ئۆز خەۋىرىمىز: بېيجىڭ غەربىي ۋوگزالىدىن ئۈرۈمچى جەنۇبىي ۋوگزالىغا قاراپ يولغا چىققان Z69-قېتىملىق يولۇچىلار پويىزىغا ئولتۇرغان 215 نەپەر ئىچكىرىدىكى شىنجاڭ تولۇق ئوتتۇرا سىنىپ ئوقۇغۇچىسى 10-ئىيۇن سائەت 18دىن 19 مىنۇت ئۆتكەندە ئۈرۈمچى جەنۇبىي ۋوگزالغا يېتىپ كەلدى.
يازلىق تەتىل يېقىنلىشىشىغا ئەگىشىپ، ئىچكىرىدىكى شىنجاڭ تولۇق ئوتتۇرا سىنىپىنىڭ ئوقۇغۇچىلىرى ئارقا-ئارقىدىن شىنجاڭغا قايتتى. 10-ئىيۇن ئەنخۇي، شېنياڭ، بېيجىڭ، تيەنجىن، خاربىن قاتارلىق جايلاردىن 865 ئوقۇغۇچى شىنجاڭغا يېتىپ كەلدى، بىر قىسىم ئوقۇغۇچىلار ئۈرۈمچى ۋوگزالىغا كەلگەندىن كېيىن، ئاقسۇ، قەشقەر، خوتەن قاتارلىق جايلارغا ماڭىدىغان پويىزغا ئالمىشىپلا يۇرتلىرىغا قايتتى.
«دەسلەپتە بارغان ۋاقتىمدا بېيجىڭ ماڭا ناھايىتى ناتونۇش بىلىنىپ، ئۆينى سېغىنىپ، ئۇ يەرگە كۆنەلمىگەنتىم، بىراق، ئوقۇتقۇچىمىزنىڭ بىزگە يېقىندىن كۆڭۈل بۆلۈشى، ھەر كۈنى بىزنى يوقلاپ كېلىپ، بىز بىلەن مۇڭدىشىشى، تۇرمۇش ۋە ئۆگىنىشتە بىزگە ياردەم بېرىشى بىلەن ئاستا-ئاستا ئۇ يەرگە كۆنۈپ قالدىم، مانا ئەمدى نۇرغۇن يىل ئوقۇغان ۋە ياشىغان يەرگە قىيمايۋاتىمەن» دېدى بېيجىڭ شەھىرى تۇڭجۇ رايونىدىكى لۇخې ئوتتۇرا مەكتىپىدە ئۈچ يىل ئوقۇپ، تولۇق ئوتتۇرىنى پۈتكۈزگەن سەلىمە.
ئىگىلىنىشىچە، بۇ يىل ئىچكىرىدىكى شىنجاڭ تولۇق ئوتتۇرا سىنىپ ئوقۇغۇچىلىرىنى توشۇش خىزمىتى ئىيۇننىڭ باشلىرىدىن سېنتەبىرنىڭ ئوتتۇرىلىرىغىچە ئېلىپ بېرىلىدىغان بولۇپ، 130 مىڭ (قېتىم) غا يېقىن ئوقۇغۇچى توشۇلۇپ، يېقىنقى يىللاردىن بۇيانقى ئوقۇغۇچى ئەڭ كۆپ توشۇلغان بىر يىل بولۇپ قالىدىكەن.