جۇڭخۇا خەلق جۇمھۇرىيىتىنىڭ ئادۋوكاتلار قانۇنى

           (1996- يىل 5 – ئاينىڭ 15 – كۈنى 8 – نۆۋەتلىك مەملىكەتلىك خەلق قۇرۇلتىيى دائىمىي كومىتېتىنىڭ 19 – يىغىنىدا ماقۇللانغان، 2001 – يىل 12 – ئاينىڭ 29 – كۈنى 9 – نۆۋەتلىك مەملىكەتلىك خەلق قۇرۇلتىيى دائىمىي كومىتېتى 25 – يىغىنىنىڭ ‹‹جۇڭخۇا خەلق جۇمھۇرىيىتىنىڭ ئادۋوكاتلار قانۇنى››غا تۈزىتىش كىرگۈزۈش توغرىسىدىكى قارار››ىغا ئاساسەن تۈزىتىلگەن، 2007 – يىل 10 – ئاينىڭ 28 – كۈنى 10 – نۆۋەتلىك مەملىكەتلىك خەلق قۇرۇلتىيى دائىمىي كومىتېتىنىڭ 30 – يىغىنىدا ئۆزگەرتىلدى)

                                                                                     جۇڭخۇا خەلق جۇمھۇرىيىتى رەئىسىنىڭ پەرمانى

                                                                                                         (76- نومۇرلۇق)

            «جۇڭخۇا خەلق جۇمھۇرىيىتىنىڭ ئادۋوكاتلار قانۇنى›› 2007 – يىل 10 – ئاينىڭ 28 – كۈنى جۇڭخۇا خەلق جۇمھۇرىيىتى 10 – نۆۋەتلىك مەملىكەتلىك خەلق قۇرۇلتىيىنىڭ 30 – يىغىنىدا ئۆزگەرتىلىپ ماقۇللاندى، ھازىر ئۆزگەرتىلگەندىن كېيىنكى ‹‹جۇڭخۇا خەلق جۇمھۇرىيىتىنىڭ ئادۋوكاتلار قانۇنى›› ئېلان قىلىندى، 2008 – يىل 6 –  ئاينىڭ 1 – كۈنىدىن باشلاپ يولغا قويۇلسۇن.

                                                                                     جۇڭخۇا خەلق جۇمھۇرىيىتىنىڭ رەئىسى خۇ جىنتاۋ

                                                                                         2007- يىل 10 – ئاينىڭ 28 – كۈنى

مۇندەرىجە

1- باب ئومۇمىي پرىنسىپ

2- باب ئادۋوكاتلىق قىلىش ئىجازىتى

3- باب ئادۋوكاتخانا

4- باب ئادۋوكاتلارنىڭ كەسپى، ھوقۇقى ۋە مەجبۇرىيىتى

5- باب ئادۋوكاتلار جەمئىيىتى

6- باب قانۇن جاۋابكارلىقى

7- باب قوشۇمچە پرىنسىپ

1- باب: ئومۇمىي پرىنسىپ

1- ماددا بۇ قانۇن ئادۋوكاتلىق تۈزۈمىنى مۇكەممەللەشتۈرۈش، ئادۋوكاتلىق ھەرىكىتىنى قېلىپلاشتۇرۇش، قانۇن بويىچە ئادۋوكاتلىق قىلىشنى كاپالەتلەندۈرۈش، ئادۋوكاتلارنىڭ سوتسىيالىستىك قانۇنچىلىق قۇرۇلۇشىدىكى رولىنى جارى قىلدۇرۇش مەقسىتىدە چىقىرىلدى.

2-ماددا بۇ قانۇندا ئېيتىلغان ئادۋوكاتلار قانۇن بويىچە ئادۋوكاتلىق گۇۋاھنامىسى ئالغان، ھاۋالە ياكى بېكىتىش بىلەن، دەۋالاشقۇچىلارغا قانۇن مۇلازىمىتى قىلىدىغان كەسىپكارلارنى كۆرسىتىدۇ.

ئادۋوكاتلار دەۋالاشقۇچىلارنىڭ قانۇنىي ھوقۇق – مەنپەئىتىنى قوغدىشى، قانۇننىڭ توغرا يولغا قويۇلۇشىنى قوغدىشى، ئىجتىمائىي ئادىللىق ۋە ھەققانىيەتنى قوغدىشى كېرەك.

3- ماددا ئادۋوكاتلىق قىلىشتا، ئاساسىي قانۇن ۋە قانۇنلارغا ئەمەل قىلىش، ئادۋوكاتلىق كەسپىي ئەخلاقى ۋە كەسىپكارلىق ئىنتىزامىغا قاتتىق رىئايە قىلىش شەرت.

ئادۋوكاتلىق قىلىشتا، پاكىتنى ئاساس، قانۇننى ئۆلچەم قىلىش شەرت.

ئادۋوكاتلىق قىلىشتا، دۆلەتنىڭ، جەمئىيەتنىڭ ۋە دەۋالاشقۇچىلارنىڭ نازارىتىنى قوبۇل قىلىش كېرەك.

ئادۋوكاتلار قانۇن بويىچە ئادۋوكاتلىق قىلغاندا قانۇن قوغدايدۇ، ھەرقانداق تەشكىلات ۋە شەخسنىڭ ئادۋوكاتلارنىڭ قانۇنىي ھوقۇق – مەنپەئىتىگە زىيان سېلىشىغا يول قويۇلمايدۇ.

4- ماددا ئەدلىيە مەمۇرىي تارمىقى مۇشۇ قانۇن بويىچە ئادۋوكاتلار، ئادۋوكاتخانىلار ۋە ئادۋوكاتلار جەمئىيىتىگە نازارەتچىلىك ھەمدە يېتەكچىلىك قىلىدۇ.

2- باب:  ئادۋوكاتلىق قىلىش ئىجازىتى

5- ماددا ئادۋوكاتلىق قىلىشنى ئىلتىماس قىلغۇچىلار تۆۋەندىكى شەرتلەرنى ھازىرلىشى كېرەك:

(1) جۇڭخۇا خەلق جۇمھۇرىيىتىنىڭ ئاساسىي قانۇنىنى ھىمايە قىلىش؛

(2) دۆلەتلىك بىر تۇتاش ئەدلىيە ئىمتىھانىدىن ئۆتكەن بولۇش؛

(3) ئادۋوكاتخانىدا بىر يىل پراكتىكا قىلغان بولۇش؛

(4) پەزىلەتلىك بولۇش.

دۆلەتلىك بىر تۇتاش ئەدلىيە ئىمتىھانى يولغا قويۇلۇشتىن بۇرۇن ئادۋوكاتلىق سالاھىيەت ئىسپاتى ئالغانلارنىڭ سالاھىيەت ئىسپاتى ئادۋوكاتلىق قىلىشنى ئىلتىماس قىلغاندا، دۆلەتلىك بىر تۇتاش ئەدلىيە ئىمتىھانى لاياقەتنامىسى بىلەن ئوخشاش كۈچكە ئىگە بولىدۇ.

6- ماددا ئادۋوكاتلىق قىلىشتا، رايون بار شەھەر دەرىجىلىك ياكى بىۋاسىتە قاراشلىق شەھەردىكى رايونلۇق خەلق ھۆكۈمىتىنىڭ ئەدلىيە مەمۇرىي تارمىقىغا ئىلتىماس قىلىش ھەمدە تۆۋەندىكى ماتېرىياللارنى تاپشۇرۇش كېرەك:

(1) دۆلەتلىك بىر تۇتاش ئەدلىيە ئىمتىھان لاياقەتنامىسى؛

(2) ئادۋوكاتلار جەمئىيىتى ئىلتىماس قىلغۇچىلارغا بەرگەن پراكتىكىدا لاياقەتلىك بولغانلىق ماتېرىيالى؛

(3) ئىلتىماس قىلغۇچىنىڭ سالاھىيەت ئىسپاتى؛

(4) ئادۋوكاتخانىنىڭ ئىلتىماس قىلغۇچىنى ئېلىشقا قوشۇلغانلىق ئىسپاتى.

قوشۇمچە ئادۋوكاتلىق قىلىشنى ئىلتىماس قىلىدىغانلار ئىشلەۋاتقان ئورنى ئۇنىڭ قوشۇمچە ئادۋوكاتلىق قىلىشىغا قوشۇلغانلىق ئىسپاتىنىمۇ تاپشۇرۇشى كېرەك.

