قاقاقلاپ كۈلۈش ئورۇندا تۇرۇپ ئاستا يۈگۈرگەنگە باراۋەر

ئىتالىيەلىك مۇتەخەسسىسلەر يېقىندا مۇنداق دېيىشتى: «قاقاقلاپ كۈلۈشنىڭ پايدىسى ئورۇندا تۇرۇپ ئاستا يۈگۈرگەننىڭ پايدىسىغا باراۋەر، شۇنداقلا بۇ ئىنتايىن ياخشى ئوكسىگېنلىق ھەرىكەت. دېمىسىمۇ كۈلۈش بىر خىل ئالاھىدە ھەرىكەت، ئادەم كۈلگەندە قورساق مۇسكۇللىرى ئىختىيارسىز يىغىلىدۇ، نەپەس ۋە ئۆپكىنىڭ ھاۋا ئالماشتۇرۇش سۈرئىتى تېزلىشىدۇ، ئورۇندا تۇرۇپ ئاستا يۈگۈرگەندىمۇ مۇشۇنداق ئۈنۈم كۆرۈلىدۇ. ئادەتتە بىر مىنۇت ئورۇندا تۇرۇپ يۈگۈرگەندە 13 كالورىيە ئىسسىقلىق خورايدۇ، ئېچىلىپ كۈلگەندىمۇ ئادەم بەدىنىدە شۇنچىلىك ئىسسىقلىق سەرپ بولىدۇ».

مۇتەخەسسىسلەر يەنە مۇنداق دېيىشتى: «ئادەم ئون مىنۇت قاقاقلاپ كۈلسە، ئەڭ كۆپ بولغاندا 50 كالورىيە ئىسسىقلىق سەرپ بولىدۇ. ئۇنىڭدىن باشقا، قاقاقلاپ كۈلۈش يەنە كۆكرەك مۇسكۇلىنى سوزىدۇ، كۆكرەك قەپىسىنى كېڭەيتىدۇ، ئۆپكىنىڭ سىغىمچانلىقىنى ئاشۇرىدۇ؛ قورساق مۇسكۇلىنىڭ تەكرار بوشىشى ۋە يىغىلىشى، ئاشقازان ۋە ئۈچەينىڭ لۆمۈلدىشىنى كۈچەيتىپ ھەم ئاشقازان سۇيۇقلۇقىنىڭ ئاجرىلىشىنى تېزلىتىپ، ھەزىم قىلىشنى ياخشىلايدۇ؛ قاقاقلاپ كۈلۈش يەنە بەدەنگە كىرىدىغان ئوكسىگېننى كۆپەيتىپ، قان ئايلىنىشنى راۋانلاشتۇرىدۇ».

ئەسلى مەنبە: ئۈرۈمچى كەچلىك گېزىتى