تەدبىركار ئەڭ ياقتۇرۇپ ئىشلىتىدىغان تور كۆرگۈ FireFox نى كۆپچىلىككە تەۋسىيە قىلغاندىن بېرى، ئوت تۈلكە ئىشلىتىدىغانلار خېلى ئاۋۇپ قالدى. بىراق بىر قىسىم FireFox ئىشلەتكۈچىلەرنىڭ ئىنكاس قىلىشىچە، خېلى كۆپ قىسىم ئۇيغۇرچە تور بېكەتلەرنىڭ خەت نۇسخىسى FireFox تا نورمال كۆرۈنمەيدىكەن. ئەلۋەتتە، ئىلگىرى تەدبىركار ئۆزىنىڭ FireFox ئىشلىتىش تەجرىبىلىرى ئارقىلىق بىر قىسىم ئۇسۇللارنى تەمىنلىگەن بولسىمۇ، بىراق يەنىلا خېلى كۆپ قىسىم بېكەت باشلىقلىرى تور بېكىتىنى FireFox تا نورمال كۆرسىتىش ھالىتىگە تەڭشىمىگەن ياكى ئاتەش تۈلكە ئىشلەتكۈچىلىرى FireFox نىڭ خەت نۇسخىسىنى ئۇيغۇرچە خەت نۇسخىسىغا بېكىتىۋەتكەن ئەھۋالدا، تور بېكەتتىكى بارلىق ئورۇنلار شۇ خەت نۇسخىسىدا كۆرۈنۈپ يەنە بىر قىسىم قولايسىزلىقلار كېلىپ چىقتى. ئۇشبۇ سەۋەبتىن، بۈگۈن كۆپچىلىككە FireFox نىڭ يەنە بىر نادىر قىستۇرمىسى – Stylish نى تونۇشتۇرۇپ ئۆتۈشنى لايىق تاپتىم.

بىر قىسىم، ھەتتا خېلى كۆپ قىسىم ئۇيغۇرچە تور بېكەتلەرنى FireFox تا زىيارەت قىلغىنىمىزدا، خەت نۇسخىسى تونىمىغان ھالەتتە ئەرەپچىدەك كۆرۈنىۋالىدۇ. بۇ مەسىلىنى «ئۇيغۇرچە تور بېكەتلەرنى FireFox تا نورمال كۆرسىتىش ئۇسۇلى» ئارقىلىق ھەل قىلىشقا بولىدىغان بولۇپ، بۇ ئۇسۇل بېكەت باشلىقلىرىغا ماس كېلىدۇ. بىراق، ھەممىلا ئادەم بېكەت باشلىقى ئەمەستە، نۇرغۇن FireFox ئىشلەتكۈچىلىرى يەنىلا ئۆزى ياقتۇرىدىغان بىر قىسىم تور بېكەتلەرنى FireFox تا نورمال زىيارەت قىلالماي بېشى قاتماقتا. گەرچە FireFox تىن مەلۇم يۇنىكودلۇق ئۇيغۇرچە خەت نۇسخىسىنى بەلگىلەپ قويساق، بارلىق تور بېكەتلەر شۇ خەت نۇسخىسىدا كۆرۈنسىمۇ، بىراق بۇ يەنىلا كۆڭۈلدىكى ھەل قىلىش ئۇسۇلى ئەمەس.

Stylish بولسا، تور بېكەتنىڭ مەلۇم قىسمىنى خالىغان خەت نۇسخىسىدا كۆرسىتەلەيدىغان FireFox قىستۇرمىسى بولۇپ، بىز پەقەت ئازغىنە CSS كودى بىلسەكلا، ئۆزىمىز نورمال كۆرسەتمەكچى بولغان مەلۇم تور بېكەتنىڭ مەلۇم قىسمىنى مەلۇم خەت نۇسخىسىدا كۆرسىتىش مەقسىدىگە يېتەلەيمىز. ئەلۋەتتە، CSS بىلمەيدىغانلار ئۈچۈن، تەييار كودنى ئىشلىتىشمۇ بىر ئاقىلانىلىك بولۇپ ھېسابلىنىدۇ.

Stylish قىستۇرمىسىنى ئورنىتىش ۋە ئىشلىتىش

يازما ئاستىدىكى ئۇلانمىدىن Stylish قىستۇرمىسى بار بەتكە ئۇلانغاندىن كېيىن، FireFox قا قوشۇش كۇنۇپكىسىنى بېسىپ قىستۇرمىنى ئورنىتىمىز، ئورنىتىش ئاخىرلاشقاندىن كېيىن FireFox قايتا قوزغىتىشنى تەلەپ قىلىدۇ. تەلەپ بويىچە قايتا قوزغاتقاندىن كېيىن، تور كۆرگۈنىڭ ئوڭ تەرەپ ئاستى بۇرجەكتە S ھەرىپى شەكىللىك بىر كىچىك ئايكوننىڭ پەيدا بولغان بولسا، ئۇنداقتا قىستۇرمىنى ئورنىتىش مۇۋاپىقىيەتلىك بولغان بولىدۇ.