ئىلتىماسنى قوبۇل قىلغان تارماق ئىلتىماسنى تاپشۇرۇۋالغان كۈندىن باشلاپ 20 كۈن ئىچىدە تەكشۈرۈشى ھەمدە تەكشۈرۈش پىكرى ۋە بارلىق ئىلتىماس ماتېرىيالىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقىغا يوللىشى كېرەك. ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى ماتېرىيالنى تاپشۇرۇۋالغان كۈندىن باشلاپ ئون كۈن ئىچىدە تەكشۈرۈپ، ئادۋوكاتلىق قىلىشقا قوشۇلۇش –  قوشۇلماسلىق ھەققىدە قارار چىقىرىشى كېرەك. قوشۇلسا، ئىلتىماس قىلغۇچىغا ئادۋوكاتلىق گۇۋاھنامىسى بېرىدۇ، قوشۇلمىسا، ئىلتىماس قىلغۇچىغا سەۋەبىنى يازما چۈشەندۈرىدۇ.

7- ماددا ئىلتىماس قىلغۇچىلاردىن تۆۋەندىكى ئەھۋاللارنىڭ بىرى بولغانلىرىغا ئادۋوكاتلىق گۇۋاھنامىسى بېرىلمەيدۇ:

(1) ھەق تەلەپ ھەرىكەت ئىقتىدارى يوقلار ياكى ھەق تەلەپ ھەرىكەت ئىقتىدارى چەكلەنگەنلەر؛

(2) جىنايى جازا بېرىلگەنلەر، لېكىن سەۋەنلىك بىلەن جىنايەت ئۆتكۈزگەنلەر بۇنىڭ سىرتىدا؛

(3) خىزمەتتىن ھەيدەلگەنلەر ياكى ئادۋوكاتلىق گۇۋاھنامىسى بىكار قىلىنغانلار.

8- ماددا ئالىي مەكتەپنىڭ تولۇق كۇرستىن يۇقىرى ئوقۇش تارىخىغا ئىگە بولغان، قانۇن مۇلازىمەت خادىمى كەمچىل ساھەدە كەسپىي خىزمەت قىلغىنىغا 15 يىل بولغان، ئالىي ئۇنۋان ئالغانلار ياكى شۇنىڭغا تەڭ كېلىدىغان كەسپىي سەۋىيىسى بولغان ھەمدە مۇناسىپ كەسىپتە قانۇن بىلىمى بولغان خادىملاردىن كەسپىي ئادۋوكاتلىق قىلىشنى ئىلتىماس قىلىپ گوۋۇيۈەننىڭ ئەدلىيە مەمۇرىي تارمىقىنىڭ سىنىقىدىن ئۆتكەنلىرىنىڭ ئادۋوكاتلىق قىلىشىغا رۇخسەت قىلىنىدۇ. كونكرېت چارىسىنى گوۋۇيۈەن بەلگىلەيدۇ.

9- ماددا ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى تۆۋەندىكى ئەھۋالنىڭ بىرى كۆرۈلسە، ئادۋوكاتلىق قىلىشقا رۇخسەت قىلغانلىق قارارىنى بىكار قىلىدۇ ھەمدە رۇخسەت قىلىنغان خادىمنىڭ ئادۋوكاتلىق گۇۋاھنامىسىنى رويخەتتىن ئۆچۈرىدۇ:

(1) ئىلتىماس قىلغۇچىلار ئادۋوكاتلىق گۇۋاھنامىسىنى ئالدامچىلىق، پارىخورلۇق قاتارلىق ناتوغرا ۋاسىتىلەر بىلەن ئېلىۋالغان بولسا؛

(2) مۇشۇ قانۇندا بەلگىلەنگەن شەرتكە توشمايدىغان ئىلتىماس قىلغۇچىنىڭ ئادۋوكاتلىق قىلىشىغا رۇخسەت قىلىنغان بولسا.

10- ماددا ئادۋوكاتلار بىرلا ئادۋوكاتخانىدا ئادۋوكاتلىق قىلىدۇ. ئادۋوكاتلاردىن باشقا ئادۋوكاتخانىدا ئىشلىمەكچى بولغانلىرى ئادۋوكاتلىق گۇۋاھنامىسىنى ئالماشتۇرۇشنى ئىلتىماس قىلىشى كېرەك.

ئادۋوكاتلىق قىلىش رايون چەكلىمىسىگە ئۇچرىمايدۇ.

11- ماددا مەمۇرلار قوشۇمچە ئادۋوكاتلىق قىلسا بولمايدۇ.

ئادۋوكاتلاردىن ھەر دەرىجىلىك خەلق قۇرۇلتىيى دائىمىي كومىتېتى تەركىبىدە ۋەزىپە ئۆتەۋاتقانلىرى ۋەزىپە ئۆتەۋاتقان مەزگىلدە، دەۋا ۋاكالەتچىلىكى ياكى ئاقلىغۇچىلىق قىلسا بولمايدۇ.

12- ماددا ئالىي مەكتەپلەر، پەن تەتقىقات ئاپپاراتلىرىدا قانۇنشۇناسلىق ئوقۇتۇشى، تەتقىقاتى بىلەن شۇغۇللىنىدىغانلاردىن مۇشۇ قانۇننىڭ 5 – ماددىسىدا بەلگىلەنگەن شەرتكە توشىدىغانلىرى ئىشلەۋاتقان ئورنىنىڭ قوشۇلۇشى بىلەن، مۇشۇ قانۇننىڭ 6 – ماددىسىدا بەلگىلەنگەن تەرتىپ بويىچە قوشۇمچە ئادۋوكاتلىق قىلىشنى ئىلتىماس قىلسا بولىدۇ.

13- ماددا ئادۋوكاتلىق گۇۋاھنامىسى ئالمىغانلار ئادۋوكات دېگەن نامدا قانۇن مۇلازىمىتى قىلسا بولمايدۇ؛ قانۇندا ئايرىم بەلگىلەنگەنلىرىنى ھېسابقا ئالمىغاندا، دەۋا ۋاكالەتچىلىكى ياكى ئاقلىغۇچىلىق قىلسا بولمايدۇ.

3- باب: ئادۋوكاتخانا

14- ماددا ئادۋوكاتخانا ئادۋوكاتلار ئادۋوكاتلىق قىلىدىغان ئاپپارات. ئادۋوكاتخانا قۇرۇشتا تۆۋەندىكى شەرتلەرنى ھازىرلاش كېرەك:

(1) ئۆزىنىڭ نامى، تۇرۇشلۇق ئورنى ۋە نىزامنامىسى بولۇش؛

(2) مۇشۇ قانۇندىكى بەلگىلىمىگە ئۇيغۇن كېلىدىغان ئادۋوكاتلىرى بولۇش؛

(3) قۇرغۇچىسى كەسىپ بىلەن مەلۇم مۇددەت شۇغۇللانغان ھەمدە ئۈچ  يىل ئىچىدە ئادۋوكاتلىق قىلىشنى توختىتىش جازاسى بېرىلمىگەن ئادۋوكات بولۇش؛

(4) گوۋۇيۈەننىڭ ئەدلىيە مەمۇرىي تارمىقى بەلگىلىگەن مىقدارغا يەتكەن مۈلكى بولۇش.

15- ماددا ھەمشېرىكلەر ئادۋوكاتخانىسى قۇرۇشتا، مۇشۇ قانۇننىڭ 14 – ماددىسىدا بەلگىلەنگەن شەرتلەرنى ھازىرلىغاندىن سىرت، ئۈچتىن ئارتۇق شېرىكى بولۇشى، قۇرغۇچىسى كەسىپ بىلەن شۇغۇللانغىنىغا ئۈچ يىلدىن ئاشقان ئادۋوكات بولۇشى كېرەك.

ھەمشېرىكلەر ئادۋوكاتخانىسى ئادەتتىكى ھەمشېرىك ياكى پەۋقۇلئاددە ئادەتتىكى ھەمشېرىك شەكلىدە قۇرۇلسا بولىدۇ. ھەمشېرىكلەر ئادۋوكاتخانىسىنىڭ شېرىكلىرى  شۇ ئادۋوكاتخانىنىڭ قەرز جاۋابكارلىقىنى ھەمشېرىكلىك شەكلىگە قاراپ قانۇن بويىچە ئۈستىگە ئالىدۇ.

