ئامېرىكىلىق ئالىملارنىڭ بىر تۈرلۈك يېڭى تەتقىقاتىدىن مەلۇم بولۇشىچە، نەپەسلىنىش ئەزاسى بولغان ئۆپكىنىڭ ھازىرغىچە كىشىلەرگە مەلۇم بولمىغان يەنە بىر خىل ئىقتىدارى، يەنى قان ئىشلەش ئىقتىدارى بار ئىكەن. تەتقىقاتچىلار «قوش فوتون تىرىك جانلىق تەسۋىر ھاسىل قىلىش تېخنىكىسى» دەپ ئاتىلىدىغان تېخنىكىدىن پايدىلىنىپ، تىرىك چاشقاننىڭ ئۆپكە قىل قان تومۇرلىرىدىكى يەككە ھۈجەيرە ھەرىكىتىنى كۆزىتىش ئارقىلىق، ئۆپكە قان تومۇرلىرى ئىچىدە كۆپ مىقداردىكى چوڭ يادرولۇق ھۈجەيرىلەر بارلىقىنى بايقىغان. چوڭ يادرولۇق ھۈجەيرىلەر قان پىلاستىنكىسى ئىشلەشكە مەسئۇل. گەرچە ئىلگىرى ئۆپكىدە بۇ خىل ھۈجەيرىلەر بايقالغان بولسىمۇ، ئادەتتە ئۇلار ئاساسلىقى يىلىكتە مەۋجۇت بولىدۇ، دەپ قارىلاتتى. چاشقاننىڭ ئۆپكە قان تومۇرلىرىدىكى چوڭ يادرولۇق ھۈجەيرىلەر ھەر سائەتتە تەخمىنەن 10 مىليوندىن كۆپ قان پىلاستىنكىسى ئىشلەپچىقىرىدىكەن، يەنى چاشقان قېنىدىكى قان پىلاستىنكىلىرىنىڭ يېرىمىدىن كۆپرەكى ئۆپكىدە ھاسىل بولىدىكەن. تەتقىقاتلاردىن بايقىلىشىچە، ئۆپكىدە يەنە كۆپ مىقداردا قان ياسىغۇچى غول ھۈجەيرە ۋە ئەجداد ھۈجەيرە ساقلانغان بولۇپ، زەخىملەنگەن يىلىكلەرنىڭ قان ئىشلەش ئىقتىدارىنى ئەسلىگە كەلتۈرىدىكەن. بۇ بايقاش قان پىلاستىنكىسى ئازىيىش كېسىلىنى داۋالاشقا نىسبەتەن ناھايىتى مۇھىم ئەھمىيەتكە ئىگە. ئۇ يىلىك ۋە ئۆپكىنىڭ قان ياسىغۇچى ھۈجەيرىلەرنى قانداق ئالماشتۇرۇپ قان ئىشلەش سىستېمىسىنىڭ ساغلاملىقىنى كاپالەتكە ئىگە قىلىش تەتقىقاتىنى يېڭى يۆنىلىش بىلەن تەمىنلىدى.