لى پېڭشىن مەملىكەتلىك ج خ سىستېمىسىدىكى قەھرىمان- نەمۇنىچىلار، خىزمەت كۆرسەتكەن كوللېكتىپلارنىڭ ئىلغار ئىش- ئىزلىرىدىن دوكلات بېرىش ئۆمىكىدىكىلەر بىلەن كۆرۈشتى

 يۈەن لېي خەۋەر قىلىدۇ: ئاپتونوم رايونلۇق پارتكومنىڭ مۇئاۋىن شۇجىسى، مائارىپ خىزمىتى كومىتېتىنىڭ شۇجىسى لى پېڭشىن 6-ئاينىڭ 2-كۈنى چۈشتىن كېيىن ئۈرۈمچىدە مەملىكەتلىك ج خ سىستېمىسىدىكى قەھرىمان-نەمۇنىچىلار، خىزمەت كۆرسەتكەن كوللېكتىپلارنىڭ ئىلغار ئىش-ئىزلىرىدىن دوكلات بېرىش ئۆمىكىدىكىلەر بىلەن كۆرۈشتى.

لى پېڭشىن مۇنداق كۆرسەتتى: ج خ قوشۇنى دەۋر روھى ئۇرغۇپ تۇرىدىغان، قەھرىمانلار كۆپلەپ مەيدانغا كېلىدىغان، ساغلام كەيپىياتقا، ئۇلۇغۋار روھقا ئىگە قوشۇن، سىلەرگە ئوخشاش خالىسانە تۆھپە قوشىدىغان ۋە خەۋپ- خەتەردىن قورقمايدىغانلار بولغاچقا، جەمئىيەت تىنچ بولۇپ، خەلق بەختىيار ياشىماقتا. ئۇزاقتىن بۇيان تېررورلۇققا قارشى تۇرۇش، مۇقىملىقنى قوغداشتىن ئىبارەت كەسكىن ھەم مۇرەككەپ ۋەزىيەتكە قارىتا، شىنجاڭدىكى ج خ خەلق ساقچىلىرى بۇرچىنى باشتىن- ئاخىر ئېسىدە چىڭ ساقلاپ، ۋەزىپىسىنى ساداقەتمەنلىك بىلەن ئادا قىلىپ، ئائىلىسىنى ئۇنتۇپ، ئومۇمنىڭ غېمىنى يەپ، شىنجاڭنىڭ ئىجتىمائىي ئومۇمىيىتىنىڭ ئىناقلىقى، مۇقىملىقىغا گەۋدىلىك تۆھپە قوشتى.

بۇ قېتىم دوكلات بېرىش ئۆمىكىنىڭ شىنجاڭغا كېلىپ، ج خ سىستېمىسىدىكى قەھرىمان- نەمۇنىچىلارنىڭ ئىلغار ئىش- ئىزلىرىنى كەڭ تەشۋىق قىلىشى شىنجاڭ ج خ قوشۇنىدىكىلەرنىڭ غايە- ئېتىقادىنى يەنىمۇ چىڭىتىشىغا، شىنجاڭدىكى ج خ خەلق ساقچىلىرىنىڭ مەركەزنىڭ شىنجاڭنى ئىدارە قىلىش ئومۇمىي تەدبىرىنى قەتئىي ئەمەلىيلەشتۈرۈشىگە، بولۇپمۇ ئىجتىمائىي مۇقىملىق ۋە ئەبەدىي ئەمىنلىك باش نىشانىغا يېتىش ئۈچۈن قۇربان بېرىشتىن قورقماي، مەسئۇلىيەتنى دادىل زىممىسىگە ئېلىپ، ئاتاكىغا ئۆتۈپ، باتۇرلارچە ئىلگىرىلەپ، پارتىيە 19-قۇرۇلتىيىنىڭ غەلىبىلىك ئېچىلىشىنى ئەلا نەتىجىلەر بىلەن كۈتۈۋېلىشىغا تۈرتكە بولىدۇ ۋە مەدەت بېرىدۇ.

مەملىكەتلىك ج خ سىستېمىسىدىكى قەھرىمان-نەمۇنىچىلار، خىزمەت كۆرسەتكەن كوللېكتىپلارنىڭ ئىلغار ئىش- ئىزلىرىدىن دوكلات بېرىش ئۆمىكىنىڭ باشلىقى، ج خ مىنىستىرلىقىغا بىۋاسىتە قاراشلىق ئورگان پارتكومىنىڭ كۆزەتكۈچىسى ۋاڭ نەيفېڭ مۇنداق دېدى: دوكلات بېرىش ئۆمىكى بۇ قېتىم شىنجاڭدا ئىككى مەيدان دوكلات بېرىپ، قەھرىمان- نەمۇنىچىلارنىڭ تەسىرلىك ئىش- ئىزلىرى ۋە كىشىلەرگە ئىلھام، مەدەت بېرىدىغان روھىنى شىنجاڭدىكى كەڭ ج خ خەلق ساقچىلىرى ۋە ھەر مىللەت ئاممىغا يەتكۈزىدۇ، ج خ سىستېمىسىدىكى قەھرىمان- نەمۇنىچىلارنىڭ روھىنى ئەۋج ئالدۇرۇپ، ئاكتىپ كۈچ تارقىتىدۇ.

ئاپتونوم رايون رەھبەرلىرىدىن جۇ چاڭجيې كۆرۈشۈشتە بىللە بولدى.