16- ماددا شەخسىيلەر ئادۋوكاتخانىسى قۇرۇشتا، مۇشۇ قانۇننىڭ 14 – ماددىسىدا بەلگىلەنگەن شەرتنى ھازىرلىغاندىن سىرت، قۇرغۇچىسى كەسىپ بىلەن شۇغۇللانغىنىغا بەش يىلدىن ئاشقان ئادۋوكات بولۇشى كېرەك. قۇرغۇچىلار ئادۋوكاتخانىنىڭ قەرزى ئۈچۈن چەكسىز جاۋابكارلىقنى ئۈستىگە ئالىدۇ.

17- ماددا ئادۋوكاتخانا قۇرۇشنى ئىلتىماس قىلىشتا تۆۋەندىكى ماتېرىياللارنى تاپشۇرۇش كېرەك:

(1) ئىلتىماس؛

(2) ئادۋوكاتخانىنىڭ نامى، نىزامنامىسى؛

(3) ئادۋوكاتلارنىڭ ئىسىملىكى، قىسقىچە تارىخى، سالاھىيەت ئىسپاتى، ئادۋوكاتلىق گۇۋاھنامىسى؛

(4) تۇرۇشلۇق ئورنى ئىسپاتى؛

(5) مۈلۈك ئىسپاتى.

ھەمشېرىكلەر ئادۋوكاتخانا قۇرۇشتا، ھەمشېرىك كېلىشىمىنىمۇ تاپشۇرۇش كېرەك.

18- ماددا ئادۋوكاتخانا قۇرۇشتا، رايون بار شەھەر دەرىجىلىك ياكى بىۋاسىتە قاراشلىق شەھەردىكى رايونلۇق خەلق ھۆكۈمىتىنىڭ ئەدلىيە مەمۇرىي تارمىقىغا ئىلتىماس قىلىش كېرەك، ئىلتىماسنى قوبۇل قىلغان تارماق ئىلتىماسنى تاپشۇرۇۋالغان كۈندىن باشلاپ 20 كۈن ئىچىدە تەكشۈرۈشى ھەمدە تەكشۈرۈش پىكرى ۋە بارلىق ئىلتىماس ماتېرىيالىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقىغا يوللىشى كېرەك. ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى ماتېرىيالنى تاپشۇرۇۋالغان كۈندىن باشلاپ ئون كۈن ئىچىدە تەكشۈرۈپ، قۇرۇشقا رۇخسەت قىلىش –  قىلماسلىق ھەققىدە قارار چىقىرىشى كېرەك. رۇخسەت قىلغان بولسا، ئىلتىماس قىلغۇچىغا ئادۋوكاتخانىنىڭ كەسىپكارلىق گۇۋاھنامىسى بېرىشى؛ رۇخسەت قىلمىغان بولسا، ئىلتىماس قىلغۇچىغا سەۋەبىنى يازما چۈشەندۈرۈشى كېرەك.

19- ماددا قۇرۇلغىنىغا ئۈچ يىلدىن ئاشقان ھەمدە ئادۋوكاتلىق قىلىۋاتقان 20 دىن ئارتۇق ئادۋوكاتى بولغان ھەمشېرىك ئادۋوكاتخانىسى شۆبە قۇرسا بولىدۇ. شۆبە قۇرۇشتا، شۆبە قۇرىدىغان جايدىكى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى تەكشۈرۈشى كېرەك. شۆبە قۇرۇشنى ئىلتىماس قىلىش مۇشۇ قانۇننىڭ 18 – ماددىسىدا بەلگىلەنگەن تەرتىپ بويىچە بولىدۇ.

ھەمشېرىكلەر ئادۋوكاتخانىسى شۆبىسىنىڭ قەرزى ئۈچۈن جاۋابكارلىقنى ئۈستىگە ئالىدۇ.

20- ماددا دۆلەت مەبلىغى بىلەن قۇرۇلغان ئادۋوكاتخانا ئادۋوكاتلىق كەسپىنى قانۇن بويىچە ئۆز ئالدىغا قانات يايدۇرۇپ، قەرز جاۋابكارلىقىنى شۇ ئادۋوكاتخانىنىڭ بارلىق مۈلكى بىلەن ئۈستىگە ئالىدۇ.

21- ماددا ئادۋوكاتخانىلاردىن نامى، مەسئۇلى، نىزامنامىسى، ھەمشېرىك كېلىشىمى قاتارلىقلارنى ئۆزگەرتىدىغانلىرى ئەسلىي تەكشۈرگەن تارماققا تەستىقلىتىشى كېرەك.

ئادۋوكاتخانىلاردىن نامى، ھەمشېرىكىنى ئۆزگەرتىدىغانلىرى ئۆزگەرتكەن كۈندىن باشلاپ 15 كۈن ئىچىدە ئەسلىي تەكشۈرگەن تارماققا ئەنگە ئالدۇرۇشى كېرەك.

22- ماددا ئادۋوكاتخانىلاردىن تۆۋەندىكى ئەھۋالنىڭ بىرى كۆرۈلگەنلىرىنى تاقىۋېتىش كېرەك:

(1) قانۇندا بەلگىلەنگەن قۇرۇش شەرتىگە توشمايدىغان بولۇپ قېلىپ، سۈرۈك ئىچىدە ئوڭشاپمۇ شەرتنى ھازىرلىيالمىغانلار؛

(2) ئادۋوكاتخانىنىڭ كەسىپكارلىق گۇۋاھنامىسى قانۇن بويىچە بىكار قىلىنغانلار؛

(3) تارقىلىپ كېتىشنى ئۆزى قارار قىلغانلار؛

(4) قانۇن، مەمۇرىي نىزاملاردا تاقىۋېتىش بەلگىلەنگەن باشقا ئەھۋاللار.

تاقىۋېتىلگەن ئادۋوكاتخانىلارنىڭ كەسىپكارلىق گۇۋاھنامىسىنى گۇۋاھنامە بەرگەن تارماق رويخەتتىن ئۆچۈرىدۇ.

23- ماددا ئادۋوكاتخانىلار كەسىپ باشقۇرۇش، مەنپەئەت توقۇنۇشىنى تەكشۈرۈش، ھەق ۋە مالىيە باشقۇرۇش، ئەرزنى بىر تەرەپ قىلىش، يىللىق باھالاش، ئارخىپ باشقۇرۇش تۈزۈملىرىنى ئورنىتىپ ۋە مۇكەممەللەشتۈرۈپ، ئادۋوكاتلارنىڭ ئادۋوكاتلىق قىلىش جەريانىدىكى كەسىپ ئەخلاقىغا، كەسىپكارلىق ئىنتىزامىغا رىئايە قىلىش ئەھۋالىنى نازارەت قىلىشى كېرەك.

24- ماددا ئادۋوكاتخانىلار ھەر يىللىق باھالاشتىن كېيىن، رايون بار شەھەر دەرىجىلىك ياكى بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقىغا شۇ ئادۋوكاتخانىنىڭ يىللىق ئادۋوكاتلىق دوكلاتىنى ۋە ئادۋوكاتلارنى باھالاش نەتىجىسىنى تاپشۇرۇشى كېرەك.

25- ماددا ئادۋوكاتلار ئادۋوكاتلىق قىلىشتا، ئادۋوكاتخانا ھاۋالىنى بىر تۇتاش قوبۇل قىلىدۇ، ھاۋالە قىلغۇچى بىلەن يازما ھاۋالە توختامى تۇزىدۇ، دۆلەتنىڭ ئالاقىدار بەلگىلىمىسى بويىچە بىر تۇتاش ھەق ئالىدۇ ھەمدە ھېسابقا ئەينەن كىرگۈزىدۇ.

ئادۋوكاتخانىلار ۋە ئادۋوكاتلار قانۇن بويىچە باج تاپشۇرۇشى كېرەك.

26- ماددا ئادۋوكاتخانىلار ۋە ئادۋوكاتلار باشقا ئادۋوكاتخانا ۋە ئادۋوكاتلارنى كەمسىتىش ياكى تونۇشتۇرۇش ھەققى بېرىش قاتارلىق ناتوغرا ۋاسىتىلەرنى قوللىنىپ ئىش ئېلىۋالسا بولمايدۇ.

