قەشقەر شەھىرىدىكى ھەر قايسى ئوتتۇرا مەكتەپلەرنىڭ ئوقۇتۇشقا مەسئۇل مۇدىرلىرى، تىل-ئەدەبىيات دەرسى ئوقۇتقۇچىلىرى، قەشقەر ئۇنىۋېرسىتېتى ۋە ۋىلايەتكە بىۋاستە قاراشلىق ھەر قايسى ئوتتۇرا مەكتەپلەرنىڭ ئەدەبىيات ئوقۇتقۇچىلىرى ۋە بىر قىسىم ئەدەبىيات تەتقىقاتچىلىرىدىن بولۇپ 200دىن ئارتۇق ئادەم  29-دېكابىر شىنجېن-قەشقەر 2-تولۇق ئوتتۇرا مەكتىپىگە جەم بولۇپ، تۇنجى نۆۋەتىك ئوتتۇرا مەكتەپ تىل-ئەدەبىيات دەرسلىك ئوقۇتۇشى تەتقىقاتى ئىلمىي مۇھاكىمە يىغىنى ئۆتكۈزدى.    شىنجىن-قەشقەر 2-تولۇق تولۇق ئوتتۇرا مەكتىپى تەشكىللىگەن، شىنجىن-قەشقەر 1-تولۇق ئوتتۇرا مەكتىپى ۋە قەشقەر شەھەرلىك ئالاھىدە رايون تولۇق ئوتتۇرا مەكتىپى ھەمكارلاشقان بۇ قېتىمقى مۇھاكىمە يىغىنىدا ھەر قايسى ئوتتۇرا مەكتەپلەردىن كەلگەن سەككىز نەپەر تىل-ئەدەبىيات ئوقۇتقۇچىسى ئۆزى يازغان تېمىسى رەڭدار، ئىلمىي تەتقىقات قىممىتى بىر قەدەر يۇقىرى بولغان «ساياھەت ئەدەبىياتى ئەسەرلىرىنى ئوقۇتۇش ھەققىدە»، «ئۇيغۇر كىلاسسىك ئەدەبىياتى ئەسەرلىرىنى ئوقۇتۇشتا نېمىلەرگە دىققەت قىلىش كېرەك»، «ھازىرقى زامان ئۇيغۇر تىلىدىكى كىرمە سۆزلەرنى پەرقلەندۈرۈش ئۇسۇلى توغرىسىدا»، «پىروزا ئەسەرلىرىدىكى ‹چاسا› پىرسۇناژ ۋە ‹يۇمىلاق› پىرسۇناژ توغرىسىدا» قاتارلىق ماقالىلىرىنى كۆپچىلىكنىڭ ھوزۇرىغا سۇندى.

    قەشقەر ئۇنىۋېرسىتىتىنىڭ پىروفېسسورى، ماگىستىر ئاسپىرانت يېتەكچى ، ئەدەبىيات نەزەرىيەسى تەتقىقاتچىسى كېرىمجان ئابدۇرېھىم قاتارلىقلار بۇ قېتىمقى ئىلمىي مۇھاكىمە يىغىنىغا يۇقىرى باھا بەردى ۋە بىر قىسىم تەكلىپ-پىكىرلىرىنى ئوتتۇرىغا قويدى.