شى شىن خەۋەر قىلىدۇ: ئاپتونوم رايون «13- بەش يىل»دا 125 مىڭ مېيىپكە ھەقسىز ماھارەت ئۆگىتىدۇ.

يېقىندا ئاپتونوم رايونلۇق مېيىپلار بىرلەشمىسى، تەرەققىيات ۋە ئىسلاھات كومىتېتى، خەلق ئىشلىرى نازارىتى قاتارلىق سەككىز تارماق بىرلىكتە «شىنجاڭ ئۇيغۇر ئاپتونوم رايونىنىڭ مېيىپلارنىڭ ئىشقا ئورۇنلىشىشىنى ئىلگىرى سۈرۈش (13- بەش يىللىق) پىلانىنى يولغا قويۇش لايىھەسى»نى بېسىپ تارقاتتى. ئاپتونوم رايونىمىز ھەر دەرىجىلىك خەلق ھۆكۈمەتلىرى ئارقىلىق ئىشقا ئورۇنلىشىش ئارزۇسى ۋە ئىقتىدارى بار مېيىپلارنى كەسپىي ماھارەت بويىچە تەربىيەلەش، ئىش ئورنى ماھارىتىنى ئۆستۈرۈش بويىچە تەربىيەلەش، ئىگىلىك تىكلەش بويىچە تەربىيەلەش جەھەتلەردىكى مۇلازىمەتنى قانات يايدۇرۇپ، كەسپىي، ئالاھىدە مائارىپ مەكتەپلىرى، تەربىيەلەش بازىسى ۋە كارخانا قاتارلىق تۈرلۈك تەربىيەلەش بايلىقىدىن بىر تۇتاش پايدىلىنىپ، مېيىپلارنى تۈرگە ئايرىپ تەربىيەلەشنى كۈچەيتىدۇ. بۇنىڭ ئىچىدە، يېزىلاردىكى 75 مىڭ نامرات مېيىپنى ئەمەلىي تېخنىكا بويىچە ھەقسىز تەربىيەلەشكە تەشكىللەيدۇ؛ شەھەر- بازارلاردىكى 50 مىڭ مېيىپنى كەسپىي ماھارەت بويىچە ھەقسىز تەربىيەلەيدۇ، يېڭىدىن كۆپەيگەن 30 مىڭ مېيىپنى ئىشقا ئورۇنلاشتۇرىدۇ.