جاڭ چۈنشيەن جېجياڭ ئۆلكىلىك پارتىيە، ھۆكۈمەت ۋەكىللەر ئۆمىكىدىكىلەر بىلەن كۆرۈشتى

شىنجاڭ–جېجياڭ يېزا ئىگىلىك ئىستراتېگىيەلىك ھەمكارلىقنى ئومۇميۈزلۈك كۈچەيتىش رامكا كېلىشىمى ئىمزالىدى

ياۋ تۇڭ خەۋەر قىلىدۇ: ج ك پ مەركىزىي كومىتېتى سىياسىي بىيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى جاڭ چۈنشيەن 26 – ئاۋغۇست چۈشتىن كېيىن جېجياڭ ئۆلكىلىك پارتكومنىڭ مۇئاۋىن شۇجىسى ۋاڭ خۈيجۇڭ باشچىلىقىدىكى جېجياڭ ئۆلكىلىك پارتىيە، ھۆكۈمەت ۋەكىللەر ئۆمىكى بىلەن كۆرۈشتى.

جېجياڭ ئۆلكىلىك پارتىيە، ھۆكۈمەت ۋەكىللەر ئۆمىكى مەركەزنىڭ 2 – قېتىملىق شىنجاڭ خىزمىتى سۆھبەت يىغىنىنىڭ روھىنى ئىزچىللاشتۇرۇش ۋە ئەمەلىيلەشتۈرۈش، جېجياڭ ئۆلكىسىنىڭ شىنجاڭغا نىشانلىق ياردەم بېرىش خىزمىتىنىڭ ئىلگىرىلەش ئەھۋالىنى يەنىمۇ تەكشۈرۈش ۋە ئىگىلەش، نىشانلىق ياردەم بېرىلىۋاتقان ئورۇنلارنىڭ پىكىر – تەكلىپلىرىنى ئېلىش، شىنجاڭغا نىشانلىق ياردەم بېرىشكە كەلگەن كادىرلارنى يوقلاش ئۈچۈن، 23 – ئاۋغۇست شىنجاڭغا كەلگەن.

جاڭ چۈنشيەن مۇنداق دېدى: مەركەزنىڭ شىنجاڭ خىزمىتى سۆھبەت يىغىنى ئېچىلغاندىن بۇيان، شىنجاڭ بىلەن جېجياڭ بىر – بىرىنى ئىستراتېگىيەلىك تايانچ نۇقتا قىلىپ، ھەر تەرەپلىمە ھەمكارلىق ۋە ئەۋزەللىكلەردە بىر – بىرىنى تولۇقلاشنى قانات يايدۇرۇپ، شىنجاڭغا نىشانلىق ياردەم بېرىش خىزمىتىدە كۆرۈنەرلىك نەتىجىلەرنى قولغا كەلتۈرۈپ، شىنجاڭنىڭ تەرەققىياتى ئۈچۈن ئالاھىدە تۆھپە قوشتى. جېجياڭ ئۆلكىلىك پارتىيە، ھۆكۈمەت ۋەكىللەر ئۆمىكىنىڭ بۇ قېتىم شىنجاڭغا تەكشۈرۈپ – تەتقىق قىلىشقا كېلىشى شىنجاڭغا نىشانلىق ياردەم بېرىش خىزمىتىدە مۇھىم تۈرتكىلىك رول ئويناپلا قالماي، مەركەزنىڭ 2 – قېتىمىلىق شىنجاڭ خىزمىتى سۆھبەت يىغىنىنىڭ روھىنى ئەمەلىيلەشتۈرۈشتە قوللانغان ئەمەلىي ھەرىكىتىدۇر.

