مۇزات بىلوگى

چىرايىنى ئېنىق كۆرمىگەن بولساممۇ ، بىرسى قولۇمنى تۇتۇپ يېتىلەپ ماڭماقتا ئىدى . نېمىشقىكىن مەنمۇ ئۇن تىنسىز ئەگىشىپ ماڭماقتا ئىدىم . شۇ ماڭغانچە بىر يانتۇلۇققا كېلىپ يۇقىرىغا قاراپ ماڭدۇق ، بۇ يانتۇلۇقنىڭ شۇنچىلىك سىيلىق بولغىنىغا قارىماي ، ئۈستى تەرىپىدىن يېيىلىپ سۇ چۈشىۋاتاتتى . قولۇمنى يېتىلىۋالغان كىشى ماڭا ھېچنىمە دېمىگەن بولسىمۇ ، چوقۇم ئۇنىڭغا بويسۇنۇش ۋە ئۇنىڭغا ئەگىشىش كېرەكلىكىنى ھېس قىلاتتىم . ئۇ قولۇمدىن يېتىلىگىنىچە بىلەن يانتۇلۇقتىن يۇقىرىغا قاراپ ماڭدى . مەنمۇ ئەگىشىپ يۇقىرلاشقا باشلىدىم . بىراق ، تېيىلىپ كېتىپ ئالدىمغا پەقەت ئىلگىرلىيەلمىدىم . ئالدىمغا قەدەم تاشلىغان ھامان يانتۇلۇقنىڭ ھەددىدىن زىيادە سىلىقلىقى سەۋەبىدىن پۇتۇم سىيرىلىپ جايىمغا كەپ قالاتتىم . شۇ تەرىقىدە بىر ھازا تىركەشكەندىن كىيىن ، مىنى يېتىلىۋالغان بۇ كىشى ، ئۇن – تىنسىزلا قولۇمنى قۇيۇپ بېرىپ ، ئالدىغا قاراپ مېڭىپ كەتتى ۋە كۆز ئالدىمدىن يوقاپ كەتتى . بۇ كىشى ماڭا بىر نەرسە دېمىگەن بولسىمۇ ئۇنىڭ مىنى يىتلەشتىن ۋاز كەچكەنلىكىنى بىلىپ تۇراتتىم .
- ئاستىراق يۆتكەڭلار !
- ئاۋۋال پۇتىنى چۈشۈرۈڭلار .
بۇ ئاۋازلار يېقىنلا يەردىن ئاڭلىنىۋاتاتتى . كۆزۈمنى ئېچىپ ، تەسلىكتە مېنى ئوپېراتسىيە كارىۋىتىدىن چاقلىق كارىۋاتقا يۆتكىگىلى تۇرغانلىقىنى ئىلغا قىلالىدىم . كۆز ئالدىم يەنىلا تۇتۇق ھەم غۇۋا ئىدى . ئەتراپتىكى نەرسىلەرنىڭ شەكلى ۋە سانىمۇ مۇجىمەل ئىدى . قارىغاندا بۇ ئۇزۇنغا سوزۇلغان قورقۇنۇچلۇق ئوپېراتسىيە تۈگىگەن بولسا كېرەك دەپ ئويلىدىم ۋە يېنىك بىرنى تىنىۋالدىم . ئوپېراتسىيە ئۆيىنىڭ ئالدىغا چىققىنىمدا ئاڭلىنىۋاتقان ئاۋازلاردىن ئاپامنىڭ ئاۋازىنى ئاڭلاپ تولىمۇ ئىللىق بىر سېزىم ۋۇجۇدۇمغا يامرىدى . ئەتراپتىكىلەرنى پەرق ئېتىشكە تىرىشىپ زېھنىمنى يىغىپ قارىغان بولساممۇ ماڭا تەلمۈرۈپ تۇرغان دادام بىلەن ئاپامنى ۋە يېقىن دوستۇمنى ئارانلا ئىلغا قىلالىدىم . دىققىتىمنى يىغىشقا تىرىشقان بولساممۇ زادىلا دىققىتىمنى يىغالمايۋاتاتتىم . سېستىرالار چاقلىق كارىۋاتنى ئاستا ئىتتىرىپ ياتاققا ئېلىپ ماڭدى . شۇ ئارىلىقتا كارىدوردا تۇرغان بىر قىزنى ئىلغا قىلالىدىم . لېكىن چىرايىنى پەقەتلا كۆرەلمەيۋاتاتتىم . دىققىتىمنى شۇنچە يىغقان بولساممۇ يەنىلا چىرايىنى ئىلغا قىلالماي «ئۇ كىم ؟ ئۇ زادى كىم ؟ دەڭە سىز كىم ؟» دەپ ۋارقىراپ كەتتىم . نىمىشقا ، بۇ قىزنىڭ چىرايىنى كۆرەلمىگەنلىكىم ئۈچۈن بۇنچىۋالا جىددىيلىشىپ كەتكەنلىكىمنى ھازىرغا قەدەر چۈشىنەلمەيمەن . بەلكىم بۇ قىزنى قىز دوستۇم شۇمىكىن دەپ ئويلاپ قېلىپ ، چىراينى كۆرەلمىگەنلىكىم ئۈچۈن جىددىيلىشىپ قالغان بولسام كېرەك .
