مېنى كۆيدۈرۈۋالغۇچىغا

alahidin

مېنى كۆيدۈرۈۋالغۇچىغا

ئالاھىدىن ئابدۇرىشىت

بىپايان تەنھالىقىمدىن خاكىسار خانەم كۆيەر،
سەن ئۈچۈن مىڭ دانە بولسام، دانەيۇ-دانەم كۆيەر.

قاپقارا تاش كۆكسىدە ئۇچقۇنلىسام تەپتىڭ بىلەن،
جەۋھەرىستانىڭ ئارا تاشقىنلىغان نالەم كۆيەر.

غەرق بولۇپ كەلسەم قوقاس ھەسرەتلىرىمنىڭ مەۋجىدىن،
دولقۇنۇڭنىڭ قات-قېتىدا تولغۇشۇپ ئالەم كۆيەر.

ئىنتىزار كۆكلەملىرىمنىڭ لەھزىسى دىشۋار ماڭا،
ياپيېشىل خىلۋەتلىرىڭدە زەپىران لالەم كۆيەر.

ئەۋجىلىك جىلۋەڭنى تۆكسەڭ تۈندە ئاي ئەكسىن كۆرۈپ،
قاغجىراق باغرىمدا چاڭقاپ ھۇۋلىغان بادەم كۆيەر.

مەن ئۈچۈن تاغدۇر پەقەت، ھىجران ھامان ماتەم ئەمەس،
ھەر دېمىمدىن تۇنجۇقۇپ قان ئوتلىغان ماتەم كۆيەر.

كۆيۈكۈڭ ھەلقۇملىرىمغا جاننى يەتكۈزدى تالاي،
كۆككە باقسام باشتا ئوت، يەردە يەنە پايەم كۆيەر...

2012-يىلى 11-ئاينىڭ 18-كۈنى، شاڭخەي.

نەۋرۇز

ياخشى يازمىڭىزنى شاڭخەيدە تۇرۇپمۇ يوللاشنى ئۇنتۇپ قالماپسىز. رەھمەت قېىرىندىشىم

arkinjuma

شاڭخەيدىمۇ ئۇيغۇرچە كومپيۇتېر بارما؟
ئېسىل لېرىكىلىرىڭىزنى ئوقۇپ ھۇزۇرلاندىم،مۇشۇنداق تېمىلىرىڭىز ئۈزۈلۈپ قالمىسۇن،قېرىندىشىم.

سەلكىن01

گەرچە شاڭخەيدە تۇرسىڭىزمۇ، يۈرىكىڭىز ئانا يۇرتىمىزدا سوقۇۋېتىپتۇ. سەپىرىڭىزگە ئاقيول تېلەش بىلەن بىرگە، ئىجادىيەتلىرىڭىزگە ئۇتۇق تېلەيمەن.

بېلىقچى

يازمىڭىز ناھايىتى ياخشى چىقىپتۇ.قەلىمىڭىزگە دەرت بەرمىگەي.كۆيۈكنىڭ دورىسى ئۈچۈن بىر كۇبلىت:

‹‹ئاھ››دەپلا ئاغزىڭدىن ياندۇرساڭ بىر ئوت،
جىمىكى مەۋجۇدات كۆيۇپ كۇل بولسا.
سەن ئۈچۈن بىر جەننەت بولارمىكىن تاڭ؟
مۇھەببەت ۋە پاكلىق يوقالغان دۇنيا...

مېھرى

     ئۇستازنىڭ بۇ غەزىلىگە قاپ يۈرەكلىك بىلەن چاخچاق قىلغۇم كېلىۋاتىدۇ . غەزەلدىكى تۇيغۇ ، غەزەلدىكى شىرىن پىغان بارچە كۆيۈك ئەھلىنىڭ نىداسى دىسە ئارتۇق كەتمەس . مەن ئۇستازنىڭ بارلىق يازمىلىرىنى ياقرۇتۇپ ئوقۇيدىغان بىر قىزغىن ئوقۇرمىنى بولۇش سۈپىتىم بىلەن، ئۇستازنىڭ ئىلگىرىكى «مۇناجات»لىرى، «نالەش»لىرى ،«جۇنۇننامە»، «رەشىكنامە».... نامىلىرىنى بىر بىرىگە باغلاپ ئوقۇپ باقتىم . بۇ غەزەللەردىكى تىل پاساھىتى، مەنا بالاغىتى ، پىكىر تېرەنلىكى مېنى ئۇستازنىڭ بەدىىئي سەۋىيىسى ۋە ئىستىداتىغا تېخىمۇ قايىل قىلدى .
       بۇ غەزەلنى ئوقۇپ ئۆزەمچە كۈلۈپ كەتتىم  . ئەگەر ئۇستازنى گېپى ئوچۇق،  مىجەزى كەسكىن ، تەلەپچان ، قاتتىق قول ،سەل چۇس لېكىن مېھرىبان بىر ئوقۇتقۇچى دەپ ئاڭلىمىغان بولسام، شېئىر ئاپتورى چوقۇم بىرسىگە كۆيۈپ قېلىپ، قاتتىق كۆيۈك ئازاۋى تارتىۋېتىپتۇ دەپ ئويلىغان بولار ئىدىم .   ئۇستازنىڭ روھىي دۇنياسىدىكى ئىنسانىي مۇھەببىتىگە كۆز تەگمىگەي، كۆيگۈچىگە سەۋر، كۆيدۈرىۋالغۇچىغا ئىنساپ تىلىدىم .(چاخچاق)

      ئۇستازنىڭ ئىلھامىغا بەرىكەت، قەلىمىگە قۇۋۋەت تىلەيمەن .