ئەمدى بىز ئۇيغۇرچە نورمال كۆرسەتمەكچى بولغان بەتنى ئېچىۋالىمىز ۋە ئاستى تەرەپتىكى Stylish قىستۇرمىسى ئايكونىنى چەكسەك، بىر قىسىم تەڭشەكلەر كۆرۈنىدۇ. بۇنىڭ ئىچىدىن ئاستىدىكى 提供给 XXX ناملىق تۈرلەر ئىچىدىن ئۆز ئېھتىياجىمىزغا ئاساسەن تاللىساق بولىدۇ. تاللىغاندىن كېيىن CSS يازىدىغان ئورۇن كۆرۈنىدۇ. بۇ ئورۇندىن ئەڭ ئۈستىگە بىز يازماقچى بولغان پاسون نامىنى(مەسىلەن، تورخۇمار، ئۇلىنىش دېگەندەك)، ئاستىغا خەتكۈش(زۆرۈر ئەمەس) قاتارلىقلارنى تولدۇرغاندىن كېيىن، ئاستىدىكى كودلارنىڭ ئىچىدىن تۆۋەندىكى كودنىڭ ئىچىگە CSS يېزىپ قويساق بولىدۇ:

@-moz-document domain("www.torhumar.com") {
كودنى مۇشۇ يەرگە يازىمىز
}

يەنى ئاشۇ بەتنىڭ مەلۇم قىسمىنى ئۇيغۇرچە كۆرسەتمەكچى بولساق، شۇ بەتنىڭ ئەسلى كودىنى ئېچىپ، مۇۋاپىق Class ياكى ID نى تېپىپ CSS يازساق بولىدۇ. ئەلۋەتتە، CSS تىن خەۋىرى يوق تورداشلار ئۈچۈن بۇ ئۇسۇل بەك تەۋسىيە قىلىنىپ كەتمەيدۇ. ناۋادا شۇ بەتنىڭ بارلىق خەت نۇسخىسىنى بەلگىلىگەن خەت نۇسخىسىدا نورمال كۆرسەتمەكچى بولساق، ئۇنداقتا تۆۋەندىكى كودنى قىستۇرۇپ سىناپ باقساق بولىدۇ:

*{
font-family: Alpida Unicode System, UKIJ TUZ TOM,Uyghur Ekran, Alkatip Tor, Microsoft Uighur !important;
font-size:15px;
}

يەنى ئۈستىدىكى كود مۇشۇ بەتتىكى ھەممە جايغا ئۈنۈملۈك بولۇپ، شۇ بەتتىكى بارلىق ئورۇننىڭ خەت نۇسخىسىنى مۇشۇ تەرتىپتە كۆرسىتىپ بېرىدۇ، مۇشۇ بەتتىن باشقا بەتكە تەسىر كۆرسەتمەيدۇ. ئەلۋەتتە، يۇقارقى كود يېڭى ئۆگەنگۈچىلەرگە بىر قەدەر ماس كېلىدۇ. شەرت: يۇقارقى خەت نۇسخىلىرىدىن بىرەرسى كومپيۇتېرىڭىزغا ئورنىتىلغان بولۇشى كېرەك.

ئاخىرقى سۆز

Stylish قىستۇرمىسى، FireFox تا ئۇيغۇرچە تور بېكەتلەرنى نورمال كۆرسىتىپ بېرەلەيدىغان بولۇپ، ناۋادا CSS تىن ئازراقلا خەۋىرىڭىز بولسا، خالىغان بەتنىڭ خالىغان قىسمىنى ئۆزىڭىز خالىغان ئۈنۈمدە كۆرسىتەلەيسىز، شۇ ئارقىلىق تور زىيارىتىڭىزنى تېخىمۇ قولاي ۋە ئۈنۈملۈك ئېلىپ بارالايسىز. تورداشلارنىڭ ياخشى قىستۇرمىلار بولسا داۋاملىق تەۋسىيە قىلىشىنى قارشى ئالىمەن.

مۇناسىۋەتلىك مەنزىللەر:

FireFox نىڭ Stylish قىستۇرمىسى |     FireFox نى چۈشۈرۈش |    مەنبە: torhumar.com |    تەدبىركارنىڭ FireFox ئىشلىتىش تەجرىبىلىرى