون ئون قارار تەربىيەلەش كۇرسى ئېچىپ، 2500 كىشىنى تەربىيەلىدى، بىر قارار ياش، ئوتتۇرا ياش تايانچ ۋەتەنپەرۋەر دىنىي زاتلارنى تەربىيەلەش كۇرسى ئېچىپ، 50 كىشىنى تەربىيەلىدى. ھەر قايسى ۋىلايەت، ئوبلاست، شەھەرلەر 297 قارار تەربىيەلەش كۇرسى ئېچىپ، 40 مىڭ(قېتىم)دىن ئارتۇق دىنىي زاتنى تەربىيەلىدى.    ئاپتونوم رايونلۇق پارتكوم دائىمىي كومىتېتىنىڭ ئەزاسى شەۋكەت ئىمىن خۇلاسىلەش يىغىنىدا مۇنداق دېدى: ۋەتەنپەرۋەر دىنىي زاتلار ۋەتەننى، خەلقنى سۆيۈشتەك ئېسىل ئەنئەنىنى جارى قىلدۇرۇپ، زوراۋانلىققا قارشى تۇرۇش، قانۇن ئىدارە قىلىش، تەرتىپكە ئەھمىيەت بېرىشتە چىڭ تۇرۇپ، دىنغا ئېتىقاد قىلىدىغان ئاممىنى مىللىي بۆلگۈنچىلىك، دىن ئەسەبىيلىكى ۋە زوراۋانلىق، تېررورلۇققا قارشى تۇرۇشقا پائال يېتەكلەپ، مىللەتلەر ئىتتىپاقلىقى، دىن ئىناقلىقى، ئىجتىمائىي مۇقىملىق ۋە ۋەتەننىڭ بىرلىكىنى قەتئىي تەۋرەنمەي قوغداپ، پارتىيە ۋە ھۆكۈمەتنىڭ خىزمىتىنى قوللاشتا رولىنى جارى قىلدۇردى.

      يىغىندا مۇنداق تەكىتلەندى: ۋەتەنپەرۋەر دىنىي زاتلار تېخىمۇ ئوچۇق پوزىتسىيە بىلەن ئۆگىنىپ، ئىسلام دىنى ئەقىدىسىدىكى زوراۋانلىققا قارشى تۇرۇش، تىنچلىق، ئىتتىپاقلىق، مېھرىبانلىقنى تەشەببۇس قىلىش، ۋەتەننى، دىننى سۆيۈش ئىدىيەسىنى دىن ئۆگىنىش، ۋەز سۆزلەش، تەپسىر قىلىش جەريانىغا سىڭدۈرۈپ، دىنغا ئېتىقاد قىلىدىغان ئاممىنى ئاڭلىق، ئوچۇق پوزىتسىيە بىلەن ئىلغارلىق، مەدەنىيلىك نەتىجىلىرىنى ئۆگىنىشكە پائال يېتەكلەپ، ئىتتىپاق ئۆتۈپ ئۆزئارا ياردەم بېرىش، كەڭ قورساق، ئەپۇچان بولۇپ ئورتاق ئىلگىرىلەشتەك ياخشى ئىجتىمائىي كەيپىيات ۋە كىشلىك مۇناسىۋەتنى شەكىللەندۈرۈشى كېرەك. ‹‹بەشنى تونۇش›› ئۈلگىلىرىدىن بولۇپ، دىنغا ئېتىقاد قىلىدىغان ئاممىنى ئۇلۇغ ۋەتەننى، جۇڭخۇا مىللىتىنى، جۇڭخۇا مەدەنىيىتىنى، جۇڭگو كومپارتىيەسىنى ۋە جۇڭگوچە سوتسىيالىزمنى تونۇشنى ئۈزلۈكسىز كۈچەيتىشكە يېتەكلەپ، شىنجاڭنىڭ ئىجتىمائىي مۇقىملىقى ۋە ئەبەدىي ئەمىنلىكى ئۈچۈن تۆھپە قوشۇشى كېرەك. ۋەتەنپەرۋەر دىنىي زاتلار مىللەتلەر ئىتتىپاقلىقىنى قوغداش، ئەسەبىيلىكنى تۈگىتىش، ۋەتەننىڭ بىرلىكىنى قوغداش، زوراۋانلىق، تېررورلۇققا قارشى تۇرۇشتا ئاكتىپ رولىنى جارى قىلدۇرۇشى كېرەك. ھەق – ناھەقنى پەرقلەندۈرۈش ئىقتىدارىنى ئاڭلىق ئۆستۈرۈپ، پارتىيەنىڭ دىن سىياسىتىنى توغرا ئىگىلەپ ۋە پائال تەشۋىق قىلىپ، ‹‹بەشتە ياخشى دىنىي پائالىيەت سورۇنى›› بەرپا قىلىش ۋە ‹‹بەشتە ياخشى دىنى زات››لاردىن بولۇش پائالىيىتىنى پائال يولغا قويۇپ، ئەمەلىي ھەرىكىتى بىلەن پارتىيە ۋە ھۆكۈمەتنىڭ ئىشەنچىسىنى، دىنغا ئېتىقاد قىلىدىغان ئاممىنىڭ ھۆرمىتىنى قولغا كەلتۈرۈشى كېرەك