ئۈرۈمچى شەھىرى ئوتتۇرا مەكتەپ ئىمتىھانىغا تۇنجى قېتىم توردا تىزىملىتىش ئۇسۇلىنى قوللاندى

2015-يىلى 4-ئاينىڭ 17-كۈندىن 4-ئاينىڭ 25-كۈنىگىچە، ئۈرۈمچى شەھىرىدە تولۇقسىز ئوتتۇرا مەكتەپ ئۇقۇش پۈتتۈرۈش ئىمتىھانىنى تۇنجى قېتىم توردا تىزىملىتىش ئۇسۇلى قوللىنىلدى.

ئىگىلىنىشىچە، بۇ قېتىملىق تىزىملىتىش مەكتەپ تەرىپىدىن بىر تۇتاش ئېلىپ بېرىلغان بولۇپ، تىزىملىتىش شەرتى ئۈرۈمچى شەھىرى ۋە ناھىيەسىدە تولۇقسىز ئوتتۇرا مەكتەپنى ئوقۇۋاتقان ھەمدە ئوقۇش تەۋەلىكى ئۈرۈمچى شەھەرلىك مائارىپ ئىدارىسىگە تەۋە بولغان تولۇقسىز 3-يىللىقنىڭ ئوقۇغۇچىسى بولۇشى كېرەك ئىكەن.

ئالدىنقى قاراردا ئوقۇش پۈتتۈرگەن ئوقۇغۇچىلار (ئۈرۈمچى تەۋەلىكىدىكى) ئانا مەكتىپىگە قايتىپ، ئۆزى ۋە ئاتا-ئانىسىنىڭ نوپۇس دەپتىرىنىڭ ئەسلى نۇسخىسى، كۆپەيتمە نۇسخىسى، ئوقۇش پۈتتۈرۈش گۇۋاھنامىسىنىڭ ئەسلى نۇسخىسى، كۆپەيتمە نۇسخىسىنى ئېلىپ ئۆزى نەق مەيداندا ئېلېكتىرونلۇق سۈرەتكە چۈشكەندىن كېيىن تىزىملاتسا بولىدىكەن.