27- ماددا ئادۋوكاتخانىلار قانۇن مۇلازىمىتىدىن باشقا تىجارەت بىلەن شۇغۇللانسا بولمايدۇ.

4- باب:  ئادۋوكاتلارنىڭ كەسپى، ھوقۇقى ۋە مەجبۇرىيىتى

28- ماددا ئادۋوكاتلار تۆۋەندىكى كەسىپلەر بىلەن شۇغۇللانسا بولىدۇ:

(1) تەبىئىي شەخس، قانۇنىي ئىگە ياكى باشقا تەشكىلاتنىڭ ھاۋالىسى بىلەن، قانۇن مەسلىھەتچىسى بولۇش؛

(2) ھەق تەلەپ دېلوسى، مەمۇرىي دېلودىكى دەۋالاشقۇچىلارنىڭ ھاۋالىسى بىلەن ۋاكالەتچى بولۇپ دەۋاغا قاتنىشىش؛

(3) جىنايى ئىشلار دېلوسىدىكى جىنايەت گۇماندارىنىڭ ھاۋالىسى بىلەن، ئۇنىڭغا قانۇندىن مەسلىھەت بېرىش، ۋاكالىتەن ئەرز قىلىش، شىكايەت قىلىش، قولغا ئېلىنغان جىنايەت گۇماندارى بىر تەرەپ قىلىنغۇچە كېپىلگە بېرىشنى ئىلتىماس قىلىش، جىنايەت گۇماندارى، جاۋابكارنىڭ ھاۋالە قىلىشى ياكى خەلق سوت مەھكىمىسىنىڭ بېكىتىشى بىلەن، ئاقلىغۇچى بولۇش، بىۋاسىتە دەۋا دېلوسىدىكى بىۋاسىتە دەۋا قىلغۇچىنىڭ، ئەيىبلەنگەن دېلودىكى زىيانكەشلىككە ئۇچرىغۇچى ياكى ئۇنىڭ يېقىن تۇغقانلىرىنىڭ ھاۋالىسى بىلەن، ۋاكالەتچى بولۇپ دەۋاغا قاتنىشىش؛

(4) دەۋا دېلولىرىدا ھاۋالە بىلەن ۋاكالىتەن ئەرز قىلىش؛

(5) مۇرەسسە ۋە كېسىم پائالىيىتىگە ھاۋالە بىلەن قاتنىشىش؛

(6) دەۋاغا كىرمەيدىغان ئىشلاردا ھاۋالە بىلەن قانۇن مۇلازىمىتى قىلىش؛

(7) قانۇنغا دائىر سوئاللارغا جاۋاب بېرىش، دەۋا ھۆججىتى ۋە قانۇن ئىشلىرىغا دائىر باشقا ھۆججەتلەرنى يېزىپ بېرىش.

29- ماددا ئادۋوكاتلاردىن قانۇن مەسلىھەتچىسى بولغانلىرى پۈتۈشكىنى بويىچە، ھاۋالە قىلغۇچىنىڭ قانۇنغا دائىر سوئاللىرىغا جاۋاب بېرىشى، قانۇن ھۆججەتلىرىنى تەييارلىشى ۋە تەكشۈرۈشى، دەۋا، مۇرەسسە ياكى كېسىم پائالىيىتىگە ۋاكالىتەن قاتنىشىشى، ھاۋالە قىلغان قانۇنغا دائىر باشقا ئىشلارنى بېجىرىشى، ھاۋالە قىلغۇچىنىڭ قانۇنىي ھوقۇق – مەنپەئىتىنى قوغدىشى كېرەك.

30- ماددا ئادۋوكاتلاردىن دەۋاغا كىرىدىغان قانۇن ئىشلىرىدا ۋاكالەتچى بولغانلىرى ياكى دەۋاغا كىرمەيدىغان قانۇن ئىشلىرىدا ۋاكالەتچى بولغانلىرى ھاۋالە قىلغۇچىنىڭ قانۇنىي ھوقۇق – مەنپەئىتىنى ھاۋالە قىلىنغان ھوقۇق دائىرىسىدە قوغدىشى كېرەك.

31- ماددا ئاقلىغۇچى بولغان ئادۋوكاتلار پاكىت ۋە قانۇنغا ئاساسەن، جىنايەت گۇماندارى، جاۋابكارنىڭ جىنايىتىنىڭ يوقلۇقى، يېنىك ئىكەنلىكى ياكى جىنايى جاۋابكارلىقىنى يېنىكلىتىشكە، كەچۈرۈم قىلىشقا بولىدىغانلىقىنى ئىسپاتلاپ بېرەلەيدىغان ماتېرىيال ۋە پىكىرىنى بېرىپ، جىنايەت گۇماندارى ۋە جاۋابكارنىڭ قانۇنىي ھوقۇق – مەنپەئىتىنى قوغدىشى كېرەك.

32- ماددا ھاۋالە قىلغۇچىلار ئادۋوكاتنىڭ داۋاملىق ئاقلىشى ياكى داۋاملىق ۋاكالەتچى بولۇشىنى رەت قىلسا بولىدۇ، ئاقلىغۇچى ياكى ۋاكالەتچى بولۇشنى باشقا ئادۋوكاتقا ھاۋالە قىلسىمۇ بولىدۇ.

ئادۋوكاتلار ھاۋالىنى قوبۇل قىلغاندىن كېيىن، ئورۇنلۇق ئاساسى يوق تۇرۇپ، ئاقلاش ياكى ۋاكالەتچىلىك قىلىشنى رەت قىلسا بولمايدۇ. لېكىن ھاۋالە قىلىنغان ئىش قانۇنغا خىلاپ بولسا، ھاۋالە قىلغۇچىلار ئادۋوكاتنىڭ مۇلازىمىتىدىن پايدىلىنىپ قانۇنغا خىلاپ ھەرىكەت بىلەن شۇغۇللانغان ياكى دېلوغا مۇناسىۋەتلىك مۇھىم پاكىتنى قەستەن يوشۇرغان بولسا، ئادۋوكات ئاقلاش ياكى ۋاكالەتچىلىك قىلىشنى رەت قىلىشقا ھوقۇقلۇق.

33- ماددا تەھقىقلىگۈچى ئورگان جىنايەت گۇماندارىنى 1 – قېتىم سوراق قىلغان ياكى ئۇنىڭغا مەجبۇرلاش تەدبىرى قوللانغان كۈندىن باشلاپ، ھاۋالە قىلىنغان ئادۋوكاتلار ئادۋوكاتلىق گۇۋاھنامىسى، ئادۋوكاتخانىنىڭ ئىسپاتى ۋە ھاۋالىنامىسى ياكى قانۇن ياردىمى ئالاقىسىنى كۆرسىتىپ، جىنايەت گۇماندارى، جاۋابكار بىلەن كۆرۈشۈشكە ھەمدە دېلوغا مۇناسىۋەتلىك ئەھۋاللارنى ئۇقۇشقا ھوقۇقلۇق. ئادۋوكاتلارنىڭ جىنايەت گۇماندارى ۋە جاۋابكار بىلەن كۆرۈشكەن چاغدىكى گېپىنى ئاڭلىۋېلىشقا بولمايدۇ.

34- ماددا ھاۋالە قىلىنغان ئادۋوكاتلار دېلودا ئەيىبلەش تەكشۈرۈلگەن كۈندىن باشلاپ، دېلوغا مۇناسىۋەتلىك دەۋا ھۆججەتلىرىنى ۋە دېلو ماتېرىيالىنى كۆرۈشكە، كۆچۈرۈۋېلىشقا ۋە كۆپەيتىۋېلىشقا ھوقۇقلۇق. ھاۋالە قىلىنغان ئادۋوكاتلار دېلونى خەلق سوت مەھكىمىسى قوبۇل قىلغان كۈندىن باشلاپ، دېلوغا مۇناسىۋەتلىك بارلىق ماتېرىيالنى كۆرۈشكە، كۆچۈرۈۋېلىشقا ۋە كۆپەيتىۋېلىشقا ھوقۇقلۇق.