جاڭ چۈنشيەن مۇنداق دېدى: ئىشقا ئورۇنلاشتۇرۇش يەنىلا شىنجاڭنى تەرەققىي قىلدۇرۇش بىلەن خەلق تۇرمۇشىنى ياخشىلاشنى چەكلەپ تۇرۇۋاتقان نۇقتىلىق قىيىن مەسىلە. مەركەز شىنجاڭنىڭ توقۇمىچىلىق، كىيىم – كېچەك كەسپىنى تەرەققىي قىلدۇرۇش، كەسىپلەر تەرەققىياتى ئارقىلىق ئىشقا ئورۇنلىشىشقا تۈرتكە بولۇش ۋە ئۇنى ئىلگىرى سۈرۈشنى قوللاپ كېلىۋاتىدۇ، جېجياڭ ئۆلكىسى بۇنىڭغا پۈتۈن كۈچى بىلەن ماسلاشتى، جېجياڭدىكى خېلى كۆپ توقۇمىچىلىق، كىيىم – كېچەك كارخانىسى شىنجاڭدا ماكانلىشىپ، تۈرتكىلىك، باشلامچىلىق رولىنى جارى قىلدۇردى. شىنجاڭ بىلەن جېجياڭ يېزا ئىگىلىكىنى زامانىۋىلاشتۇرۇش، پەن – تېخنىكىغا تايىنىپ ساقچى كۈچلىرىنى كۈچەيتىش، ئاساسىي قاتلام تەشكىلاتلىرىنىڭ ئاممىغا مۇلازىمەت قىلىش ئىقتىدارىنى ئۆستۈرۈش، كەسىپنى يۈرۈشتۈرۈش قاتارلىق جەھەتلەردە غايەت زور ھەمكارلىق يوشۇرۇن كۈچىگە ئىگە. ئىككى جاينىڭ چۈشىنىش، ئالاقە ۋە ھەمكارلىقنى يەنىمۇ كۈچەيتىپ، ئەۋزەللىكلەر ئارقىلىق بىر – بىرىنى تولۇقلاپ، ھەمكارلىشىپ تەڭ پايدا ئېلىشىنى ئۈمىد قىلىمەن.

ۋاڭ خۈيجۇڭ مۇنداق دېدى: جېجياڭ ئۆلكىلىك پارتكوم، ئۆلكىلىك خەلق ھۆكۈمىتى شىنجاڭغا نىشانلىق ياردەم بېرىش خىزمىتىگە يۈكسەك ئەھمىيەت بېرىپ، كەسىپلەر بويىچە شىنجاڭغا نىشانلىق ياردەم بېرىش ئارقىلىق ئىشقا ئورۇنلىشىشقا تۈرتكە بولۇش، خەلق تۇرمۇشى بويىچە شىنجاڭغا نىشانلىق ياردەم بېرىش ئارقىلىق ئەلنى مايىل قىلىش، ئەقىل كۈچى بويىچە شىنجاڭغا نىشانلىق ياردەم بېرىش ئارقىلىق ئىختىساسلىقلارنى تەربىيەلەشنى ئىلگىرى سۈرۈش خىزمەت تەپەككۇرىنى نۇقتىلىق گەۋدىلەندۈردى. بىز جەزمەن ئىجتىمائىي مۇقىملىق ۋە ئەبەدىي ئەمىنلىكتىن ئىبارەت شىنجاڭ خىزمىتىنىڭ باش نىشانىنى زىچ چۆرىدەپ، شىنجاڭغا نىشانلىق ياردەم بېرىشتىكى خىزمەت ئورۇنلاشتۇرمىلىرىنى تەڭشەپ ھەم مۇكەممەللەشتۈرۈپ، جېجياڭنىڭ شىنجاڭغا نىشانلىق ياردەم بېرىش، 13 – بەش يىللىق، يىرىك پىلانىنى تېزدىن تۈزۈپ، ئاقسۇ ۋىلايىتىنىڭ ساقچى ئىشلىرىنى ئۇچۇرلاشتۇرۇش قۇرۇلۇشىنى پۈتۈن كۈچىمىز بىلەن قوللاپ، شىنجاڭنىڭ توقۇمىچىلىق سانائىتىنى راۋاجلاندۇرۇشنى مۇھىم نۇقتا قىلىپ، نىشانلىق ياردەم بېرىلىدىغان ئورۇننىڭ خېرىدار، مەبلەغ جەلپ قىلىشىغا يەنىمۇ ياخشى ماسلىشىپ، شىنجاڭغا نىشانلىق ياردەم بېرىش خىزمىتىنى پۈتۈن كۈچ بىلەن ياخشى ئىشلەپ، دۆلەتنىڭ يۈكىنى يېنىكلىتىپ، شىنجاڭغا تۆھپە قوشۇپ، جېجياڭ ئۈچۈن شەرەپ كەلتۈرىمىز.

