يېقىندا، جىلىن ئۇنۋېرسىتېتىدىكى ئوقۇغۇچىلارنىڭ مىكرو بلوگدا ئاشكارىلىشىچە، بىر مۇئەللىم كومپيۇتېر دەرسىدە ئويلىمىغان يەردىن «كۆكچىش(蓝牙) بىلەن يوقلىما قىلىش» ئۇسۇلىنى يولغا قويغان، ئوقۇغۇچىلارنىڭ ھەممىسىنىڭ يان تېلېفونىدىكى كۆكچىشنىڭ ئىسمىغا ئۆزىنىڭ ئوقۇغۇچىلىق نومۇرىنى ئىشلىتىشىنى تەلەپ قىلغان، ئارقىدىن مۇئەللىم كومپيۇتېردىكى مەخسۇس سېستىما ئارقىلىق بىرلا ئىزدەپ، كىم بار كىم يوق ھەممىنى بىر كۇنۇپكا بىلەن ئۇجۇقتۇرىۋەتكەن! ئوقۇغۇچىلار بولسا ھەسرەتلەنگەن ھالدا: «مۇئەللىمنىڭ يوقلىما قىلىشىنى ئىنسانىيەت ئاللىقاچان توسۇشقا ئامالسىز قالدى، ساۋاقداشلار، كېلەر قېتىم دەرستىن قاچقاندا، يان تېلېفونىڭلارنى بىرەرسىگە بېرىپ قويۇشنى ئۇنتۇماڭلار» دەپ مىكرو بلوگ ئېلان قىلغان…

مەكتەپ نېمىشقا كۆكچىش ئارقىلىق يوقلىما قىلىدۇ؟ بۇنىڭغا قارىتا، جىلىن ئۇنۋېرسىتېتى كومپيۇتېر فاكۇلتېتىنىڭ مۇدىرى بۇ بىر خىل «ھەيدەكچىلىك ئۇسۇلى» دەپ جاۋاپ بەرگەن. ئۇنىڭ دېيىشىچە، ئالىي ئوقۇللاردا، بەزى چوڭ سىنىپلاردا دەرس ئاڭلايدىغان ئوقۇغۇچىلار بىر قەدەر كۆپ بولغاچ، ئوقۇغۇچىلار دەرستىن قاچىدىغان ئەھۋال مەۋجۇد، مۇئەللىم دەرستىن بۇرۇن بىرمۇ-بىر يوقلىما قىلسا نۇرغۇن ۋاقىت ئىسراپ بولىدۇ، بۇ ئەھۋالدىن قانداق ساقلىنىش نۆۋەتتە مەكتەپ رەھبەرلىكىنىڭ بېشىنى ئاغرىتىۋاتقان بىر مەسىلە ئىكەن. كومپيۇتېر فاكۇلتېتىنىڭ بىر ئوقۇتقۇچىسى بۇنىڭغا نىسبەتەن يېڭىدىن بىر خىل سېستىما لايىھەلەپ چىققان بولۇپ، كۆكچىش تەكشۈرۈش ئارقىلىق ئوقۇغۇچىلارنىڭ دەرسكە كەلگەن كەلمىگەنلىگىنى بىلگىلى بولىدىكەن.

«يوقلىما قىلىشمۇ ھەممە ئوقۇغۇچىلارنىڭ دەرسكە تولۇق كېلىپ ئاڭلىيالىشىنى ئۈمىد قىلغانلىقىمىز ئۈچۈندۇر، بۇنىڭدىن ئىلگىرى بەزى ئوقۇغۇچىلارنىڭ دەرسكە قاتناشماي ئىمتىھاندىن ئۆتەلمەيدىغان ياكى سىنىپ قالدۇرۇلىدىغان ئەھۋاللار، ھەتتا ئوقۇشتىن چېكىنىدىغان ئەھۋاللار داۋاملىق يۈز بېرىپ تۇراتتى، بۇنىڭدىن بىزمۇ قاتتىق ئەپسۇسلىناتتۇق» دېدى مۇئاۋىن مۇدىر. نۆۋەتتە بۇ سېستىما بىر قانچە سىنىپ ئارىسىدا سىناق قىلىنىۋاتقان بولۇپ، ناۋادا مەسىلە بايقالمىسا، كېلەر مەۋسۈمدىن باشلاپ پۈتكۈل مەكتەپ بويىچە ئىجرا قىلىنىدىكەن.

ئوقۇغۇچىلارنىڭ بۇ ئىشقا بولغان كۆز قارىشى: دەرسكە قاتنىشىش قاتناشماسلىق مۇھىم ئەمەس، مۇھىمى دەرسنىڭ سۈپىتى

بۇ خەۋەر تارقالغاندىن كېيىن، ئوقۇغۇچىلار «مۇئەللىملەرنىڭ يوقلىما قىلىشىنى ئىنسانىيەت توسۇشقا ئامالسىز قالدى» دەپ چوقان سېلىشقان. ئوقۇغۇچىلارنىڭ بۇ ئىشقا نىسبەتەن ئىنكاسىمۇ بىردەك بولمىغان. مەلۇم بىر تورداش مۇنداق دېگەن: «بۇ يېڭىلىقكەن! » يەنە بىرەيلەن مۇنداق دېگەن: «يان تېلېفوندىن بىرنى زاپاس ئېلىپ قويۇپ بىرەرسىگە تۇتقۇزۇپ قويساق بولغۇدەك». يەنە بىرەيلەن مۇنداق دېگەن: «يان تېلېفوننىڭ توكى قالمىسا قانداق قىلغۇلۇق؟». يەنە بىرەيلەن مۇنداق دېگەن: «تاغتۇرا يان تېلېفوننىڭ بەزىلىرىدە كۆك چىش بولمىسا». يەنە بىرەيلەن ممۇنداق دېگەن: «ئوقۇغۇچىلارنىڭ دەرسكە قاتنىشىش قاتناشماسلىقىدىكى كۆپىنچە سەۋەپ مۇئەللىملەردە، دەرسنى ياخشى ئۆتىدىغان مۇئەللىملەر تېخىمۇ كۆپ ئوقۇغۇچىلارنىڭ تۇتۇپ تۇرالىشى مۇمكىن.»