سودىگەرنىڭ ئۈچ قىزى

(ئۆزبېك خەلق چۆچىكى)

بىر سودىگەرنىڭ ئۈچ قىزى بار ئىكەن.چوڭ قىزىنىڭ ئىسمى مەلىكە،ئىككىنچىسىنىڭ ئىسمى زەينەپ، كەنجىسىنىڭ ئىسمى ھەنىپە ئىكەن. ئۇلار بىر-بىرىدىن گۈزەل قىزلار ئىكەن.لېكىن ھەممىدىن ئەدەبلىكراقى ھەنىپە ئىكەن.بىر كۈنى سودىگەر ئۇزاق سەپەرگە ماڭىدىغان بولۇپتۇ.شۇنىڭ بىلەن قىزلىرىنى يېنىغا چاقىرىپ: -«قىزلىرىم،-دەپتۇ ئۇ،-مەن ئۇزاق بىر سەپەرگە مېڭىش ئالدىدا تۇرىمەن. مەن ئۇ سەپەردىن تەخمىنەن 140 كېچە- كۈندۈزدە كېلىشىم مۇمكىن.شۇڭا سىلەر مەن كەلگىچە بىر-بىرىڭلار بىلەن ئۇرۇشماي ئەپ ئۆتۈڭلار،مەن قايىتقىنىمدا ئىنشا ئاللاھ سىلەرگە سوۋغا-سالام ئالغاچ كېلىمەن.قېنى كۆڭلۈڭلاردىكىنى ئېيتىڭلار، سىلەرگە نېمە سوۋغا ئالغاچ كېلەي!»،-دەپ سوراپتۇ.

دادىسىنىڭ سۆزىنى ئاڭلىغان قىزلاردىن مەلىكە:

-دادىجان ماڭا قىممەت باھالىق ئالتۇن زىبۇ-زىننەتلەر ئالغاچ كېلىڭ،-دەپتۇ.

ئىككىنچى قىزى زەينەپ:

-دادىجان ماڭا چىرايلىق كىيىملەر ئالغاچ كېلىڭ،-دەپ تاپىلاپتۇ.بىراق كەنجى قىزى ھەنىپە بولسا،دادىسىدىن ياخشىراق كىتاپ ئالغاچ كېلىشنى ئۆتۈنۈپتۇ.

شۇنىڭ بىلەن سودىگەر قىزلىرىنىڭ تاپشۇرمىسىنى قەلبىگە پۈكۈپ،قىزلار بىلەن خوشلىشىپ سەپەرگە ئاتلىنىپتۇ.

ئارىدىن كۈنلەر ئۆتۈپتۇ،ئايلار ئۆتۈپتۇ،دېگەندەك 140 كېچە-كۈندۈزدىن كېيىن سودىگەر ئۆيىگە قايتىپ كەپتۇ.دادىسىنىڭ ئۆيى تەرەپكە كېلىۋاتقانلىقىنى يىراقتىن كۆرۈپ قالغان مەلىكە يۈگۈرگىنىچە ئۇنىڭ ئالدىغا بېرىپ، دادىسىدىن ھاردۇق سوراشنىڭ ئورنىغا ئۆزى تاپىلىغان سوۋغىلارنى سۈرۈشتۈرۈشكە باشلاپتۇ:

-دادىجان،ماڭا ۋەدە قىلغان سوۋغىلارنى ئېلىپ كەلدىڭىزمۇ؟

دادا ئۇنىڭغا ئاتاپ ئەكەلگەن سوۋغىلارنى تاپشۇرۇپ بېرىپ ئۆيىگە كىرىشىگە ئىككىنچى قىزى زەينەپ يۈگۈرەپ كېلىپ سوۋغىلارنى سۈرۈشتۈرۈپتۇ.بىراق،كەنجى قىزى ھەنىپە بولسا دادىسىنى كۆرۈشى بىلەن:«ئەسسالامۇ ئەلەيكۇم دادىجان سەپەردىن ھېرىپ-چارچىماي،خاتىرجەم كەلدىڭىزمۇ؟»،- دەپ ئەھۋال سوراپتۇ ۋە دادىسىنىڭ قولىنى يۇيۇشى ئۈچۈن سۇ تەييارلاپ قولىغا سۇ بېرىپ،خۇددى ئەزىز مېھمان كەبى ئاستىغا كۆرپە سېلىپ،ئالدىغا داستىخان يېيىپ نازۇ-نىمەتلەرنى كەلتۈرۈپتۇ. سودىگەر بولسا ھەنىپەنىڭ كۆرسەتكەن مەرھەمىتىدىن سۆيۈنۈپ ئولتۇرۇپ غىزالىنىپتۇ ۋە غىزادىن كېيىن ھەنىپەدىن سوراپتۇ:

-قىزىم،نېمە ئۈچۈن مەن ساڭا ئەھدە قىلغان سوۋغىلارنى سۈرۈشتۈرمەيسەن؟

ھەنىپە دادىسىنىڭ بۇ سۇئالىغا قارىتا جاۋاپ بېرىپ دەپتۇ:

-دادىجان سىز ھاردۇقىڭىزنى ئېلىۋىلىڭ،سوۋغىلارنى بولسا كېيىن بەرسىڭىزمۇ بولىدۇ.

ھەنىپەنىڭ دادىسىغا قىلغان بۇنداق خۇش مۇئامىلىسىنى كۆرۈپ تۇرغان ئاچىلىرى مەلىكە بىلەن زەينەپ ناھايىتىمۇ خىجىلچىلىق ئىچىدە قاپتۇ.

مۇھەممەد كامال خۇشخۇي ئۇيغۇرچىلاشتۇردى.