كۆرۈشۈشكە نۇر بەكرى، چې جۈن، خەن يۇڭ، بەي جىجيې، ئەركىنجان تۇراخۇن، چيەن جى، كۇڭ شىڭلۇڭ، ما شۆجۈن قاتارلىقلار قاتناشتى.
مۇخبىرىمىز جاۋ جىيۈن خەۋەر قىلىدۇ: شىنجاڭ – جېجياڭنىڭ يېزا ئىگىلىك ئىستراتېگىيەلىك ھەمكارلىقىنى ئومۇميۈزلۈك كۈچەيتىش رامكا كېلىشىمىنى ئىمزالاش مۇراسىمى 26 – ئاۋغۇست ئۈرۈمچىدە ئۆتكۈزۈلدى.
رامكا كېلىشىمى بويىچە، 2015 – يىلىغا بارغاندا، شىنجاڭ بىلەن جېجياڭ نۇقتىلىق ساھەلەردە ھەمكارلىشىشتا كۆرۈنەرلىك بۆسۈش ھاسىل قىلىپ، ئەۋزەل كەسىپلەردە مەبلەغ، تېخنىكا، ئىختىساسلىقلار ھەمكارلىق سىستېمىسىنى دەسلەپكى قەدەمدە شەكىللەندۈرىدۇ، ئاقسۇنىڭ زامانىۋى يېزا ئىگىلىك ھەمكارلىقى بويىچە ئۈلگە كۆرسىتىش رايون رامكىسىنى دەسلەپكى قەدەمدە شەكىللەندۈرىدۇ، جېجياڭدىن كەلگەن كارخانىلارنىڭ شىنجاڭنىڭ يېزا ئىگىلىك ئىشلەپچىقىرىش، پىششىقلاش، ئوبوروت ساھەلىرىگە سالغان مەبلىغى يېڭىدىن 10 مىليارد يۈەن كۆپەيتىلىدۇ.
ئاپتونوم رايونلۇق پارتكومنىڭ مۇئاۋىن شۇجىسى خەن يۇڭ كېلىشىم ئىمزالاش مۇراسىمىغا قاتناشتى ھەم سۆز قىلدى.

ئىگىلىشىمچە، ئىككى جاينىڭ ھەمكارلىق مەزمۇنى: زامانىۋى يېزا ئىگىلىك ھەمكارلىقى بويىچە ئۈلگە كۆرسىتىش رايونى قۇرۇلۇشى، ئۆلكە، ئاپتونوم رايون ھالقىغان خام ماتېرىيال بازىسى قۇرۇلۇشى، ئىشلەپچىقىرىش بىلەن سېتىشنى جىپسىلاشتۇرۇش سىستېمىسى قۇرۇلۇشى، كەسىپلەرنى مەركەزلەشتۈرۈش قۇرۇلۇشى، يېزا ئىگىلىك مەھسۇلاتلىرى بازىرىنى ئېچىش، كۇرسلۇق مەھسۇلات ماركېتىڭى، تېخنىكا ۋە ئىختىساسلىقلار ھەمكارلىقى، مەبلەغ سېلىش ۋە يۈرۈشتۈرۈش ھەمكارلىقى، ھۆكۈمەتلەر ئارا ئالاقە ۋە ھەمكارلىق، ئىجتىمائىي تەشكىلاتلار ئارىسىدىكى ئالاقە ھەمكارلىقىنى ئۆز ئىچىگە ئالىدىكەن.
ئاپتونوم رايون رەھبەرلىرىدىن ئەركىنجان تۇراخۇن قاتارلىقلار كېلىشىم ئىمزالاش مۇراسىمىغا قاتناشتى.