ھېيىت نەزمىسى
تەۋە تۈر: تەرمە گۈللەر | يوللانغان ۋاقتى: 2014/07/28 | ئىنكاس: 0 پارچە | كۆرۈلۈشى: 874 قېتىم

ھېيىت نەزمىسى

ئاپتورى:نۇرلان

بەركەت تىلەپ ئەھلى ئالەمگە،
مېھىر چېچىپ كۇللى خانەمگە.
سۇلغۇنلارنى چۆمدۈرۈپ رەڭگە،
يېتىپ كەلدى ئۇلۇغ روزا ھېيىت.

قۇتلۇق ئاينىڭ شاپائىتى ئۇ،
رامىزاننىڭ ساخاۋىتى ئۇ.
كۆڭۈللەرنىڭ ھارارىتى ئۇ،
دەل-دەرەخلەر توقۇيدۇ بېيىت.!

بالىلاردا ئالەمچە شادلىق،
ساما سالار بولۇپ قاناتلىق.
ھېيىت ئاقچىسى ئاجايىپ تاتلىق،
كۈندە نېسىپ بولماس بۇ بەخىت.

ئانلارنىڭ چېھرى قۇياشتەك،
داستىخانلار دىلغا تۇتاشتەك.
ھويلا-ساراي، گىلەم ئوتقاشتەك،
پاكىزلىقى ئىمانغا تەخىت.

ئاتىلارنىڭ چىرايىدا نۇر،
دوپپىسىدا ئاقىدۇ غۇرۇر.
سەنمۇ كۈلگىن، ساڭا ئايەمدۇر،
ئاپئاق ساقال ئەزىز مويسىپىت.

ئۇرۇق-تۇققان، قېرىنداشلار جەم،
دىللار دىلدىن سۇ ئىچەر بۇ دەم.
قىيداشلارغا كىرەر يېڭى تەم،
ئاداۋەتكە قويۇلۇپ چېكىت.

كوچا-كوينىڭ جامائىتى سەل،
ئەجدادلاردىن ئەنئەنىدۇر دەل.
قىرائەتلەر قەلىبلەرگە ھەل،
يادلىنىدۇ ياتقانلار-مېيىت.

سالام بەرگەن كۆكرەكلەردە زەر،
ئىلىك ئالغان يۈرەكلەر گۆھەر.
كىمنىڭ ھېيتى ئۇلۇغ بۇ قەدەر؟
تەرىپىنى كۈيلە، ناخشا ئېيىت.

ئالەم پاتماي قىنى-قىنىغا،
سۆيگۈ چاچار ھەر بىر يېىنغا.
ھېيىت گۈزەللىك ئىسلام دىنىغا،
تېچلىق ئامەت، ئىناقسىزلىق زىت.

بۈگۈن بايرام، بىزگە خاس بولسۇن،
ھېيىتلىرىمىز ئۇنتۇلماس بولسۇن.
ۋەتەن، ئەل-يۇرت گۈللەرگە تولسۇن،
ئېتىقادلىق بولسۇن قىز-يىگىت.

قەدرىگە يەت دوستلىرىم، زوقلان،
ھېيىتنى ئۇلۇغ بىلىدۇ نۇرلان.
ھېيىت بىلەن تەڭ ياشىغىن «روھلان»،
ھېيىت بېرىدۇ ھەممىمىزگە دىت.

huxhuy:
پىقىر مۇھەممەد كامال خۇشخۇي ساقال مەيدىگە چۈشكەندە بلوگگىرلىققا ھەۋەس قىلىپ قالغان بوۋايمەن.تور خاتىرەمدىكى بىرەر تېما سىزگە ياقسا ئەجرىمدىن سۆيۈنىمەن.ئەمما ئىككى كەلىمە باھا يېزىپ قويسىڭىز ئالەم مېنىڭ بولىدۇ.

  • ئالدىنقى يازما:
  • كېيىنكى يازما:

  • 

    
    يېڭى يازمىلار
    تەۋسىيە (1)
    ئىستاتىستىكا
    دوستانە ئۇلىنىشلار
    تەۋسىيە (2)