35- ماددا ھاۋالە قىلىنغان ئادۋوكاتلار دېلو ئەھۋالىنىڭ ئېھتىياجىغا قاراپ، خەلق تەپتىش مەھكىمىسى، خەلق سوت مەھكىمىسىگە دەلىل – ئىسپات توپلاش، ئېلىشنى ئىلتىماس قىلسا ياكى خەلق سوت مەھكىمىسىگە گۇۋاھچىغا سوتقا قاتنىشىپ گۇۋاھلىق بېرىشنى ئۇقتۇرۇشنى ئىلتىماس قىلسا بولىدۇ.

ئادۋوكاتلار ئۆز ئالدىغا تەكشۈرۈپ دەلىل – ئىسپات ئېلىشتا، ئادۋوكاتلىق گۇۋاھنامىسى ۋە ئادۋوكاتخانىنىڭ ئىسپاتىنى ئېلىپ، ئالاقىدار ئورۇن ۋە شەخسلەردىن ئۆزى بېجىرىۋاتقان قانۇن ئىشلىرىغا ئالاقىدار ئەھۋاللارنى ئىگىلىسە بولىدۇ.

36- ماددا دەۋا ۋاكالەتچىسى ياكى ئاقلىغۇچى بولغان ئادۋوكاتنىڭ مۇنازىرىلىشىش ياكى ئاقلاش ھوقۇقى قانۇن بويىچە كاپالەتلەندۈرۈلىدۇ.

37- ماددا ئادۋوكاتلارنىڭ ئادۋوكاتلىق قىلغان چاغدىكى جىسمانىي ھوقۇقىغا چېقىلىشقا بولمايدۇ.

ئادۋوكاتلارنىڭ سوتخانىدا قىلغان ۋاكالەتلىك قىلىش، ئاقلاش پىكرى قانۇندا سۈرۈشتۈرۈلمەيدۇ. لېكىن، دۆلەت خەۋپسىزلىكىگە خەۋپ يەتكۈزىدىغان، باشقىلارنى يامان نىيەتتە ھاقارەتلەيدىغان، سوت تەرتىپىنى ئېغىر دەرىجىدە قالايمىقانلاشتۇرىدىغان گەپ – سۆزلەرنى قىلغانلىرى بۇنىڭ سىرتىدا.

ئادۋوكاتلاردىن دەۋاغا ئارىلىشىش جەريانىدا جىنايەتكە چېتىلىپ قېلىپ، قانۇن بويىچە توختىتىپ قويۇلغان، قولغا ئېلىنغانلىرىنى توختىتىپ قويغان، قولغا ئالغان ئورگان توختىتىپ قويۇپ، قولغا ئېلىپ 24 سائەت ئىچىدە ئائىلىسىگە، ئىشلەۋاتقان ئادۋوكاتخانىغا ۋە ئۇ قاراشلىق ئادۋوكاتلار جەمئىيىتىگە ئۇقتۇرۇش قىلىشى كېرەك.

38- ماددا ئادۋوكاتلار ئادۋوكاتلىق قىلىش جەريانىدا بىلىپ قالغان دۆلەت مەخپىيىتى ۋە سودا مەخپىيىتىنى ساقلىشى، دەۋالاشقۇچىلارنىڭ شەخسىيىتىنى ئاشكارىلاپ قويماسلىقى كېرەك.

ئادۋوكاتلار ئادۋوكاتلىق قىلىش جەريانىدا بىلىپ قالغان ھاۋالە قىلغۇچىنىڭ ۋە باشقىلارنىڭ ئاشكارىلاشنى خالىمايدىغان ئەھۋالى ۋە ئۇچۇرىنىڭ مەخپىيىتىنى ساقلىشى كېرەك. لېكىن، ھاۋالە قىلغۇچىلار ياكى باشقىلارنىڭ دۆلەت خەۋپسىزلىكىگە، جامائەت خەۋپسىزلىكىگە خەۋپ يەتكۈزۈش جىنايىتى شۇنىڭدەك باشقىلارنىڭ جىسمانىي بىخەتەرلىكى، مال – مۈلۈك بىخەتەرلىكىگە ئېغىر خەۋپ يەتكۈزىدىغان باشقا جىنايەت ئۆتكۈزمەكچى بولغانلىقى ياكى ئۆتكۈزۈۋاتقانلىقىغا دائىر پاكىت ۋە ئۇچۇرلار بۇنىڭ سىرتىدا.

39- ماددا ئادۋوكاتلار بىر دېلودا دەۋالاشقۇچى ئىككى تەرەپكە ۋاكالەتچى بولسا بولمايدۇ، ئۆزى ياكى يېقىن تۇغقىنى بىلەن مەنپەئەت مۇناسىۋىتى بولغان قانۇن ئىشلىرىدا ۋاكالەتلىك قىلسا بولمايدۇ.

40- ماددا ئادۋوكاتلار ئادۋوكاتلىق قىلىشتا، تۆۋەندىكى ھەرىكەتلەردە بولسا بولمايدۇ:

(1) ئۆز ئالدىغا ھاۋالە قوبۇل قىلىش، ھەق ئېلىش، ھاۋالە قىلغۇچىدىن پۇل – مال ياكى باشقا نەپ ئېلىش؛

(2) قانۇن مۇلازىمىتى قىلىش قۇلايلىقىدىن پايدىلىنىپ، دەۋاگەرلەر تالاش – تارتىش قىلىۋاتقان ھوقۇق – مەنپەئەتكە ئېرىشىۋېلىش؛

(3) قارشى تەرەپتىن پۇل – مال ياكى باشقا نەپ ئېلىپ، قارشى تەرەپ ياكى 3 – كىشى بىلەن يامان غەرەزدە تىل بىرىكتۈرۈۋېلىپ، ھاۋالە قىلغۇچىنىڭ ھوقۇق – مەنپەئىتىگە زىيان سېلىش؛

(4) سودىيە، پروكراتور، كېسىمچى شۇنىڭدەك باشقا ئالاقىدار خادىملار بىلەن بەلگىلىمىگە خىلاپ ھالدا كۆرۈشۈش؛

(5) سودىيە، پروكراتور، كېسىمچى شۇنىڭدەك باشقا ئالاقىدار خادىملارغا پارا بېرىش، پارا تونوشتۇرۇش ياكى دەۋالاشقۇچىلارنى پارا بېرىشكە يول كۆرسىتىش، ئازدۇرۇش ۋە ياكى سودىيە، پروكراتور، كېسىمچى شۇنىڭدەك باشقا ئالاقىدار خادىملارنىڭ قانۇن بويىچە دېلو بېجىرىشىگە باشقا ناتوغرا ئۇسۇللار بىلەن تەسىر يەتكۈزۈش؛

(6) قەستەن ساختا دەلىل – ئىسپات بېرىپ ياكى باشقىلارنى ساختا دەلىل – ئىسپات بېرىشكە قىستاپ، قىزىقتۇرۇپ، قارشى تەرەپنىڭ قانۇنلۇق دەلىل – ئىسپاتقا ئېرىشىشىگە توسقۇنلۇق قىلىش؛

(7) دەۋالاشقۇچىلارنى جامائەت تەرتىپىنى قالايمىقانلاشتۇرۇش، جامائەت خەۋپسىزلىكىگە خەۋپ يەتكۈزۈش قاتارلىق قانۇنسىز ۋاسىتىلەر بىلەن تالاش – تارتىشنى ھەل قىلىشقا قۇترىتىش ۋە كۈشكۈرتۈش؛

(8) سوتخانا، كېسىمخانا تەرتىپىنى قالايمىقانلاشتۇرۇش، دەۋا، كېسىم پائالىيىتىنىڭ نورماللىقىغا دەخلى يەتكۈزۈش.

41- ماددا ئىلگىرى سودىيە، پروكراتور بولغان ئادۋوكاتلار خەلق سوت مەھكىمىسى، خەلق تەپتىش مەھكىمىسىدىكى ۋەزىپىسىدىن ئايرىلىپ ئىككى يىلغىچە دەۋا ۋاكالەتچىسى ياكى ئاقلىغۇچى بولسا بولمايدۇ.