ياتاققا كىرىپ مىنى كارىۋاتقا يۆتكىدى . بۇ چاغدا ئاپامنى ۋە دادامنى چاقىرىپ قۇچاقلىدىم ھەم ئاپامغا دەپ ئىنىمغا تېلېفۇن قىلغۇزۇپ ئىنىم بىلەن پاراڭلاشتىم . نىمىلەرنى دېگىنىم تازا ئېسىمدە يوق . لېكىن جەھەننەمنىڭ ئىشىكى ئالدىغا بېرىپ قايتىپ كەلگەندەك تۇيغۇدا ئىدىم . ئوڭدامغا يېتىپ تورۇستىكى چىراقنى ساناپ بېقىشقا تىرىشقان بولساممۇ ، كۆزۈمگە ئۈچ ياكى تۆت كۆرۈنۈپ كېتىۋاتاتتى . بولدىلا دەپ ، كۆزۈمنى يۇمۇپ ياتتىم . كاللاممۇ شۇنچىلىك گاراڭ ئىدى . بىرەر نەرسىنى ئەسلەي دەپمۇ ئەسلىيەلمەيۋاتاتتىم . قاچانلاردا ئۇخلاپ قالغىنىمنى بىلمەيمەن . كۆزۈمنى ئاچسام دېرىزىدىن چۈشكەن يورۇق ياتاقنىڭ ئىچىنى يورۇتۇپ تۇرۇپتۇ . نېمىشقىكىن بۇ خىل مەنزىرىنى تۇنجى قېتىم كۆرۈۋاتقاندەك تۇيغۇدا بولۇپ قالدىم . ئۇنىڭغىچە دوستۇم مىنىڭ ئويغانغىنىمنى بىلىپ قېشىمغا كەلدى ۋە سۇ ئىچۈرۈپ قويدى . دوستۇمنىڭ ياردىمىدە يەرگە چۈشۈپ تازلىق ئۆيىگە چىقماقچى بولۇپ ماڭدىم . بېشىم يەنىلا قېيىپ تۇراتتى . دوستۇم يۆلىۋالمىغان بولسا يىقىلىپ قېلىشىم مۇمكىن ئىدى . تازلىق ئۆيىدىن قايتىپ كىرىپ ، دوستۇمنىڭ ياردىمىدە ئازراق بىر نەرسە يېدىم . ئۇنىڭ دېيىشىچە ئوپېراتسىيە 3 سائەت داۋاملىشىپتۇ . ناركوز پەقەت يېرىم سائەت ئەتراپىدا تۇتقان ئوخشايدۇ .
ئوپېراتسىيە جەريانىنى ئەسلىساملا تىنىم شۈركىنىپ كېتەتتى . ئۇزۇن يىڭنىلىك ناركوز ئوكۇلى ئۇرۇلغاندا ئەمدى ئاغرىقنى سەزمەيمەن دەپ ئويلىغان ئىدىم . نەدىكىنى ، ئۈچ سائەتلىك ئوپېراتسىيە جەريانىدا ناركوز يېرىم سائەت ئەتراپىدىلا تۇتتى . يېرىم سائەتتىن كىيىن يېشىلىپ كەتتىم ، قايتا ناركوز قىلغان بولسىمۇ ئۇزاق ئۆتمەيلا يېشىلىپ كەتتىم . ئۇنىڭ ئۈستىگە گۆشنى كەسكەندە تۇتقان ناركوز ، سۆڭەكنى تېشىپ چېتىق سالىدىغان چاغدا يېشىلىپ كەتكىنىنى دېمەيسىز . سۆڭەكنى تۇتۇپ ئۇيان بۇيان تولغان ، ئۈشكە بىلەن تەشكەن چاغدىكى ئاغرىقنى ئويلىسام ھازىرمۇ تىنىم شۈركىنىپ كېتىدۇ . يۈزۈم لاتا بىلەن يېپىلغان بولۇپ ئېڭىكىم بىلەن زاڭىقىملا ئوچۇق ئىدى . ئىچىمدە بىلىپ تۇرىمەن . ئېڭەك سۆڭىكىمنى بىر قول ئۇيان-بۇيان قىلىپ ، سۇنۇپ كەتكەن جاي بىلەن جىپسىلاشتۇرۋاتىدۇ . چېتىق سېلىپ مۇقىملاش ئۈچۈن ئۈچكە بىلەن تىشىۋاتىدۇ . ئاغرىق سەۋەبىدىن مۇسكۇللىرىم