ئانار ئېلانى
(ساتېرا)
ئابدۇغېنى سېيىت
كۆلىمى كەڭ باراقسان جان راھېتى ھاۋالىق ،
باغلار ئارا ئاي، چولپان ئارامگاھى خۇمارلىق ،
‹‹ئابېھايات رىستۇرانى›› مەي – شارابى داۋالىق ،
نەچچە ئايرىم خانە بار ، شۇنچە يۇمشاق ساپالىق ،
سېتىلىدۇ ئالامسىز ئىلىكىمدىكى ئانارلىق ،
سۆيۈنگۈدەك ئانار بۇ مېۋىلەرنىڭ شاھى دەپ ،
سەرخىللقتا يېگانە كۆكتىكى ئاي – ماھى دەپ ،
تىبابەتتە شەربىتى شەربەتلەرگە داھى دەپ ،
شىپاسىدىن ئوڭشىلار تالاي بىمار ئاھى دەپ ،
ئېلىپ كېتەر تېۋىپلار خوتەن ، قەشقەر ، شايارلىق ،
خسلىتى جىق ئانار بۇ بىلىۋىلىڭ، بىلمەسلەر ،
يايرىۋىلىڭ بەھرىدە كۈلىۋىلىڭ كۈلمەسلەر ،
يېسىڭىزلا ئۇرغۇيدۇ سىزدە ‹‹مۇتقا ھەۋەس›› لەر ،
ئاقنى قارا دەۋىرىڭ ، گېلى ناپاك ئۆلمەسلەر ،
قىلىنمىغاي سۈرۈشتە( سىزدىن نوقسان ، خاتالىق ،)
بۇ تەۋەرۈك ئانارىم سەزگۈر قىلار كالۋانى ،
قىلار زىبا ، غۇنچە بوي باداڭ قوساق سالۋانى ،
شۇ ۋەجى مەن ‹‹خۇشامەت›› ئانار يۆتكەش چولپانى ،
مەن پەيزىنى سۈرىمەن تارتسا ،ئۆزگە جاپانى ،
ئىش ھەل قىلىش ئاناردا بولغاچ ماڭا قولايلىق ،
سىزگە ئىما گېپى بار ، ئانار پىچقان لىگەننىڭ ،
ئىرادىسى ئىگىلەر بۇ ئانارنى يېگەننىڭ ،
‹‹ھەممسى راسىت ئەلۋەتتە، ھە، ئۆزلىرى دېگەننىڭ ››
ئەدىۋىنى بىرەيچۇ ، ئەشۇ ھارام يېگەننىڭ ،
دىگۈزۈشكە باشلىقنى بولار ئاسان – قولايلىق ،
بۇ ئانارنى يېگەننىڭ ياغ تولىدۇ كۆزىگە ،
تىرە ئۆسەر بىر غېرىچ قىلىنلىقتا يۈزىگە ،
ئاقنى قارا دېگىلى ئۇدۇم ئالار ئۆزىگە ،
تولار ھەيۋە ھەم تەھدىت …يىغىنلاردا سۆزىگە ،
كۆشەندەڭنى يىغلىتار قىلىپ ‹‹ئېغىر گۇناھ›› لىق ،
چىقىشالماس ئۆچ قىلار شۇنچە يېقىن دوسلارنى ،
قىزىتىپ ھەم قېنىڭنى ئۇلغايتىدۇ ماجرانى ،
دۈشمەن قىلار تاھىرغا ۋاپادارى زوھرانى،
تۇتۇلغۇسى بىرنى بەش دىيەلمەسنىڭ زۇۋانى ،
ئۇنى گەپتە چاندۇرار كۆرسۈتۈپ ھەم نا-لايىق ،
ئۇشبۇ ئانار ئۈگۈتەر سىزگە سېھرى قىلىقىنى ،
ئومۇرتقىسىز بولىسىز دوراپ يىلان بېلىقنى ،
ئۆگۈتىدۇ سېلىشنى خەققە ئالۋان – سېلىقنى ،
ئۆتەلەيسىز ئاتلاپلا قېيىن ئۆتكەل ، ئېرىقنى ،
روھىڭىزنى ئۇرغۇتار بولۇپ ماغدۇر داۋالىق ،
