ئالاھىدىن ئابدۇرېشىت: ئەي قېرى

alahidin

ئەي قېرى

(ساتېرا)

ئالاھىدىن ئابدۇرېشىت

ئىشلىدىڭ مۇنبەردە ئەللىك يىل ئالامەت، ئەي قېرى،
يەتتى يەتمىشكە يېشىڭمۇ ساق-سالامەت، ئەي قېرى،
خىزمىتىڭ يەتتى ئېشىپ، چەكتىڭ رىيازەت، ئەي قېرى،
شۇ سەۋەب تەشكىل ساڭا بەردى ئىجازەت، ئەي قېرى،
چىقمىدىڭ ئەمما ئارامغا دۆت-ھاماقەت، ئەي قېرى.

بەللىرىڭ يادەك ئېگىك، ئاغزىڭدا چىشمۇ قالمىدى،
ئويلىساڭ سەن كۆرمىگەن تومۇزمۇ، قىشمۇ قالمىدى،
بىر زامان خالامۇ باقتىڭ، ئاغرىنىشمۇ قالمىدى،
ساڭا ئاخىر بۆلگۈدەك مەكتەپتە ئىشمۇ قالمىدى،
قالمىدى ئەمدى مانا سەندە ئىناۋەت، ئەي قېرى.

«ئىلتىماس»ىڭغا مۇدىر تەستىقمۇ سالدى نەچچە رەت،
سەن ئۈچۈن قاتراپ يۈرۈپ جاۋابمۇ ئالدى نەچچە رەت،
ۋە لېكىن تەستىق دېگەن كۆتۈڭدە قالدى نەچچە رەت،
سېنى «خوش!» دەپ ئۇزۇتۇپ ئېغىزمۇ تالدى نەچچە رەت،
جان دېگەن تەندە ھامان تۆت كۈن ئامانەت، ئەي قېرى.

ئۆسىمىش ئىش ھەققى دەپ يۈردۈڭ ئۆزۈڭنى خوش قىلىپ،
رودىپايدەك سۆرۈلۈپ بەرمەي ئورۇننى بوش قىلىپ،
زارلىماس كىممۇ ئىشىڭنى بۆلسە خەققە قوش قىلىپ،
پۇل دېسە، ئۇنۋان دېسە يۈرسەڭ بىراۋنى «پوش» قىلىپ؟
يوقمىدۇ سەندە پەقەت شۈكرى-قانائەت، ئەي قېرى؟

ئىش دېسە كەلدىڭ ئەجەپ يەتمىش يېشىڭنى پەش قىلىپ،
چىڭقىسا دوختۇرغا چاپتىڭ پۇت-قولۇڭنى لەش قىلىپ،
كۆزلىرىم كۆرمەس دېدىڭ، قەستەنگە تۆتنى بەش قىلىپ،
بىنومۇس، داپ يۈزلۈكۈڭ كەلدى كۆڭۈلنى غەش قىلىپ،
بىزدىكى ۋىجدانغا سەن قىلدىڭ خىيانەت، ئەي قېرى.

پۇتلۇشۇپ يۈرگەچكەسەن، بىزلەرگە نۆۋەت كەلمىدى،
ئىلتىماس يازساق ئارامغا زادى پۇرسەت كەلمىدى،
يەنە يۈز يىل ياشىماققا ياكى رۇخسەت كەلمىدى،
خورىدى جان قىينىلىپ خوپ، تەنگە يا ئەت كەلمىدى،
سەن تۈپەيلى كەلدى بىزگە كۆپ مالامەت، ئەي قېرى.

كەلمىدى ئۇنۋانغا سان، توشتى دېدى نىسپەت يەنە،
ياتقىنىڭ ياتقان ئىگەللەپ كەلسىمۇ نۆۋەت يەنە،
توشتى دەپ ئىش ئورنىمۇ، چۈشتى تېخى ھۆججەت يەنە،
يەنە ئىشلەيمەن دېدىڭ، بەردىڭ تالاي تىلخەت يەنە،
يوپۇرۇپ يۈردۈڭ قۇلاق، بولماي خىجالەت، ئەي قېرى.

تېز بوشات ئورۇننى ئەمدى، دەيدۇ ھەممە «خەپ!» سېنى،
قوغلىساق سۈرگۈنگە چۈشكەن مادىدەك بىئەپ سېنى،
سېسىتار كۇس-كۇس بىلەن گوياكى تاپتەك گەپ سېنى،
ئۆلۈكۈڭنى يولدا قويغاي تويمىغان شۇ نەپ سېنى،
قېرىغاننىڭ يۈزىگە چاچما نىجاسەت، ئەي قېرى!

