يوللانغان ۋاقتى : 2009-05-15 10:58:37    كۆرۈلۈش سانى : 67  

[align=center]ھەيۋەت ئېگىز بىر تاغنىڭ،   ئۈستى قېلىن قار ئىكەن.   ئاشۇ تاغنىڭ باغرىدا،   چەكسىز ئورمان بار ئىكەن.   ئورمانلىقنى ماكان قىپ،   بىر توپ مايمۇن ياشاركەن.   ئويناپ - كۈلۈپ ئۆزىنى -   شاختىن شاخقا ئاتاركەن.   چىمچىقلىتىپ كۆزىنى،   ھەر تەرەپكە قاراركەن.   قارسىلدىتىپ چىشىدا،   ياۋا ياڭاق چاقاركەن.   بىر مايمۇنچاق بار ئىكەن،   شۇ مايمۇنلار ئىچىدە.   ئۆگىنىشكە ھۈنەرنى،   ھەۋەس قىپتۇ كۆڭلىدە.   ئانىسىغا دەپتۇ ئۇ:   - ئاق يول تىلە ماڭا سەن.   ھەر خىل ھۈنەر ئۆگىنەي،   زېھىن قويۇپ راسا مەن.   ئانا مايمۇن ئۇنىڭغا:   - بالام ئامان بول، - دەپتۇ.   - نىيىتىڭگە بارىكاللا،   ھۈنەر ئۆگەن، تول، - دەپتۇ.   شۇنداق قىلىپ مايمۇنچاق،   ئاتلىنىپتۇ سەپەرگە.   دەپتۇ: - ھەرگىز يانماسمەن،   دۇچ كەلسەممۇ خەتەرگە.   مېڭىپتۇ، ئۇ مېڭىپتۇ،   قارا تەرگە چۆمۈپتۇ.   بىر يېزىنىڭ چېتىدە،   ئۆكۈز باينى كۆرۈپتۇ.   ئۆكۈز سۆرەپ ساپاننى،   يەر ئاغدۇرۇپ يۈرگۈدەك.   دەپتۇ مايمۇن كۆڭلىدە:   بۇ ھۈنەرمۇ بولغۇدەك.   - ئۆكۈز ئاكا، - دەپتۇ ئۇ، -   بۇ ھۈنەرنى ئۆگىتىڭ.   زېھىن قوياي مەنمۇ ھەم،   سىرلىرىنى كۆرسىتىڭ.   ئۆكۈز ئۇستاز بولۇشقا،   ماقۇل بولۇپ مۆرەپتۇ.   مايمۇن كېلىپ ساپاننى،   بىردەم راسا سۆرەپتۇ.   ئۆتە - ئۆتمەي بىر سائەت،   مايمۇن بەكمۇ ھېرىپتۇ.   - قىيىن ئىكەن، بۇ ئىش، - دەپ،   ئېتىزلىقتىن قېچىپتۇ.   ماڭا - ماڭا مايمۇنچاق،   كەپتۇ كۆلنىڭ بويىغا.   تۇرۇپ قاپتۇ بىر ھازا،   كۆزى چۈشۈپ پاقىغا.   پاقا سوزۇپ تىلىنى،   باش كۆتۈرۈپ تۇرغۇدەك.   چاققانلىق قىپ دەممۇ دەم،   پاشىلارنى يۇتقۇدەك.   مايمۇن دەپتۇ: - پاقىجان،   نېمە قىلىپ تۇرىسەن؟   پاقا دەپتۇ: - پاشىنى،   گالغا شۇنداق ئۇرىمەن.   پاشا دېگەن زىيانداش،   قاننى تويماي شورايدۇ.   ئۇندىن ھەر خىل كېسەللەر،   جاندارلارغا تارايدۇ.   ئاڭلاپ بۇنى مايمۇنچاق،   خۇشاللىققا تولۇپتۇ.   پاشا تۇتۇش ئېپىنى،   ئۆگەنمەكچى بولۇپتۇ.   ھەر قانچە قىپ مايمۇنچاق،   تۇتالماپتۇ پاشىنى.   كۆل بويىدىن كېتىپتۇ،   تەنھا قويۇپ پاقىنى...   شۇ يوسۇندا مايمۇنچاق،   كۆپ جايلارغا بېرىپتۇ.   ئۆگىنەلمەي ھېچ ئىشنى،   ئورمانلىققا يېنىپتۇ.   قارشى ئاپتۇ ئانىسى،   >ئالتۇن بالام كەلدى< دەپ.   >ئۆز ۋاقتىنى، زېھنىنى،   ئۆگىنىشكە بەردى< دەپ.   لېكىن شۇدەم مايمۇنچاق،   توختىماي ئاھ، ئۇرغۇدەك.   ھەسرەت چېكىپ، بېشىنى -   ساڭگىلىتىپ تۇرغۇدەك.   ئانا كۆرۈپ بۇ ھالنى،   ھەيران بوپتۇ، چۆچۈپتۇ.   - نېمە بولدۇڭ، بالام؟ - دەپ،   كۆز يېشىنى تۆكۈپتۇ.   بار ئەھۋالنى بىر - بىرلەپ،   بايان قىپتۇ مايمۇنچاق.   دەپتۇ شۇدەم ئانىسى:   - ئەقلىڭ يوقمۇ، ئەي ئەخمەق؟!   بىر ھۈنەرنى ئۆگەنمەك،   ئاسان ئەمەس، بىل، بالام.   ھەۋەس - ئىشنىڭ بېشىدۇر،   يەنە غەيرەت قىل، بالام.   چىدام بىلەن ئىلگىرلەپ،   ئاشساڭ مۈشكۈل قىرىنى؛   ئىگىلەرسەن شۇندىلا،   ھۈنەر ھېكمەت سىرىنى.   بۇ سۆزلەرنى ئاڭلىغاچ،   ھەقىقەتنى بىلىپتۇ.   ئۆز ئىشىغا مايمۇنچاق،   قاتتىق پۇشايمان قىلىپتۇ.   باغلاپ بەلنى قايتىدىن،   مايمۇن يولغا چىقىپتۇ.   كۆڭۈل قويغاچ ھۈنەرگە،   كامالەتكە يېتىپتۇ. [/align]