«كۆچمەس مۈلۈكنى تىزىملاش ۋاقىتلىق نىزامى» 1-مارتتىن تارتىپ رەسمىي يولغا قويۇلدى. دۆلەت زېمىن بايلىقى مىنىستىرلىقىنىڭ يېقىندا ئاشكارىلىشىچە، كۆچمەس مۈلۈكنى تىزىملاش رەسمىي باشلانغاندىن بۇيان، پۈتۈن مەملىكەت دائىرىسىدىكى كۆچمەس مۈلۈكنى تىزىملاش خىزمىتى كەڭ دائىرىدە قانات يايدۇرۇلغان. بۇنىڭ ئىچىدە، سەنشى ئۆلكىسى، سىچۈەننىڭ چېڭدۇ شەھىرى قاتارلىق جايلار كۆچمەس مۈلۈكنى تىزىملاشنىڭ كونكرېت يولغا قويۇش لايىھەسىنى ئالدى بىلەن ئېلان قىلغان. كەسپىي ئەربابلار كۆچمەس مۈلۈكنى تىزىملاش خىزمىتى ئومۇميۈزلۈك باشلانغاندىن كېيىن، ئۆي مۈلۈك بازىرىنى ئۇزۇن يىل قىيناپ كەلگەن تەڭشەپ تىزگىنلەش تەس بولۇش مەسىلىسى سەل ياخشىلىنىدۇ دەپ قارىدى.
نوپۇزلۇق ئەربابلار مۇنداق دېدى: مۇشۇنداق بولغاندا، پۈتۈن مەملىكەتتە يۇقىرى تۆۋەنگىچە ئوخشىمىغان تارماقلارنىڭ كۆچمەس مۈلۈك ھوقۇقى ئۇچۇرلىرىدىن تەڭ بەھرىمەن بولۇش ۋەزىيىتى شەكىللىنىدۇ، كۆچمەس مۈلۈكنى تىزىملاش ساھەسىدە، ھۆكۈمەت تارماقلىرىنىڭ ئىش تەقسىماتىنى ماسلاشتۇرۇش، ئورتاق مۇلازىمەت قىلىش ياخشى ئەندىزىسى ئالدى بىلەن ئىشقا ئاشۇرۇلدى. يەنە دۆلەت زېمىن بايلىقى، جامائەت خەۋپسىزلىكى، خەلق ئىشلىرى، مالىيە قاتارلىق نۇرغۇن تارماقلار ئۇچۇردىن ئورتاق بەھرىمەن بولۇش ئارقىلىق، ئۇچۇرنى تۇتاشتۇرۇش ئالدىنقى شەرتى ئاستىدا، تۈرلۈك مەمۇرىي خىزمەتلەرنى ئۆز ئارا يۇقىرى ئۈنۈملۈك ئىشلەپ، ھۆكۈمەتنىڭ تەدبىر بەلگىلەش ۋە مۇلازىمەت سەۋىيەسىنى تەڭ ئۆستۈرگىلى بولىدۇ.