مۇقام ئوغلى

(مۇۋەششەھ)

مۇھەممەد كامال خۇشخۇي

مۇڭۇڭ كۆكلەتتى جانىمنى مۇقام ئوغلى،

كۈيۈڭ قايناتتى قانىمنى مۇقام ئوغلى.

«ئەجەم»بەھرىدە گۈل قاتى ئېچىلغاي مىڭ،

«ئوشاق» پارلاتسا شانىمنى مۇقام ئوغلى.

مەگەر ئۇرساڭ سەھەر پەيتى «ئىراق»قا تار،

شەپەققە كۆمدى يانىمنى مۇقام ئوغلى.

ئەجەپ گۈلگۈن چېچەكلەرنىڭ لېۋىدە ناز،

«ناۋا»تولدۇرسا كانىمنى مۇقام ئوغلى.

تىلەكتە تەمبۇرۇڭ ئەل-يۇرت بىلەن سىرداش،

«بايات»سۆزلەيدۇ ئاھىمنى مۇقام ئوغلى.

شاھانە«چەببىيات»،«راك»قا كۆڭۈل يەمدۇر،

چېلىپ كەلسەڭ«سىگاھ»ىمنى مۇقام ئوغلى.

ئاتايى ئاڭلىغان«ئۆزھال»دا نە بىر ھال؟

بايان ئەيلە نىدايىمنى مۇقام ئوغلى.

كامالەت بەھرىگە چۆمسە مۇغەننىيلەر،

چالار ئول«چارىگاھ»ىمنى مۇقام ئوغلى.

ئېلىپ تەمبۇرنى ناخۇلغا قىلىپ يەمچۈك،

چالە-چال!«پەنجىگاھ»ىمنى مۇقام ئوغلى.

رىزادۇر ئەل يەنە خۇشخۇي،«مۇشاۋرەك»تە

ياراتساڭ چىن باھارىمنى مۇقام ئوغلى.