ئاياللار ئىستىلاسى 

(داستان) 

سەۋىردىن ھىنىپىدىن

         1

يالغان سۆزدىن ساقلا ئىلاھىم ،
يالغانچىلىق ئەشەددىي گۇناھ .
راستچىل ئادەم ئۇلۇغدۇر- ئۇلۇغ ،
ئىككى ئالەم تەڭرى باشپاناھ .
كۆرگنىم راسىت قاباھەتلىك چۈش ،
چىرمىۋالدى خىيال تاڭغىچە .
باياۋاندا يالغۇز قالغاندەك ،
كاللام قۇرۇق خېلى ۋاققىچە .
بىر چاغدىكى بەختلىك ئەجداد ،
ئەۋلاتلىرى ياتار بىخۇد –مەس.
ساپراس بولغان لەكمىڭ ئاياللار ،
قەدەملىرى جەسۇر زەپەردەس .
چاپچىپ تۇرار ئۇچقۇر ئاتلىرى ،
تاشقىن كەبى كېلەر باستۇرۇپ ،
قۇرقۇپ كەتكەن بىغەم ئەرلىرى ،
تىزلىنپتۇ يەرگە باش ئۇرۇپ .
نۇر چاقنايدۇ قېلىچلىرىدىن ،
شاۋقۇن سېلىپ تۇۋلايدۇ ئالغا !
قاڭقىپ چۈشەر باشسىز گەۋدىلەر ،
قان چاچرىتىپ زېمىن باغرىغا .
تەييارلىقسىز ، ياراغسىز ئەرلەر ،
مەغلۇپ بولۇپ تەزدى ماكاندىن .
ئاقساق–چولاق، يۆلەنچۈكسىزلەر ،
ۋاقىتسىزلا كېتەر دۇنيادىن .
ھەر تەرەپتىن كېلەر قان ھىدى ،
كىيدى زېمىن شەپەق تونىنى .
يوپۇرماقتەك تىتىرگەن ئەرلەر ،
گۇناھكاردەك سېزىپ ئۆزىنى .
2
قېچىپ يۈرۈپ ھالسىرىغان ئەر ،
كۆرۈپ قالدى مەغرۇر ئايالنى .
.تىتىرەپ غال–غال جەسەتلەر ئارا  ،
خىيال قۇشى كەزدى ئۆتمۈشنى .
توۋا !دېدى چىشلىدى ياقا ،
نومۇس، خورلۇق ئۆرتەپ دىلىنى .
ھەم زارلاندى تەقدىر– قىسمەتتىن ،
يالغان ئۆلۈپ يۇمدى كۆزىنى .
شۇمۇ مېنىڭ تۇنجى مۇلايىم –
ئىتائەتمەن ئوبدان خوتۇنۇم  ؟
ۋايسىمىغان نامرات تۇرمۇشتىن ،
قانائەتچان ئىشچان خوتۇنۇم .
نەدىن كەلگەن بۇنداق جاسارەت ،
ۋۇجۇدىدىن ئۇرغۇپ كۈچ –قۇۋۋەت .
مۇھەببەتلىك بۇلاق كۆزلەردىن ،
ئەمدى ياغار مۆلدۈردەك نەپرەت .
بولدى بەربات ئەرنىڭ خىيالى ،
كىشنىگەندە قېشىدا تۇلپار .
تۇرۇپ كېتىپ دىۋەڭ ئادەمدەك ،
ئېغىز ئاچتى ئۆتۈنۈپ زار –زار.
–جېنىم خۇتۇن كېچىپ قېنىمدىن ،
بەرگىن پۇرسەت ئۆتۈنەي سەندىن .
تۇۋا قىلدىم قىلغانلىرىمغا ،
دۇرۇس ئادەم بولاي قايتىدىن .
– ئىپلاس! دېدى ئايال غەزەپتىن ،
ئويلىمىغان بولغىيتىڭ مېنى  .
جەڭگاھلاردا ئۇچرىتارمەن دەپ ،
ئەمدى ئامان قويماسمەن سېنى .
يۇلقىنىدۇ تۇلپار كىشنىشىپ ،
كەلدى ئايال قېلىچنى تەڭلەپ .
ۋۇجۇدىنى سوغۇق تەر بېسىپ ،
يۇكۇندى  ئەر غال–غال تىتىرەپ .