2013-يىلى، 6-ئاينىڭ 10-كۈنى.

pida1399

ناھايىتى ياخشى چىقىپتۇ ، لىكىن پەقەتلا كاللامدىن ئۆتمىدى ، شۇ « قېرىنىڭ » ئورنىدا ئۆزىڭىزنى قويۇپ ئويلاپ بېقىڭ قانداق بولدىكىن ؟ .

alahidin

«لېكىن» دېگەن باغلىغۇچى قارىمۇ-قارىشى باغلىغۇچىدۇر!

mamataili110

ئالامەت ئېسىل شىئىر بوپتۇ . قوللىرىڭىزغا دەرت كەلمىگەي .

ئىدرسجان

شۇنداق ئىشلىدىڭ ،ئوتكۇزۇپ 70 يىلىنى مەكتەپ ،ئىشخانا، ئۇستىڭلدە،
گاھى يەنە ئىشلىدىڭ ،ئاجىز كەمبەغەلنىڭ ،بىچارىنىڭ گەدىنىدە.
ئارام ئالماي خوش -خوش تازىم بىجا ئىتىپ باشلىقڭغا.
ئەجەپ ئىچىڭ ئاغىرماي ئوتۇپ كەتكەن ،ئەشۇ گۇزەل ياشلىقىڭغا،
بىلەمسەن سەن ھۇزۇر نىمە، ئارام نىمە، بىلمىگىدەك ياكى ئىشەك كالىمۇ سەن.
قارا ماڭا باشقىلارغا، نورسىز كوزۇڭ كورمەس،بىزنىڭ قىلغان بوستانمىزنى
باشلىقمىز كادىرىمىز يوق ،ياشلىقنڭ پەيزىنى سۇرۋاتىمىز كۇلۋاتىمىز.
بىز يورمىز بىر كۇن قەشقەر، بىر كۇن خوتەن دىياردا سەيلى قىلىپ
بولدى ئىشلە ئولسەڭ تىخى ياخشى ئوز ئىش ئورنۇڭدا
يوقىردىكلەر باھالايدۇ ئىشىڭنى، كىلىپ يەيدۇ سەن يىمگەن ئىشىڭنى.
ئاشۇ چاغدا سەن ياتسەن گورىڭدە ،قەنتىڭىنى چاقىدۇ ئىشلمىگەنلەر ھوزۇرڭدا.
ئولەرسەن سەن پۇتۇن جاھانغا ئەسكى دىگەن سىسىق نامىڭنى قالدۇرۇپ.

ئىدرسجان

شۇنداق يۇقىردا دىيلگەندەك ئاشۇ ئىشلەۋاتقان بىچارە كادىرلىرىمىزغا بەكلا ئىچىم ئاغرىيدۇ،
ئۇلار كىچىكىدىن مەكتەپتە ئوقۇيدۇ ئالى مەكتەپتە ئوقۇيدۇ ئاندىن ئشقا چۇشدۇ . چۇشدۇ، پەقەت بوش ۋاقتى يوق ،
ئۇلار ياشلىقىدا ھۆزۇرلىنىپ بىر قىتىم ساياھەت قىلىلمايدۇ، ياكى سائەت سەككىزدىن كىيىن پۇتىنى سۇنۇپ ئارمدا خاتىرجەم يالمايدۇ.
باشلىقىغا ئىيتماي يىرىم سائەت ئويدە ئوز ئىشنىمۇ قىلالمايدۇ.
بىچارە.
ئۇلار ئىشلەيدۇ ئىشتىن ياناي  دىگەندە  سىز بۇگۇن گاڭدا تۇردىكەنسىز دىسە ئامال يوق دەرۋازا باققان ھەي ،
بىچارە.
گاھى ئويلاپ قالمەن،  خىزمەت قىلىپ قالماپتىكنمەن بولمىسا مىنىڭمۇ كوردىغىنىم باركەن دەپ ئويلاپ قالمەن.
مىڭ شۇكرى.

يۇسۈپجان

شۇنداق ياخشى چىقىپتۇ

قەھىر

ئالاھىدىن مۇئەللىم  ، ئاللاھ  ئەزىز تېىنىڭىزنى سالامەت قىلغاي ،مەن مۇ سىز بىلەن بىر يەردە ھەم بىر ساھەدە ئىشلەۋاتىمەن،مەنلا ئەمەس نۇرغۇن دوسلىرىڭىز ھەم خىزمەتداشلىرىڭىز سىزدىن پەخىرلىنىمىز !!! قەلمىڭىزگە قۇت تىلەيمە !!!

رەنا

ئالاھىدىن مۇئەللىم ،سىزنىڭ مۇشۇنداق نەق يورەككە باردىغان  سۆزلىرىڭىز ئادەم تولىمۇ ياقىدۇ . بەزلىرنى تولىمۇ ياخشى قامچىلاپسىز ،يەنە بەزلىرىگە سەل ئۇۋال بوپتۇ ، لىكىن ئۇنداق ئەمەسلەر دىققەت قىلىشى كىرەكتە .
سىزگە ئامەت ،بەخت تىلەپ ،ھارماس قەلىمڭىزگە تىخمۇ كۆپ كۈچىلەر تىلەيمەن .

يەھيا001

بۇ قالتىس يېزىلىپتۇ