جاھان ئاگېنتلىقى 24-ئاۋغۇست خەۋىرى؛ لەگلەك تورى تەرجىمىسى: پەلەستىننىڭ غەربى قىرغاق ۋە غەززە رايۇنىدىكى باشلانغۇچ ۋە تولۇقسىز ئوتتۇرا مەكتەپلەردە 1 مىليون 200 مىڭ ئوقۇغۇچى بۈگۈن يېڭى ئوقۇش يىلىدا دەرس باشلىدى. مائارىپ مىنىستىرلىكى تەرىپىدىن ئېلان قىلىنغان باياناتتا، غەربى قىرغاق رايۇنىدا 700 مىڭ ئوقۇغۇچى، غەززە رايۇنىدا 500 مىڭ ئوقۇغۇچى بۈگۈن رەسمى ئوقۇش باشلىدى. باياناتتا كۆرسىتىلىشىچە، بۇ ئوقۇغۇچىلاردىن 792 مىڭ نەپىرى ھۆكۈمەتكە قاراشلىق مەكتەپلەردە، 295 مىڭ نەپىرى «مۇساپىرلار ياردەم ئورگىنى» غا قاراشلىق مەكتەپلەردە، 113 مىڭ نەپىرى بولسا شەخسى مەكتەپلەردە ئوقۇيدىكەن.
پەلەستىن باش مىنىستىرى رامى ئەل-ھامداللاھ بىلەن مائارىپ مىنىستىرى سابرى سايدام 1 مىليون 200 مىڭ ئوقۇغۇچى ئوقۇش باشلىغان تۇنجى كۈندە شەرقى قۇددۇس ۋە ئەل-خەلىل رايۇنىدىكى ۋەيران بولۇش گىردابىغا بېرىپ قالغان 2 مەكتەپنى زىيارەت قىلدى.