– رەنجىمىگىن ، كەچۈرگىن جېنىم ،
مەن ۋاپاسىز ئازغۇن ئېرىڭنى .
تاپا قىلغان ساڭا بىر زامان ،
كېسىپ تاشلاپ مۇشۇ تىلىمنى .
رەھىم قىلغىن مۇشۇ بىر نۆۋەت ،
بالىلارنىڭ قىلىپ يۈزىنى .
ئۆمۇر بويى بولاي مەن سادىق ،
قەدىرلەپ چىن سۆيگۈ كۈيىنى .
ئەقىدەڭگە تۇزكورلۇق قىلىپ ،
پېتىپ كېتىپ ئىشرەت قوينىغا ،
ئەسلى سىرتماق سالغان ئىكەنمەن ،
ھېچ تۇيماستىن ئۆزۈم بوينۈمغا .
ئەسقاتمىدى گۈزەل رەنالار ،
شۇندىن بېرى كۈنۈم خارلىقتا .
ئىزدەپ كەلگەن ئەسلى سىلەرنى ،
كۆپ قىينالدىم ۋىجدان سوراقتا .
تۈفى! دېدى غادىيىپ ئايال ،
ۋاپاسىزلىق قىلغان ئېرىگە .
تىۋىلغا ساپ نەشتەر قامچىسى .
ئوت چاچرىتىپ تەگدى يۈزىگە .
–ئەلەم بىلەن ئوتتى كۈنلىرىم ،
كۈلپەت سالدىڭ، قىلمىدىڭ ۋاپا .
ئۆلۈم سېنىڭ ئەپتىڭگە قاراش ،
يالغۇزلۇقتا تارتساممۇ جاپا .
چىقار ئەمەس ئاچچىقى پەقەت ،
ئېلىپ قاچار ئەرلەر ئۆزىنى .
بىراق ئەردىن جاق تۇيغان ئايال ،
قوغلاپ چىپىپ يىقىتار ئەرنى .
تىمتاسلىققا چۆمدى كائىنات ،
تىزىغىچە كېچەر ئاتلار قان .
تۈزەشتۈرۈپ چۇۋۇق چېچىنى ،
ئېغىر تىنىپ قويىدۇ جۇۋان .
3
تۇتقۇن بولۇپ ھايات قالغانلار ،
پەرمانبەردار ھەمما بۇيرۇققا .
ساقلاپ قالماق بولۇپ جېنىنى ،
ئېسىلىدۇ نازۇك پاچاققا .
باغرى قاتقان دەرتمەن ئاياللار ،
پەرۋا قىلماس زارلىنىشلارغا .
ئەينى چاغدا تارتقان ئازابى ،
مەدەت بولۇپ ئاجىز جىسمىغا .
دار ياساپتۇ ئون مىڭ  كىشىلىك ،
ئىككىلەنمەي ئاسارمىش مىڭدىن .
دۈۋىلەنگەن تاغدەك جەسەتلەر ،
تاز قاقىرلار چوقار كۆزىدىن .
ئاڭلىنىدۇ گۇگۇمدا ئەنسىز ،
ھۇۋقۇشلارنىڭ خۇنۈك ئاۋازى .
تۈن نىسبىدە قەدەھ كۆتەرگەن ،
ئاياللارنىڭ غەلبە ساداسى .
مەسىت ئاياللار يالىڭاچلىنىپ ،
بەس–بەس بىلەن چۈشكەن ئۇسسۇلغا .
نومۇس قىلىپ ئاسماندىكى ئاي ،
مۆكۈنۈپتۇ بولۈت قۇينىغا  .
سۆرەپ كېلەر خالغان ئايال ،
باغلاقتىكى تۇتقۇن ئەرلەرنى .
ياساپ قويۇپ خۇددى ئايالدەك ،
مازاق قىلىپ كۈلەر ئۇلارنى .
ئوخشاپ قالغان بۇرۇتلۇق ئەرلەر ،
زاۋالدىكى بىر توپ ئەرۋاھقا .
غۇلاچ تاشلاپ ئوينايدۇ ئۇسسۇل ،
دەسسۋالغان كەبى قۇقاسقا .
يالاتقۇزۇپ بارماقلىرىنى ،
چوقان سېلىپ كۈلەر قاقاھلاپ .
پۇشايماندا، خورلۇقتا ئەرلەر ،
ئۆرتىنىدۇ كۆزىنى ياشلاپ .

