ئىز تورى-爱智网

　　  جۇڭگو ئۇيغۇرچە رادىيو تورى 9-ئۆكتەبىر بېيجىڭ خەۋىرى: جۇڭگو ھۆكۈمەت تورى 8-ئۆكتەبىر ئېلان قىلغان «دۆلەت ئىشلىرى مەھكىمىسىنىڭ قەشقەر، قورغاس ئىقتىسادىي تەرەققىيات رايونى قۇرۇشنى قوللاش ھەققىدىكى بىر قانچە پىكرى»دە مۇنداق دېيىلىدۇ: ئېلىمىز مالىيە تولۇقلىمىسى ۋە باجدا ئېتىبار بېرىش قاتارلىق ئون چوڭ تەدبىر قوللىنىپ، قەشقەر، قورغاس ئىقتىسادىي تەرەققىيات رايونلىرىنى سىياسەت بىلەن قوللاشنى كۈچەيتىپ، بۇ ئىككى ئىقتىسادىي تەرەققىيات رايونىنى قۇرۇشنى ئېلىمىزنىڭ غەربكە ئېچىۋېتىشتىكى مۇھىم كۆزنىكى ۋە شىنجاڭنىڭ ھالقىما تەرەققىياتىنى ئىلگىرى سۈرىدىغان يېڭى ئىقتىسادنى ئاشۇرۇش نۇقتىسىغا ئايلاندۇرىدۇ. بۇ ئون چوڭ يۆلەش سىياسىتىنى مۇنۇلارنى ئۆز ئىچىگە ئالىدۇ: 2011-يىلىدىن 2015-يىلىغىچە، مەركەز مالىيەسى ئىقتىسادىي تەرەققىيات رايونى قۇرۇشقا ھەر يىلى بەلگىلىك ساندا تولۇقلىما بېرىش؛ ئىقتىسادىي تەرەققىيات رايونى ئىچىدە شەرتكە ئۇيغۇن كېلىدىغان ئىشلەپچىقىرىش كارخانىلىرىنىڭ مۇقىم مۈلۈككە مەبلەغ سېلىشىنى مەركەز مالىيەسى مەبلەغ بىلەن قوللاش؛ شەرتكە ئۇيغۇن كېلىدىغان كارخانىلارنىڭ ماشىنا، ئۈسكۈنە سېتىۋالىدىغان مۇقىم مەبلىغى ۋە قەرزىنى يەرلىك مالىيەلەر ياردەم ئۆسۈم بىلەن قوللاش.