ئانارلىق باغ ئارىسى پىياز ، قوغۇن ، تاۋۇزلۇق ،
ئەي ئوغۇتقا قوشۇلغان شەخسى غەرەز ، ياۋۇزلۇق ،
نەپ يۇقماسلا يەپ قالسا تەرىم بولار سەت – مۇزلۇق ،
كىم رەت قىلسا گىپىمنى دەيمەن ئۇنى يولسىزلىق ،
مېھمانلىرىم ئۈزۈلمەس تولۇپ ئايۋان – ساراي لىق ،
ۋېۋىسكا يوق بىغىمدا – باراقسانلىق ئىچىدە ،
گويا پانۇس ئانارلار كەلسىڭىزمۇ كېچىدە ،
ئەڭ ياخشىسى مەن باراي ئۆيىڭىزگە غىپپىدە ،
ئىش توغىرلاپ قايتايچۇ شەرەتلىشپ شىپپىدە ،
سوۋغات ئانار شەربىتى ، شاراپ قىممەت باھالىق ،
بېغىم كەڭ كى سوزۇلغان يۇرت بېشىدىن ئاياققا ،
شۇنچە بولۇق – بەركەتلىك تېمسال ئالتۇن تاۋاققا ،
كېرپ ئانار شارابى جىق رىستۇران ، قاۋاققا ،
سەۋەپ بولدى جىق خوتۇن ئەردىن جۇدا- تالاققا ،
كېسەل قىلدى ساق باشنى قېچىپ ھايا ، ۋاپالىق ،
ئىشنى بۇزۇپ مەندەكلەر ، قويۇپ ئانار رەنىگە ،
سۇۋاپ قارا ئانارنىڭ خاسىيتى – شەنىگە ،
ۋاستە بولدى نەچچىگە ھاقارەتكە ، تەنىگە ،
كىرگىنىمچە يانالماي مەن پەس ھەۋەس كەينىگە ،
پۇقرا – ئاۋام ئالدىدا بولدۇم پەسكەش ، گۇناھلىق ،
مېۋىسىنى ئالامسىز ، يا تۈپ ساناپ باغ بىلەن ،
ئالسىڭىزلا چاينايسىز كۈندە لوق گوش ياغ بىلەن،
بېيىپ ، ئۆسۈپ تاۋىڭىز بولغۇسى تەڭ تاغ بىلەن ،
ئۆلپەتلىشىپ ئۆتىسىز خۇشال ئىشرەت – چاغ بىلەن ،
شۇنچە كەڭرى ئارامگاھ ، چۆرىسى چىت – قاشالىق ،
پارا بەرمەك ئاناردا مودا بوپتۇ ئاڭلىسام ،
كاۋاپ ، نەق پۇل ، گىلەم ‹‹توڭ غورا›› بوپتۇ ئاڭلىسام،
ئانار ھاراق تەۋەرۈك دورا بوپتۇ ئاڭلىسام ،
بېغىم ئەمەس، ۋۇجۇدۇم شورا بوپتۇ ئاڭلىسام ،
بىلىپ بۇنى تۇتىيا ….گويا كى كۆز تۇمارلىق ،
كېلىڭ ۋاقىت تاللىماي مەندىن ئانار ئالغىلى ،
‹‹سانتانا ، جېئىف ›› ئىپ كېلىڭ خوشامەتنى سالغىلى ،
‹‹ئايرىم خانە ›› تەقلەگلىك ، ئىچىپ دۇتار چالغىلى ،
ھېچ نىمەم يوق( تارتىنماڭ) سىزدىن ئاياپ قالغىلى ،
ئاشۇ ھويلا مېنىڭ كى باراقسانلىق ، چىنارلىق ،
2002-يىلى 28- مارت . خوتەن
- يازما سانى: 502 پارچە
- باھا سانى: 44 پارچە
- تۈر سانى: 6 پارچە
- خەتكۈش سانى: 24 پارچە
- قۇرۇلغان ۋاقىت:
- تور بېكەت ئېچىلغىلى 16286 كۈن بولدى
- يېڭىلانغان ۋاقتى: 2014-07-28
ناھايىتى ياخشى بوپتۇ؟