ئوغلۇم ، دۇنيادىكى ئەڭ قىممەتلىك بايلىق —ھاياتلىق . دۇنيادا ھاياتلىقتىنمۇ ئۈستۈن تۇرىدىغان شادلىق ، شېرىنلىك بولمايدۇ . چۈنكى ھاياتلىق ئىنسانغا پەقەت بىرلا قېتىم نېسىپ بولىدۇ. ئەگەر ھاياتلىق ئادەمگە ئىككى قېتىم نېسىپ بولسا ئىدى ، ئۇنىڭ ئۇنچىلىك قىممىتى بولماس ئىدى. دۇنيادا يوقالغاندىن كېيىن قايتا ئەسلىگە كەلتۈرۈش ئىمكانىيىتى بولغان نەرسىلەرنىڭ نابۇت بولۇشى ئانچە ئەپسۇسلىنارلىق ئىش ئەمەس. لېكىن قايتا تەكرارلىنىش ، ئەسلىگە كېلىش ئىمكانىيىتى بولمىغان ھاياتلىقنى بىھۇدە زايا قىلىۋېتىش بەكمۇ ئەپسۇسلىنارلىق ئىش. شۇڭا ھاياتلىقتىن ئىبارەت بۇ بايلىقتىن ئۈنۈملۈك پايدىلىنىشنى بىلىش كېرەك ، ئۆمۈر كۆچىتىدىن ھاسىل بولغان مېۋىنىڭ باشقىلارغا بەرگەن بەھىرى ياكى كەلتۈرگەن زەھىرىگە قاراپ ، ئۇ كىشىنىڭ ھاياتلىقتىكى قىممىتىگە باھا بەرگىلى بولىدۇ .
    ئوغلۇم ، شۇنى ئېسىڭدىن چىقارمىغىنكى ، سېنىڭ دۇنياغا تۆرىلىپ ياشاشتىكى مەقسىتىڭ ۋە ئۆمۈرلۈك نىشانىڭ ھەرگىز يەپ–ئىچىش ، ئېسىل كىيىنىش ، كەيىپ – ساپا ۋە ئەيش– ئىشرەت قىلىش بىلەن ئۆمۈرنى مەنىسىز خورىتىش بولۇپ قالمىسۇن . دۇنياغا تۆرىلىپ ھېچقانداق ھاياتلىق ئىزناسى قالدۇرالمىغان ئادەمنىڭ قىلچە قىممىتى بولمايدۇ . سېنىڭ قۇرۇق ئۇستىخىنىڭ ھايات سەيناسىدا ھېچقانداق بىر قىممەتكە ئىگە ئەمەس. سەن ھاياتىنىڭنى ئۆزەڭ رازى بولغۇدەك مەنىلىك ئۆتكۈز ، زېھنىڭ ۋە قۇۋۋىتىڭنى مەنىلىك ئىشلارغا سەرپ قىل .
    بۇ ھاياتلىقتا مۇشەققەتسىز راھەت بولمايدۇ ، مۇشەققەتسىز ئېرىشكەن راھەتمۇ ھەقىقىي پاراغەت ھېسابلانمايدۇ . ھايات دېگەن شىرىلداپ ئېقىپ تۇرغان بۇلاق سۈيىدەك تىپ –تىنچ بولمايدۇ ، سەن ھاياتنى تىنىمسىز ئېقىۋاتقان قىيانلىق دەريا دەپ پەرەز قىلغىن . ھېچقانداق ئادەم بۇ دۇنياغا مۇكەممەللىك تاجىنى كىيىپ كەلگەن ئەمەس ، بەلكى تۇرمۇشنىڭ دولقۇنلۇق قايناملىرىدا پىشىپ بارا –بارا تاكاممۇللىشىپ بارىدۇ . ھاياتنىڭ مەنىسى ھايات دولقۇنلىرىنى يېرىپ ئۆتۈپ مەلۇم بىر ئىشتا كامالەتكە يېتىش ئۈچۈن كۈرەش قىلىشتا زاھىر بولىدۇ . ئازراق نەرسىنى بىلىۋېلىپ ، چەللىدە ئات چاپقۇچى بولما . شۇنى بىلگىنكى ، سەن ئۆزۈڭنى كامالەت ئىگىسى دەپ ، ئۆز – ئۆزەڭگە تەمەننا قويغان كۈندىن باشلاپ ، سەن ئۆزۈڭنى ئۆزۈڭ دەپنە قىلىش يولىغا ماڭىسەن . تىنىمسىز ئىزدىنىشنى ئۆزۈڭگە مىزان قىل ، ئۆزۈڭنى مەڭگۈ ئوقۇغۇچىمەن دەپ ھېسابلا . شۇندىلا ئۆزۈڭگە قاتتىق تەلەپ قويالايسەن ، ئۆزۈڭنى ئۆزەڭ چۈشەپ قويمايسەن . ھاياتنى مەنىسىز ۋە ئەڭ يىرگىنىچلىك ئۆتكۈزۈشنىڭ ھەرخىل يوللىرى بار بولۇپ ، بۇلار سېنى  ئېزىتقۇ يولغا باشلاپ ماڭىدىغان ئەڭ قاباھەتلىك يولدۇر. نەپىسىنىڭ بويۇنتۇرىقىغا ئەسىر بولۇپ ، پەقەت نەپسى ئۈچۈنلا ياشايدىغان مەخلۇققا ئايلىنىپ قېلىشتىن ساقلان .
  ئوغلۇم ، سېنىڭ ھاياتىڭ جەمئىيەتكە ، مىللەتكە ۋە ۋەتەنگە تەئەللۇق . سەن مەڭگۈلۈك ھاياتلىققا ئېرىشمەكچى بولساڭ خەلقنىڭ قەلبىدە مەڭگۈ يېقىلمايدىغان پىرامىدا ياسا . 

مەنبە:تەڭرىتاغ تورى