4
ئۇشتۇمتۇتلا ھاۋا بۇزۇلۇپ ،
قۇيۇلۇپتۇ يامغۇر چىلەكلەپ .
ھازىداردەك پۈتكۇل كائىنات ،
كۈللى جانلىق كىتىپتۇ شۇكلەپ .
كەپتۇ بىردىن غايىپتىن ئاۋاز،
قۇلاقلارنى پاڭ قىلىپ شۇئان .
دېڭىزلارمۇ كەپتۇ لەرزىگە ،
تىتىرەپتۇ دىر-دىر يەر– جاھان .
دۈم چۈشۈپتۇ چوڭ– كىچىك بارى ،
ئاچقۇزماپتۇ كۆزلەرنى بوران .
يەر يۈزىنى قاپلاپ ۋەھىمە ،
مۇمكىن ئەمەس سۈرمەككە زۇۋان .
كۆرۈنۈپتۇ كۆك بۆرە ھەيۋەت ،
ئۇپۇق تامان تۇتاشقان بېشى .
ئۆتكۈر كۆزى چاقناپ چاقماقتەك ،
ئاقار ئىكەن مۆلدۈردەك يېشى .
شۇنداق نەرە تارتىپتۇ بۆرە ،
ھوۋلىشىدىن تىتىرەپ يەر– جاھان ،
ئوت كېتىپتۇ غەزەپ سۈرىدىن ،
دوزاخ كەبى بولۇپ بۇ ماكان .
قىيا–چىيا ،نالە– پەرياتلار ،
تىلاۋەتلەر ئاپتۇ پەلەكنى .
غەم- غۇسسىدىن خالي ئىنسانلار،
يوقىتىپتۇ ئىسى– يادىنى .
تەڭرى ئاتا قىلغان ئەرلىككە ،
ئاسىي بولۇپ، يەكسان قىلغان كىم ؟
مەپتۇن بولۇپ ئىشرەت ، نەپسىگە ،
نابۇت قىلغان گۈلزارىنى كىم ؟
تۇنجى بولۇپ يارالغان ئەركەك ،
پەرۋىشكارى ئەسلى زېمىننىڭ !
ئۇنتۇغاچقا ئۇچبۇ بۇرچىنى ،
تولۇپ تاشتى قەھرى تەڭرىنىڭ .
تۇرۇپ كەتتىم چۆچۈپ ئويغىنپ ،
توۋا !دېدىم بۇ نە ئالەمەت ؟
بولدىمۇ يا زامان ئاخىرى ،
بەردىمۇ يا تەڭرىم بېشارەت .
ئۇخلاپ قالغان بۇغما يىلاندەك ،
كەچلىك چايدىن قايتقان ئايالىم  .
ئۇنتۇپ ياتار دۇنيانى تامام ،
ئۇرغۇپ تاشتى پىكرۇ پىغانىم .
قاتار چايدىن باشلانغان يارا ،
ئېغىز ئالدى شەھەر– قىشلاقتىن .
قەلبى كېسەل ناشۈكۈر ئايال  ،
ئەيمەنمەيدۇ گۇناھ ئارتىشتىن .
ئۆتەڭلەردە جىلۋىگەر قىزلار ،
كۆز قىسىدۇ تىنماي باققىچە
.ئىرادىسىز قۇترىغان كارۋان ،
كۆڭۈل خۇشى قىلار تاڭغىچە .
چۇل–چۇل بۇلغان جانان چىنىلەر ،
ئايلىنىپتۇ ساپال تاۋاققا .
ئۆيدىن بىزار بولغان ئاياللار ،
كۈنۈۋاپتۇ ئەمدى قاۋاققا .
يېتىرقىماس ئەمدى ئاياللار ،
تاپتىن چىققان ئەرنىڭ كۆزىدىن.
تەشنالىقتا كۈتمەيدۇ ئەمدى ،
يىرگىنىدۇ ھەر بىر سۆزىدىن .
قورقۇپ قالماس ئۆي بۇزۇشتىنمۇ ،
ئارمان قىلار ئەركىن ياشاشنى .
ھۇزۇرلىنىپ ھۇرداقخانىدا ،
ئاچچىق يۇتەرئەسلەپ ئۆتمۈشنى .
زورايماقتا ئايالنىڭ كۈچى ،
چۈشكۈنلەشكەن ئەرلەر ئېلىدە ،
تۇمان باسقان مەۋھۇم كېلەچەك .
ئاشكارىدۇ ئاقىل كۆزىدە .
تۈزۈپ بۇلدى بەلكىم ئاياللار ،
بىز بىلمىگەن يېڭى پىلاننى .
مەزموت قورغان، پاسىل تام سوقۇپ ،
روھى تۇتقۇن قىلار ئەرلەرنى .
خورىماقتا بىزدىكى ئەرلىك ،
بوزلىماقتا تۇرمۇش رېتىمى .
مۇزلىماقتا ئۇتلۇق يۈرەكلەر ،
ئۆرۈلمەكتە ساداقەت تېمى .
تەكچىلەردە يىرتىلغان ئېلان ،
زەئىپ ئەرنىڭ قۈۋۋەت دورىسى .
تېتىمايدۇ ئۆيدىكى تائام ،
ئۇچۇر قىلغان كوچىدىكىسى .
مەسلىكىدىن يېشىلمىگەن ئەر ،
بەزمىگاھتا ئۇنتار ھەممىنى .
تۆشەكتىكى ۋاپادار خوتۇن ،
زارىقىشتا كۆتمەكتە ئۇنى .
ئاسمان كۆز ياش قىلار ئەركەك دەپ ،
زېمىن تەۋرەپ چىللار ئەركەك دەپ .
دېڭىز دولقۇن ياسار ئەركەك دەپ ،
شائىر داستان يازار ئەركەك دەپ .
يەر شارنىڭ خلۋەت چېتىدە ،
ئوخشار ھايات قايناق قازانغا ،
مۇشەققەتتە ئۈمىدۋار ئىنسان ،
ئېرشىدۇ يېڭى ھاياتقا .
پارچىلانسا ئائىلە قەۋىم ،
ۋارىسلىرى ئۆتەر تەمتىرەپ .
قەيسەر يۈرەك تاغدەك ئاتىغا ،
تەلپۈنىدۇ تاڭلاردىن ئىزلەپ .
كۆيۈك تاغدەك كۆيۈك يۈرىكىم ،
سىقىلىدۇ جاراھەتسىزلا .
ھەقىقەتنى كۈيلىگەن شائىر ،
كېتەر شۇنداق يۈرىكىدىنلا…

2009–يىل نۇيابىر