ئامېرىكىدىن كېيىن، ياۋروپا ئەللىرى ئىتتىپاقى بىلەن ياپونىيە رۇسىيەنى يېڭى بىر نۆۋەتلىك جازالاشنى ئارقا-ئارقىدىن جاكارلىدى. كىرىمل سارىيى ئوباما ھۆكۈمىتى بىلەن بولغان يۇقىرى دەرىجىلىك ئالاقىسنى ئۈزدى.
ياۋروپا ئەللىرى ئىتتىپاقى 28-ئاپرېل مۇنۇلارنى جاكارلىدى: ئۇكرائىنانىڭ ئىگىلىك ھوقۇقىغا بۇزغۇنچىلىق قىلغانلارنى جازالاش تىزىملىكىگە 15 ئادەم قوشۇلدى، ياۋروپا ئەللىرى ئىتتىپاقىغا ئەزا دۆلەتلەر ئۇلارغا ۋىزا بېرىشنى چەكلەيدۇ ھەمدە ئۇلارنىڭ ياۋروپا ئەللىرى ئىتتىپاقىدىكى مۈلۈكىنى توڭلىتىدۇ.
رۇسىيە ئاخبارات تورى 29-ئاپرېل خەۋەر ئېلان قىلىپ مۇنداق دېدى: ياپونىيە ھۆكۈمىتى ئۇكرائىنا ۋەزىيىتى سەۋەبىدىن 23 رۇسىيە ئەمەلدارىنى ۋىزا جەھەتتىن جازالايدىغانلىقىنى جاكارلىدى. ياپونىيە NHK تېلېۋىزىيە ئىستانسىسى ياپونىيەنىڭ تاشقى ئىشلار ۋەزىرىنىڭ سۆزىنى نەقىل كەلتۈرۈپ مۇنداق دېدى: ياپونىيە رۇسىيەنىڭ ئۇكرائىنانىڭ ئىگىلىك ھوقۇقىغا بۇزغۇنچىلىق قىلىشقا قاتنىشىشى مۇمكىن بولغان 23 ھۆكۈمەت ئەمەلدارىنى جازالايدۇ، ئۇلارنىڭ ياپونىيەگە كىرىشىنى چەكلەيمىز. ئامېرىكا رۇسىيەنى يېڭى بىر نۆۋەت جازالايدىغانلىقىنى بىلدۈرگەندىن كېيىن، كىرىمل سارىيى ئامېرىكا بىلەن رۇسىيە ئوتتۇرىسىدىكى يۇقىرى دەرىجىلىكلەر سۆزلىشىش ئىشىكىنى تاقىدى.
قىرىم كىرزىسىدىن بۇيان، زۇڭتۇڭ پۇتىن بىلەن ئامېرىكا زۇڭتۇڭى ئوباما قەرەللىك تېلفوندا سۆزلىشىپ تۇردى. ئامېرىكا بىلەن ياۋروپا ئەللىرى ئىتتىپاقى رۇسىيەنى يېڭى بىر نۆۋەتلىك جازالاشنى جاكارلىغان پەيتتە، پۇتىن بۇ خىل ئۆز-ئارا تەسىر كۆرسىتىشكە خاتىمە بېرىش كېرەكلىكىنى قارار قىلدى. رۇسىيە رەھبەرلىك قاتلىمىغا يېقىن دىپلوماتىيە ئەمەلدارلىرى ۋە مۇناسىۋەتلىك ئۇچۇرلارغا قارىغاندا، ھازىر كىرىمل سارىيى ئوباما ھۆكۈمىتى بىلەن يۇقىرى دەرىجىلىكلەر ئالاقىسىنى توختاتقان.

رۇسىيە دىپلوماتىيە مىنستىرلىقى تور بېكىتى 29-ئاپرېل مۇنداق دېدى: ياۋروپا ئەللىرى ئىتتىپاقى كىيۋ دائىرىلىرىنى ئۇكرائىنانىڭ شەرقى جەنۇبىدىكىلەر بىلەن بىرگە دۆلەتنىڭ كەلگۈسى تۈزۈمى توغرىسىدا سۆھبەتلىشىشكە مەجبۇرلاش كېرەك. ياۋروپا ئەللىرى ئىتتىپاقى ۋاشىنگتوننىڭ بۇيرۇقىغا بويسۇنۇپ رۇسىيەگە يېڭىدىن دوستانە بولمىغان پوزتسىيە قوللاندى. ياۋروپا ئەللىرى ئىتتىپاقى يېڭىدىن ماقۇللىغان جازالاش تەدبىرى رۇسىيەنىڭ قايتۇرما ئىنكاسىنى قوزغىماي قالمايدۇ.
رۇسىيە بىلەن ئامېرىكا مۇناسىۋىتى يامانلىشىۋاتقان ئەھۋالدا، موسكۋانىڭ لاتىن ئامېرىكىسىدىكى ئىتتىپاقداشلىرىنىڭ رولى تېز ئۆستى. كۇبا ئالاھىدە دىققەت قىلدى. 2-ئاينىڭ ئاخىرى دۆلەت مۇداپىئە مىنىستىرى شايىگۈ مۇنداق دېگەنىدى: رۇسىيە چەتئەللەردىكى ھەربىي بازىسىنى كۆپەيتىش ئۈچۈن كۇبا، ۋېنېسۇئېلا ۋە نكاراگۇئانى ئۆز ئىچىگە ئالغان بىر قىسىم دۆلەتلەر بىلەن سۆھبەتلەشمەكتە. كېيىن موسكۋا چۈشەندۈرۈپ مۇنداق دېدى: بۇ يەردىكى بازا ئامېرىكىچە ھەقىقىي بازا بولماستىن بەلكى دېڭىز ئارمىيەسىنىڭ ماددىي ئەشيا تەمىناتى ۋە رېمونت پونكىتىنى كۆرسىتىدۇ. شۇنداق دېيىشكە بولىدۇكى، ئامېرىكا رۇسىيەنىڭ بۇ رايوندىكى ھەر قانداق ھەربىي مەۋجۇدلۇقىنى نەيزە دەپ قارايدۇ. ئۇكرائىنا كىرزىسى يۇقىرى پەللىگە چىققاندا، رۇسىيەنىڭ بىر رازۋېدكا پاراخوتى ھاۋانادىكى بىر پورتتا پەيدا بولدى، ۋاشىنگتوننىڭ بۇنىڭغا بولغان ئالاھىدە ئىنكاسى بۇ نۇقتىنى ئىسپاتلايدۇ.