مۇھەممەد كامال خۇشخۇي

پىچىرلاپ يىغلايدۇ تاڭلار سۈبھىدە

(شائىر ئوسمانجان ساۋۇتقا مەرسىيە)

چېچىلدى گۈل توزۇپ،گۈلزار باغرى قان،

بۇلبۇللار ناۋاسىز،غۇرۇرى پايخان.

پىچىرلاپ يىغلايدۇ تاڭلار سۈبھىدە،

تەخىرسىز سۆكۈلۈپ ھەسرەتتە مىڭ جان.

مىسراغا يەم بولدى ئوسمانجان ساۋۇت،

شېئىرنىڭ كۆڭلىگە تاشلاپ سۇئال-ئان.

ئالمىدەك يۈرەكتە ئالەمچە پىغان،

تەسەللى بېرىشكە بارمۇ مېھرىبان؟!

ئۇ سۆيگەن ۋەتەنگە كۆمۈلدى تېنى،

توزانلار باش قويدى ئاڭا يانمۇ-يان.

مۇسىبەت نۇتقىنى سۆزلەيدۇ گۈللەر،

تەبىرنى نەۋايى ئەيلىگەي بايان.

تاڭ بىلەن سۆزلىشىش سائېتى كەلدى،

ئەي خۇشخۇي،قەلبىڭ ئاچ،جابدۇن-تەييارلان!

2013-يىلى 10-ئاينىڭ 19-كۈنى(شەنبە)،گۇما-كۆكئوتاغ.