بىر مەيخورغا تىز سىزما

(ساتىرا)

مۇھەممەد كامال خۇشخۇي

قۇيغانتىڭ بىر رومكا مەينى ھەييامغا،

رومكاڭنى قويۇپ قۇي دېدى،-ئۇ جامغا.

بولدۇق مەست،بولدى بەس،ئىچمەيلى دېسەڭ،

ئۇ سېنى بىر تېپىپ چاپلىدى تامغا.

قانمايسەن كوزىغا چىلىشىپ ياتساڭ،

مۈلكىڭنى مەيگىلا تىگىشسەڭ- ساتساڭ.

بۇ ساڭا جان بىلەن كىرگەن خۇيمىكىن،

ئەل ھەيران مەي دېسە ئۆزۈڭنى ئاتساڭ.

تاشلىدىڭ نەچچەرەت رومكىنى چېقىپ،

پۇشايمان سۈيىگە چۆكۈپ گاھ ئېقىپ.

مەيخانا چۈشۈڭدىن چىقماي ئاخىرى،

قالدى ئاھ، كۆڭلۈڭگە يەنە مەي يېقىپ.

مەي ئىچسەڭ ئاتاڭنىڭ كەيپى قاچىدۇ،

بىراقكى شادلىقىڭ فونتان چاچىدۇ.

مەستلىكتىن دەلدەڭشىپ بارساڭ مەلىگە،

جانانىڭ ئىشىكنى ئاستا ئاچىدۇ.

مەي ئىچىپ ھەر كۈنى ھاراقكەش بولدۇڭ،

ئۆي نەدە؟ ئەۋرەزدە ماراقكەش بولدۇڭ.

رەنجىسە ئەل- ئاۋام سېنىڭدىن توۋا،

ئىرەڭسىز ياندۇردۇڭ غەلدە-غەش،بولدۇڭ.

مەي ئىچىپ ئۆتكۈزدۈڭ ئۆمۈرنى تەمسىز،

ئاتاڭنىڭ بىر كۈنى ئۆتمىدى غەمسىز.

ئەقىلنى ئۇچلىساڭ بىلەتتىڭ شۇئان،

ھاياتىڭ تۈگمېنى تاراقلار يەمسىز.