42- ماددا ئادۋوكاتلار، ئادۋوكاتخانىلار قانۇن ياردىمى مەجبۇرىيىتىنى دۆلەتنىڭ بەلگىلىمىسى بويىچە ئادا قىلىپ، ياردەم بېرىلگۈچىگە ئۆلچەمگە لايىق قانۇن مۇلازىمىتى قىلىپ، ئۇنىڭ قانۇنىي ھوقۇق – مەنپەئىتىنى قوغدىشى كېرەك.

5- باب: ئادۋوكاتلار جەمئىيىتى

43- ماددا ئادۋوكاتلار جەمئىيىتى  ئىجتىمائىي تەشكىلات تىپىدىكى قانۇنىي ئىگە، ئادۋوكاتلارنىڭ تەلەپچان تەشكىلاتى.

مەملىكەتتە جۇڭخۇا مەملىكەتلىك ئادۋوكاتلار جەمئىيىتى قۇرۇلىدۇ، ئۆلكە، ئاپتونوم رايون، بىۋاسىتە قاراشلىق شەھەردە يەرلىك ئادۋوكاتلار جەمئىيىتى قۇرۇلىدۇ، رايون بار شەھەردە ئېھتىياجىغا قاراپ يەرلىك ئادۋوكاتلار جەمئىيىتى قۇرۇلسا بولىدۇ.

44-ماددا مەملىكەتلىك ئادۋوكاتلار جەمئىيىتىنىڭ نىزامنامىسى مەملىكەتلىك ئەزالار قۇرۇلتىيىدا چىقىرىلىپ، گوۋۇيۈەننىڭ ئەدلىيە مەمۇرىي تارمىقىغا ئەنگە ئالدۇرۇلىدۇ.

يەرلىك ئادۋوكاتلار جەمئىيىتىنىڭ نىزامنامىسى يەرلىك ئەزالار قۇرۇلتىيىدا چىقىرىلىپ، تەڭ دەرىجىلىك ئەدلىيە مەمۇرىي تارمىقىغا ئەنگە ئالدۇرۇلىدۇ. يەرلىك ئادۋوكاتلار جەمئىيىتىنىڭ نىزامنامىسى مەملىكەتلىك ئادۋوكاتلار جەمئىيىتىنىڭ نىزامنامىسىگە زىت كەلسە بولمايدۇ.

45- ماددا ئادۋوكاتلار، ئادۋوكاتخانىلار ئۆزى تۇرۇشلۇق جايدىكى يەرلىك ئادۋوكاتلار جەمئىيىتىگە قاتنىشىشى كېرەك، يەرلىك ئادۋوكاتلار جەمئىيىتىگە قاتناشقان ئادۋوكاتلار ۋە ئادۋوكاتخانىلار مەملىكەتلىك ئادۋوكاتلار جەمئىيىتىنىڭمۇ ئەزاسى بولىدۇ.

ئادۋوكاتلار جەمئىيىتىنىڭ ئەزالىرى ئادۋوكاتلار جەمئىيىتىنىڭ نىزامنامىسىدە بەلگىلەنگەن ھوقۇقتىن بەھرىمەن بولىدۇ، نىزامنامىدە بەلگىلەنگەن مەجبۇرىيەتنى ئادا قىلىدۇ.

46- ماددا ئادۋوكاتلار جەمئىيىتى تۆۋەندىكى  مەسئۇلىيەتنى ئادا قىلىدۇ:

(1) ئادۋوكاتلارنىڭ قانۇن بويىچە ئادۋوكاتلىق قىلىشىنى كاپالەتلەندۈرۈش، ئادۋوكاتلارنىڭ قانۇنىي ھوقۇق – مەنپەئىتىنى قوغداش؛

(2) ئادۋوكاتلىق خىزمىتى تەجرىبىلىرىنى يەكۈنلەش، ئالماشتۇرۇش؛

(3) ساھە قائىدىسى ۋە تەنبىھ قائىدىسىنى چىقىرىش؛

(4) ئادۋوكاتلارنى كەسپىي جەھەتتىن تەربىيىلەش ۋە كەسىپ ئەخلاقى تەربىيىسى، كەسىپكارلىق ئىنتىزامى تەربىيىسى بېرىش، ئادۋوكاتلارنىڭ ئادۋوكاتلىق قىلىشىنى باھالاش؛

(5) ئادۋوكاتلىق قىلىشنى ئىلتىماس قىلغانلارنى پراكتىكا قىلدۇرۇش، پراكتىكانتلارنى باھالاش؛

(6) ئادۋوكاتلار ۋە ئادۋوكاتخانىلارنى مۇكاپاتلاش، ئۇلارغا تەنبىھ بېرىش؛

(7) ئادۋوكاتلار ئۈستىدىكى ئەرز ياكى پاش قىلىش ماتېرىيالىنى قوبۇل قىلىش، ئادۋوكاتلار ئادۋوكاتلىق قىلىش جەريانىدا پەيدا بولغان ماجىرانى مۇرەسسە قىلىش، ئادۋوكاتلارنىڭ ئەرزىنى قوبۇل قىلىش؛

(8) قانۇن، مەمۇرىي نىزام، قائىدە شۇنىڭدەك ئادۋوكاتلار جەمئىيىتىنىڭ نىزامنامىسىدە بەلگىلەنگەن باشقا مەسئۇلىيەتلەر.

ئادۋوكاتلار جەمئىيىتىنىڭ ساھە قائىدىسى ۋە تەنبىھ قائىدىسى ئالاقىدار قانۇن، مەمۇرىي نىزام ۋە قائىدىلەرگە زىت كەلسە بولمايدۇ.

6- باب: قانۇن جاۋابكارلىقى

47- ماددا ئادۋوكاتلاردىن تۆۋەندىكى قىلمىشلارنىڭ بىرىنى سادىر قىلغانلىرىغا رايون بار شەھەر دەرىجىلىك ياكى بىۋاسىتە قاراشلىق شەھەردىكى رايونلۇق خەلق ھۆكۈمىتىنىڭ ئەدلىيە مەمۇرىي تارمىقى ئاگاھلاندۇرۇش جازاسى بېرىدۇ، 5000 يۈەندىن تۆۋەن جەرىمانە قويسا بولىدۇ؛ قانۇنغا خىلاپ تاپاۋىتى بارلىرىنىڭ قانۇنغا خىلاپ تاپاۋىتىنى مۇسادىرە قىلىدۇ؛ قىلمىشى ئېغىرلىرىغا ئادۋوكاتلىق قىلىشنى ئۈچ ئايدىن تۆۋەن توختىتىپ قويۇش جازاسى بېرىدۇ:

(1) بىرلا ۋاقىتتا ئىككىدىن ئارتۇق ئادۋوكاتخانىدا ئادۋوكاتلىق قىلغانلار؛

(2) نامۇۋاپىق ۋاسىتىلەر بىلەن ئىش ئېلىۋالغانلار؛

(3) بىر دېلودا دەۋالاشقۇچى ئىككى تەرەپكە ۋاكالەتچى بولغان ياكى ئۆزى ۋە يېقىن تۇغقانلىرى بىلەن مەنپەئەت مۇناسىۋىتى بولغان قانۇن ئىشلىرىدا ۋاكالەتچىلىك قىلغانلار؛

(4) خەلق سوت مەھكىمىسى، خەلق تەپتىش مەھكىمىسىدىكى ۋەزىپىسىدىن ئايرىلىپ ئىككى يىل بولماي تۇرۇپ، دەۋا ۋاكالەتچىلىكى ياكى ئاقلىغۇچىلىق قىلغانلار؛

(5) قانۇن ياردىمى مەجبۇرىيىتىنى ئادا قىلمىغانلار.

