بالىلارنىڭ چوڭى سودىغا ماھىر بولىدىكەن
ئامېرىكىدىكى بىر تەكشۈرۈش ئاپپاراتى يېقىندا 1000 شىركەتنىڭ خوجايىنى ئۈستىدە تەكشۈرۈش ئېلىپ بارغاندىن كېيىن، ئۇلارنىڭ ئارىسىدىكى 430 خوجايىننىڭ ئۆيىدە بالىلارنىڭ چوڭى ئىكەنلىكىنى بايقىغان. ئۇلار ئاخىرقى يەكۈن سۈپىتىدە مۇنداق دېدى: ئۆيىدە بالىلارنىڭ چوڭى مەيلى ئوغۇل ياكى قىز بولسۇن، ھەممىسى سودا ئىشلىرىغا ماھىر بولغاچقا، كېيىنكى چاغلاردا سودا ساھەسىنىڭ سەر خىللىرىدىن بولۇپ قالىدىكەن.
تۇغۇلۇش تەرتىپى ھەققىدە خېلى ئۇزاق تەتقىقات ئېلىپ بارغان نيۇيورك ئۇنىۋېرسىتېتىنىڭ پىسخولوگىيە پېروفېسسورى بېندات بۇ ھادىسىگە مۇنداق چۈشەنچە بەردى: ئائىلىدە بالىلارنىڭ چوڭى ھېسابلىنىدىغان بالىلار ھەقىقەتەن سودا ساھەسىدە مول نەتىجىگە ئىگە بولالايدۇ، چۈنكى بالىلارنىڭ چوڭى كىچىكىدىن تارتىپلا ئىنى ۋە سىڭىللىرىنىڭ ئارىسىدا ئالاھىدە ھوقۇققا ئىگە بولغان بولىدۇ، ئۇلارنىڭ ماسلاشتۇرۇش ئىقتىدارى كۈچلۈك بولغاچقا، پۇل ۋە ھوقۇق تۇتۇشقا بەك ماھىر كېلىدۇ . بېندات يەنە مۇنداق دېدى: ئۇنىڭدىن باشقا، بالىلارنىڭ چوڭىدا كىچىكىدىنلا ئىنى ۋە سىڭىللىرىغا ئۈلگە بولۇش قارىشى كۈچلۈك بولىدۇ، قىيىنچىلىققا دۇچ كەلسە ئاسانلىقچە تىز پۈكمەيدۇ. شۇڭا ئۇلار سودا ساھەسىدىكى يىقىلىپ– قوپۇپ ئىلگىرىلەش پرىنسىپىغا ماس كېلىدۇ. خىزمەتتە بولسا ئۇلار كۈچىنىڭ بارىچە ۋەزىپىسىنىڭ ھۆددىسىدىن چىقىشقا تىرىشىدۇ، خاتالىققا قارشىلىق كۆرسىتىش خاراكتېرى كۈچلۈك بولىدۇ. شۇڭا نىسبەتەن خېيىم–خەتەرگە تەۋەككۈل قىلىشقا ئامراق كېلىدۇ، ئەركىنلىككە تەلپۈنىدۇ، ئىجادچانلىق روھىغا باي بولىدۇ، شىركەتنىڭ تەرەققىياتىغا پايدىلىق تەكلىپلەرنى بېرەلەيدۇ.
|
