شىنخۇا تورى يىنچۈەن 29-يانۋار تېلېگراممىسى : 29–يانۋار سائەت 00 :14 ئەتىراپىدا ، نىڭشيانىڭ گۇيۈەن شەھىرى شىجى ناھىيەسىدە پەۋقۇلئاددە زور قاتناش ۋەقەسى يۈز بېرىپ ، توققۇز ئادەم نەق مەيداندا قازا قىلغان ، ئىككى ئادەم دوختۇرخانىغا ئېلىپ بېرىلىپ جىددىي قۇتقۇزۇلغان بولسىمۇ ، بىراق قۇتقۇزۇش ئۈنۈم بەرمەي قازا قىلغان ، 22 ئادەم يارىلانغان .
ئىگىلىنىشىچە ، بۇ نومۇر تاختىسى Ｄ０６８９５ بولغان ئوتتۇرا تىپتىكى ئادەتتىكى يولۇچىلار ئارىبۇسىغا 33 ئادەم سىغىدىغان بولۇپ ، بۇ ئاپتوبۇس شىجى ناھىيەسىدىن خۇڭياۋ يېزىسىغا قاراپ يولغا چىققان . ئارىبۇس يولغا چىقىپ خۇڭياۋ يېزىسىغا 71 كېلومېتىر قالغاندا ، قار يېغىپ مۇز تۇتۇپ كەتكەن يولدا كونتروللىقىنى يوقىتىپ 10 مېتىر چوڭقۇرلۇقتىكى جىلغىغا چۈشۈپ كەتكەن .
شىجى ناھىيەلىك ئوت ئۆچۈرۈش ئەترىتى ۋەقە مەلۇماتىنى تاپشۇرۇۋالغاندىن كېيىن ، ئەترەتتىكى 12 نەپەر قۇتقۇزغۇچى خادىم نەق مەيدانغا يىتىپ بېرىپ ، ئارىبۇسنىڭ سىرتقى قىسمىنى كېسىش ، پارچىلاش قاتارلىق ئۇسۇللار ئارقىلىق ئارىبۇس ئىچىگە قاپسىلىپ قالغان كىشىلەرنى قۇتقۇزۇپ چىققان .
ۋەقە يۈز بېرىپ سائەت 20 گىچە ، نەق مەيداندا قازا قىلغان توققۇز كىشىنىڭ جەسىتىنى ئائىلە ــ تاۋاباتلىرى ئېلىپ كەتكەن بولۇپ ، يارىدارلارنى قۇتقۇزۇش ۋە قازا قىلغانلارنىڭ ئاخىرەتلىك ئىشلىرىنى بىر تەرەپ قىلىش خىزمىتىمۇ تەڭ قەدەمدە ئېلىپ بېرىلىۋېتىپتۇ .
نۆۋەتتە ، ۋەقەنىڭ سەۋەبى يەنىمۇ ئىلگىرلىگەن ھالدا تەكشۈرۈلۈۋېتىپتۇ .