48- ماددا ئادۋوكاتلاردىن تۆۋەندىكى قىلمىشلارنىڭ بىرىنى سادىر قىلغانلىرىغا رايون بار شەھەر دەرىجىلىك ياكى بىۋاسىتە قاراشلىق شەھەردىكى رايونلۇق خەلق ھۆكۈمىتىنىڭ ئەدلىيە مەمۇرىي تارمىقى ئاگاھلاندۇرۇش جازاسى بېرىدۇ، 10 مىڭ يۈەندىن تۆۋەن جەرىمانە قويسا بولىدۇ؛ قانۇنغا خىلاپ تاپاۋىتى بارلىرىنىڭ قانۇنغا خىلاپ تاپاۋىتىنى مۇسادىرە قىلىدۇ؛ قىلمىشى ئېغىرلىرىغا ئادۋوكاتلىق قىلىشنى ئۈچ ئايدىن يۇقىرى، ئالتە ئايدىن تۆۋەن توختىتىپ قويۇش جازاسى بېرىدۇ:

(1) ئۆز ئالدىغا ھاۋالە قوبۇل قىلغان، ھەق ئالغان، ھاۋالە قىلغۇچىدىن پۇل – مال ياكى باشقا نەپ ئالغانلار؛

(2) ھاۋالىنى قوبۇل قىلغاندىن كېيىن، ئورۇنلۇق سەۋەب يوق تۇرۇپ ئاقلاشنى ياكى ۋاكالەتلىك قىلىشنى رەت قىلغان، سوتتىكى دەۋاغا ياكى كېسىمگە ۋاقتىدا قاتناشمىغانلار؛

(3) قانۇن مۇلازىمىتى قۇلايلىقىدىن پايدىلىنىپ، دەۋالاشقۇچىلار تالاش – تارتىش قىلىۋاتقان ھوقۇق – مەنپەئەتكە ئېرىشىۋالغانلار؛

(4) سودا مەخپىيىتى ياكى كىشىلەرنىڭ شەخسىيىتىنى ئاشكارىلاپ قويغانلار.

49- ماددا ئادۋوكاتلاردىن تۆۋەندىكى قىلمىشلارنىڭ بىرىنى سادىر قىلغانلىرىغا رايون بار شەھەر دەرىجىلىك ياكى بىۋاسىتە قاراشلىق شەھەردىكى رايونلۇق خەلق ھۆكۈمىتىنىڭ ئەدلىيە مەمۇرىي تارمىقى ئادۋوكاتلىق قىلىشىنى ئالتە ئايدىن يۇقىرى، بىر يىلدىن تۆۋەن توختىتىپ قويۇش جازاسى بېرىدۇ؛ 50 مىڭ يۈەندىن تۆۋەن جەرىمانە قويسا بولىدۇ؛ قانۇنغا خىلاپ تاپاۋىتى بارلىرىنىڭ قانۇنغا خىلاپ تاپاۋىتىنى مۇسادىرە قىلىدۇ؛ قىلمىشى ئېغىرلىرىنىڭ ئادۋوكاتلىق گۇۋاھنامىسىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى بىكار قىلىدۇ؛ جىنايەت شەكىللەندۈرگەنلىرى قانۇن بويىچە جىنايى جاۋابكارلىققا تارتىلىدۇ:

(1) سودىيىلەر، پروكراتورلار، كېسىمچىلەر شۇنىڭدەك باشقا ئالاقىدار خادىملار بىلەن بەلگىلىمىگە خىلاپ ھالدا كۆرۈشكەن ياكى دېلونى قانۇن بويىچە بېجىرىشكە باشقا ناتوغرا ئۇسۇللار بىلەن تەسىر يەتكۈزگەنلەر؛

(2) سودىيىلەر، پروكراتورلار، كېسىمچىلەر شۇنىڭدەك باشقا ئالاقىدار خادىملارغا پارا بەرگەن، پارا تونوشتۇرغان ياكى دەۋالاشقۇچىلارنى پارا بېرىشكە يول كۆرسەتكەن، ئازدۇرغانلار؛

(3) ئەدلىيە مەمۇرىي تارمىقىغا ساختا ماتېرىيال بەرگەن ياكى ساختىپەزلىك قىلىشتەك باشقا قىلمىش سادىر قىلغانلار؛

(4) قەستەن ساختا دەلىل– ئىسپات بېرىپ ياكى باشقىلارنى ساختا دەلىل – ئىسپات بېرىشكە قىستاپ، قىزىقتۇرۇپ، قارشى تەرەپنىڭ قانۇنلۇق دەلىل– ئىسپاتقا ئېرىشىشىگە دەخلى يەتكۈزگەنلەر؛

(5) قارشى تەرەپتىن پۇل– مال ياكى باشقا نەپ ئېلىپ، قارشى تەرەپ ياكى 3 – كىشى بىلەن يامان غەرەزدە تىل بىرىكتۈرۈۋېلىپ، ھاۋالە قىلغۇچىنىڭ ھوقۇق – مەنپەئىتىگە زىيان سالغانلار؛

(6) سوتخانا، كېسىمخانا تەرتىپىنى قالايمىقانلاشتۇرۇپ، دەۋا، كېسىم پائالىيىتىنىڭ نورماللىقىغا دەخلى قىلغانلار؛

(7) دەۋالاشقۇچىلارنى جامائەت تەرتىپىنى قالايمىقانلاشتۇرۇش، جامائەت خەۋپسىزلىكىگە خەۋپ يەتكۈزۈش قاتارلىق قانۇنسىز ۋاسىتىلەر بىلەن تالاش – تارتىشنى ھەل قىلىشقا قۇتراتقان ۋە كۈشكۈرتكەنلەر؛

(8) دۆلەت خەۋپسىزلىكىگە خەۋپ يەتكۈزىدىغان، باشقىلارنى يامان نىيەتتە ھاقارەتلەيدىغان، سوتخانا تەرتىپىنى ئېغىر دەرىجىدە قالايمىقانلاشتۇرىدىغان گەپ – سۆزلەرنى قىلغانلار؛

(9) دۆلەت مەخپىيىتىنى ئاشكارىلاپ قويغانلار.

ئادۋوكاتلاردىن قەستەن جىنايەت ئۆتكۈزۈپ جىنايى جازاغا تارتىلغانلىرىنىڭ ئادۋوكاتلىق گۇۋاھنامىسىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى بىكار قىلىدۇ.

50- ماددا ئادۋوكاتخانىلاردىن تۆۋەندىكى قىلمىشلارنىڭ بىرىنى سادىر قىلغانلىرىغا رايون بار شەھەر دەرىجىلىك ياكى بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى قىلمىشىغا قاراپ ئاگاھلاندۇرۇش جازاسى بېرىدۇ، بىر ئايدىن يۇقىرى، ئالتە ئايدىن تۆۋەن ئىش توختىتىپ تەرتىپكە سېلىش جازاسى بېرىدۇ، 100 مىڭ يۈەندىن تۆۋەن جەرىمانە قويسا بولىدۇ؛ قانۇنغا خىلاپ تاپاۋىتى بارلىرىنىڭ قانۇنغا خىلاپ تاپاۋىتىنى مۇسادىرە قىلىدۇ؛ قىلمىشى پەۋقۇلئاددە ئېغىر بولغانلىرىنىڭ كەسىپكارلىق گۇۋاھنامىسىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى بىكار قىلىدۇ:

(1) بەلگىلىمىگە خىلاپلىق قىلىپ ھاۋالە قوبۇل قىلغان، ھەق ئالغانلار؛

(2) قانۇندا بەلگىلەنگەن تەرتىپكە خىلاپلىق قىلىپ، نامى، مەسئۇلى، نىزامنامىسى، ھەمشېرىك كېلىشىمى، تۇرۇشلۇق جايى، شېرىكى قاتارلىق چوڭ – چوڭ مەزمۇنلارنى ئۆزگەرتكەنلەر؛

(3) قانۇن مۇلازىمىتىدىن باشقا تىجارەت پائالىيىتى بىلەن شۇغۇللانغانلار؛

(4) باشقا ئادۋوكاتخانىلار، ئادۋوكاتلارنى كەمسىتىش ياكى تونۇشتۇرۇش ھەققى بېرىش قاتارلىق ناتوغرا ۋاسىتىلەر بىلەن ئىش ئېلىۋالغانلار؛

(5) بەلگىلىمىگە خىلاپلىق قىلىپ مەنپەئەت توقۇنۇشى بولغان دېلونى قوبۇل قىلغانلار؛

(6) قانۇن ياردىمى مەجبۇرىيىتىنى ئادا قىلىشنى رەت قىلغانلار؛

(7) ئەدلىيە مەمۇرىي تارمىقىغا ساختا ماتېرىيال بېرىش ياكى ساختىپەزلىك قىلىشتەك باشقا قىلمىش سادىر قىلغانلار؛

(8) ئادۋوكاتلىرىنى باشقۇرۇشقا سەل قاراپ، ئېغىر ئاقىۋەت پەيدا قىلغانلار.