تاشتەك قېتىپ كەتكەن ئىدى . ھازىرلا جېنىم چىقىپ كېتىدىغاندەك چوڭ چوڭ تىناتتىم . يۈرىكىم ھازىرلا پارتلاپ كېتىدىغاندەك دۈكۈلدەپ سوقاتتى . قولۇم بىلەن كارىۋاتنىڭ قىرىنى تۇتۇپ ، سۇندۇرۋېتىدىغاندەك كۈچەيتتىم . پۇت قوللىرىم قېتىشىپ تۈپتۈز ھالەتكە كىرگەن ئىدىم . پۇرۇلداپ تەرلەيتتىم . دەھشەتلىك ئاغرىق سەۋەبىدىنمۇ ياكى شۇنداق تۇيغۇدا بولۇپ قالدىممۇ بىلمەيمەن . كۆز ئالدىمدىكى مەنزىرىلەر قىزىل رەڭدىن تۈس ئالغان ئىدى . بىر چاغدا ئاغرىق سەۋەبىدىن ھوشۇمنى يوقىتىپتىمەن .
بىر نەچچە كۈن قىزىتمام ئۆرلەپ بىئارامچىلىق ئىچىدە ئۆتتى . دوختۇرنىڭ تاپىلىغىنى بويىچە ، دوستۇم بەدەنلىرىمگە ھارماي ئىسپىرت سۈركەپ يۈرۈپ قىزىتماممۇ چۈشتى . ئەمدىكى كۈنلەر ياتاقتا يېتىپ ئۇكۇل سالدۇرغاچ ئارام ئېلىش بىلەن ئۆتتى . ئەكىرۋالغان ژۇرناللارنىمۇ ئوقۇپ تۈگەتتىم . 3~4 كۈن يېتىپ بېقىپ بەكلا زېرىكىپ كەتتىم . يېڭىدىن كىتاپ ئەكىرىپ ئوقۇي دېسەممۇ خوشياقمايۋاتاتتى . سىرتقا چىقىپ ئايلانغۇم ، تورغا چىقىپ سوقا – سالتاڭ پاراڭلارنى سالغۇم كېلەتتى . كۆپ كىشىلىك ياتاقتىن يالغۇز كىشىلىك ياتاققا چىقىۋالغاچقا دوستۇم ئىككىمىزلا يالغۇز قالغان ئىدۇق . دېيىشىدىغان گەپ ، قىلىدىغان خىياللارمۇ تۈگەپ ، سانايدىغانغا يا ۋاسا يوق ئىچىمىز سىقىلىپ ، قېچىپ چىقىپ تورخانىغا بېرىپ كەلمەكچى بولدۇق . دوختۇردىن تاماق يەپ كىرسەم بولامدۇ دەپ سورىسام يىراققا بارماڭ دېدى . ماقۇل دەپلا چىقىپ ئۇدۇل تورخانىغا كىردۇق . تورغا چىقىپ قارىسام نۇرغۇن يېڭىلىق بولۇپ كېتىپتۇ . بىر نەچچە كۈن دوختۇرخانىدا يېتىپ قالغانغا جېكسۇن ئۆلۈپ كېتىپتۇ يەنە شۇنىڭغا ئوخشاش مۇسىبەت پاراڭلىرىمۇ بولۇپ كېتىپتىكەن . شۇ ئولتۇرغانچە خېلى ئۇزاق ئولتۇرۇپ قالدۇق . كۆز باغلانغاندا تورخانىدىن چىقىپ ئايلىنىپ تاماق يەپ دوختۇرخانىغا كەلدۇق . ئەمدى نورمال ھالىتىمگە قايتىۋاتقاندەك قىلاتتىم .
دوختۇرخانىدىن چىقىپ ئۆيگە قايتىپ كەتتىم . ھەپتىدىن كىيىن ئاغىنەمنىڭ قېشىدا يۈزۈمدىكى يىپنى سۆكىۋەتتۇق . بىر ئايدىن كىيىن چىشىمغا سالغان سىمنى چىقىرىۋەتتۇق . ئىشلار يەنە بۇرۇنقىدەك داۋاملاشماقتا ئىدى ….

بۇ تېمىنىڭ بېشى بۇرۇن يېزىلغان بولۇپ ئادىرسى : http://www.izdinix.com/ShowPost.aspx?ThreadID=37283