ئادەتتە ئىناۋەتلىك كارتىنىڭ ئىشلىتىلىش ۋاقتى ئۈچ يىلدىن بەش يىلغىچە بولۇپ، كارتا يۈزىدە ئەسكەرتىلگەن بولىدۇ، ئىشلىتىلىش قەرەلى توشقاندىن كېيىن قايتا ئىشلەتكىلى بولمايدۇ. ئۇنداقتا ئىناۋەتلىك كارتىنىڭ ئىشلىتىلىش قەرەلى توشسا قانداق قىلىش كېرەك؟

   كارتا ئىگىسى ئالدى بىلەن ئىناۋەتلىك كارتىغا ئېھتىياجى بار – يوقلۇقىنى ئويلىشىپ ئاندىن قارار چىقىرىشى كېرەك. ئەگەر ئىناۋەتلىك كارتىغا داۋاملىق ئېھتىياجلىق بولسا بانكا بىلەن ئالاقىلىشىپ، بۇ كارتا توڭلىتىلىۋېتىلمىگەنلا بولسا يېڭىدىن بېجىرسە بېرىدۇ، يېڭى كارتىنىڭ كارتا نومۇرى، ئىقتىدارى، ئىناۋەت سوممىسى قاتارلىقلار بۇرۇنقى كارتا بىلەن ئوخشاش بولۇپ ئىشلىتىلىش قەرەلىدىلا ئۆزگىرىش بولىدۇ. ئەگەر كارتا ئىگىسى كارتىنى قايتا ئىشلەتمەيدىغان بولسا بۇ كارتىنى بىكار قىلدۇرۇۋەتسە بولىدۇ. دىققەت قىلىشقا تېگىشلىكى شۇكى، بەزى كىشىلەر ئىناۋەتلىك كارتىنىڭ ئىشلىتىلىش قەرەلى توشقاندىن كېيىن ئاتايىن بانكا بىلەن ئالاقىلىشىپ بىكار قىلدۇرۇشنى ئارتۇقچە، دەپ قارايدۇ، ئەمەلىيەتتە بۇنداق قىلىش خەتەرگە يول قويغانلىق بولىدۇ. چۈنكى ئىناۋەتلىك كارتا ئىشلىتىلمىگەن ھالەتتىمۇ كارتىنىڭ يىللىق ھەققى يەنىلا ئېلىنىدىغان بولۇپ، ئاستا – ئاستا بۇ ئىناۋەتلىك كارتىدا قەرز جۇغلىنىپ، كارتىنىڭ ئىگىسىگە ناچار ئىناۋەت خاتىرىلىنىپ قېلىشى مۇمكىن. ئۇنىڭ ئۈستىگە كارتىنى بىكار قىلىش ئارقىلىق، قانۇنسىز ئۇنسۇرلارنىڭ كارتىدىن پايدىلىنىپ كارتا ئىگىسىگە زۆرۈر بولمىغان ئىقتىسادىي زىيان سېلىشىنىڭ ئالدىنى ئالغىلى بولىدۇ.

   بانكىلارمۇ كارتا ئىگىسىنىڭ ئىناۋەتلىك كارتىنى ئىشلىتىش ئەھۋالىغا ھەر ۋاقىت دىققەت قىلىپ تۇرىدۇ ھەم مۇشۇ ئاساستا قەرەللىك ھالدا كارتىنىڭ ئىناۋەت سوممىسىنى تەڭشەيدۇ. ئەگەر كارتىنىڭ ئىشلىتىلىش قېتىم سانى ئاز بولسا ئىناۋەت سوممىسى تۆۋەنلىتىلىشى مۇمكىن، شۇڭا كارتا ئىگىسى كارتىنى ئالماشتۇرغان ۋاقىتتا ئۆزىنىڭ ئىناۋەت سوممىسىنىڭ ئۆزگىرىش ئەھۋالىغا دىققەت قىلىش كېرەك. كارتىنىڭ ئىناۋەت سوممىسىنى يۇقىرىلىتىشنى ئارزۇ قىلىدىغان كارتا ئىگىلىرى يېڭى كارتىنى ئاچقۇزغاندىن كېيىن، بانكىغا ئىناۋەت سوممىسىنى يۇقىرىلىتىپ بېرىشنى ئىلتىماس قىلسا بولىدۇ.