ئادۋوكاتخانىلاردىن ئالدىنقى تارماقتا كۆرسىتىلگەن قانۇنغا خىلاپ قىلمىشلارنى سادىر قىلىپ جازالانغانلىرىنىڭ مەسئۇلىغا قىلمىشىنىڭ ئېغىر– يېنىكلىكىگە قاراپ ئاگاھلاندۇرۇش جازاسى بېرىلىدۇ ياكى 20 مىڭ يۈەندىن تۆۋەن جەرىمانە قويۇلىدۇ.

51- ماددا ئادۋوكاتلاردىن مۇشۇ قانۇندىكى بەلگىلىمىگە خىلاپلىق قىلىپ، ئاگاھلاندۇرۇش جازاسى بېرىلگەندىن كېيىنكى بىر يىل ئىچىدە ئاگاھلاندۇرۇش جازاسى بېرىشكە تېگىشلىك قىلمىشنى قايتا سادىر قىلغانلىرىغا رايون بار شەھەر دەرىجىلىك ياكى بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى ئۈچ ئايدىن يۇقىرى، بىر يىلدىن تۆۋەن ئادۋوكاتلىق قىلىشنى توختىتىش جازاسى بېرىدۇ؛ ئادۋوكاتلىق قىلىشنى توختىتىش جازاسىنىڭ مۇددىتى توشۇپ ئىككى يىل ئىچىدە ئادۋوكاتلىق قىلىشنى توختىتىشقا تېگىشلىك قىلمىشنى قايتا سادىر قىلغانلىرىنىڭ ئادۋوكاتلىق گۇۋاھنامىسىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى بىكار قىلىدۇ.

ئادۋوكاتخانىلاردىن مۇشۇ قانۇندىكى بەلگىلىمىگە خىلاپلىق قىلىپ، ئىش توختىتىپ تەرتىپكە سېلىش جازاسىنىڭ مۇددىتى توشۇپ ئىككى يىل ئىچىدە ئىش توختىتىپ تەرتىپكە سېلىشقا تېگىشلىك قىلمىشنى قايتا سادىر قىلغانلىرىنىڭ كەسىپكارلىق گۇۋاھنامىسىنى ئۆلكىلىك، ئاپتونوم رايونلۇق، بىۋاسىتە قاراشلىق شەھەرلىك خەلق ھۆكۈمىتىنىڭ ئەدلىيە مەمۇرىي تارمىقى بىكار قىلىدۇ.

52- ماددا ناھىيە دەرىجىلىك خەلق ھۆكۈمىتىنىڭ ئەدلىيە مەمۇرىي تارمىقى ئادۋوكاتلار ۋە ئادۋوكاتخانىلارنىڭ كەسىپكارلىق پائالىيىتىنى دائىم نازارەت قىلىپ تۇرۇشى، تەكشۈرۈشتە سەزگەن مەسىلىلەرنى تۈزىتىشكە بۇيرۇشى؛ دەۋالاشقۇچىلارنىڭ ئەرزىنى ۋاقتىدا تەكشۈرۈشى كېرەك. ناھىيە دەرىجىلىك خەلق ھۆكۈمىتىنىڭ ئەدلىيە مەمۇرىي تارمىقى ئادۋوكاتلار ۋە ئادۋوكاتخانىلاردىن قانۇنغا خىلاپ قىلمىش سادىر قىلغانلىرىغا مەمۇرىي جازا بېرىشكە تېگىشلىك دەپ قارىسا، يۇقىرى دەرىجىلىك ئەدلىيە مەمۇرىي تارمىقىغا جازالاش تەكلىپى بېرىشى كېرەك.

53- ماددا  ئادۋوكاتلىق قىلىشنى ئالتە ئايدىن يۇقىرى توختىتىش جازاسى بېرىلگەن ئادۋوكاتلاردىن جازا مۇددىتى توشقىنىغا ئۈچ يىل بولمىغانلىرى ھەمشېرىك بولسا بولمايدۇ.

54- ماددا  ئادۋوكاتلاردىن قانۇنغا خىلاپ ئادۋوكاتلىق قىلغان ياكى سەۋەنلىك بىلەن دەۋالاشقۇچىلارنى زىيانغا ئۇچراتقانلىرىنىڭ، ئىشلەۋاتقان ئادۋوكاتخانىسى تۆلەم جاۋابكارلىقىنى ئۈستىگە ئالىدۇ. ئادۋوكاتخانا تۆلەم بەرگەندىن كېيىن، قەستەن ياكى زور سەۋەنلىك ئۆتكۈزگەن ئادۋوكاتتىن تۆلىتىۋالسا بولىدۇ.

55- ماددا ئادۋوكاتلىق گۇۋاھنامىسى ئالماي تۇرۇپ ئادۋوكاتلارنىڭ نامىدا قانۇن مۇلازىمىتى قىلغانلارنى تۇرۇشلۇق جايدىكى ناھىيە دەرىجىلىكتىن يۇقىرى يەرلىك خەلق ھۆكۈمىتىنىڭ ئەدلىيە مەمۇرىي تارمىقى قانۇنسىز ئادۋوكاتلىق قىلىشنى توختىتىشقا بۇيرۇيدۇ، قانۇنغا خىلاپ تاپاۋىتىنى مۇسادىرە قىلىدۇ، قانۇنغا خىلاپ تاپاۋىتىنىڭ بىر ھەسسىسىدىن يۇقىرى، بەش ھەسسىسىدىن تۆۋەن جەرىمانە قويىدۇ.

56- ماددا ئەدلىيە مەمۇرىي تارمىقىنىڭ خادىملىرىدىن مۇشۇ قانۇندىكى بەلگىلىمىگە خىلاپلىق قىلىپ، خىزمەت ھوقۇقىدىن كەلسە – كەلمەس پايدىلىنىپ، خىزمەتتە بىپەرۋالىق قىلىپ جىنايەت شەكىللەندۈرگەنلىرى قانۇن بويىچە جىنايى جاۋابكارلىققا تارتىلىدۇ؛ جىنايەت شەكىللەندۈرمىگەنلىرىگە قانۇن بويىچە مەمۇرىي چارە كۆرۈلىدۇ.

7- باب: قوشۇمچە پرىنسىپ

57- ماددا ئارمىيىگە قانۇن مۇلازىمىتى قىلىدىغان ئارمىيىدىكى ئادۋوكاتلارنىڭ ئادۋوكاتلىق سالاھىيىتىگە ئېرىشىشى، ھوقۇقى، مەجبۇرىيىتى ۋە ھەرىكەت مىزانىغا مۇشۇ قانۇندىكى بەلگىلىمە تەتبىقلىنىدۇ. ئارمىيىدىكى ئادۋوكاتلارنى كونكرېت باشقۇرۇش چارىسىنى گوۋۇيۈەن بىلەن مەركىزىي ھەربىي كومىتېت ئايرىم چىقىرىدۇ.

58- ماددا چەت ئەل ئادۋوكاتخانىلىرىنىڭ جۇڭخۇا خەلق جۇمھۇرىيىتى چېگرىسى ئىچىدە ئاپپارات قۇرۇپ قانۇن مۇلازىمىتى قىلىشىنى باشقۇرۇش چارىسىنى گوۋۇيۈەن چىقىرىدۇ.

59- ماددا ئادۋوكاتلارنىڭ ھەق ئېلىش چارىسىنى گوۋۇيۈەننىڭ باھا مەمۇرىي تارمىقى بىلەن گوۋۇيۈەننىڭ ئەدلىيە مەمۇرىي تارمىقى چىقىرىدۇ.

60- ماددا بۇ قانۇن 2008 – يىل 6 – ئاينىڭ 1 – كۈنىدىن باشلاپ يولغا قويۇلىدۇ.

(تەرجىمىسىنى شىنجاڭ ئۇيغۇر ئاپتونوم رايونلۇق خەلق قۇرۇلتىيى دائىمىي كومىتېتى بەنگۇڭتىڭى قانۇن – نىزاملارنىڭ ئىجراسىنى بېكىتىش گۇرۇپپىسى بېكىتتى)

يازما ھوقۇقى: ئالىم بىز بلوگى
يازما ئادىرىسى: جۇڭخۇا خەلق جۇمھۇرىيىتىنىڭ ئادۋوكاتلار قانۇنى