ئالاھىدىن ئابدۇرېشىت: ئىككى غەزەل

alahidin

ئىككى غەزەل

ئالاھىدىن ئابدۇرېشىت

نىدا

ئارەزىڭنى ئاي دېدىم، چولپاننى سەندىن ئىزدىدىم،
كۈن دېدىم ۋەسلىڭنى مەن، ئاسماننى سەندىن ئىزدىدىم.

ئۆرتىنىپ چاقماڭلىرىڭنىڭ تۈندىكى ئاۋازىدا،
لەۋلىرىڭدىن چوغ سوراپ، گۈلخاننى سەندىن ئىزدىدىم.

چۆكمىلەر بار قىن-قىنىمدا ئۇيۇغان زەرداب بىلەن،
بىر يولى كۆيدۈرگىلى ۋولقاننى سەندىن ئىزدىدىم.

كۆزلىرىمدە ئاقمىغان دەريانى دەريا دەمدىمەن؟
تاشقىنىمغا قاينىغان ئەفغاننى سەندىن ئىزدىدىم.

نەرە تارتىپ بارلىقىمدىن بۇ جۇنۇنلۇق دەشتىدە،
لەرزىگە كەلسە جاھان تۇغياننى سەندىن ئىزدىدىم.

باغلىدىم ساچىڭ بىلەن ھەققە بويۇننى قاتمۇ-قات،
ئۆلگىلى ئىشقىڭدا جان، ئىمكاننى سەندىن ئىزدىم.

مەن غېرىبنىڭ باغرىدا سولدى چىمەنلەر ياش تۆكۈپ،
تۇپرىقىمغا ئۈنسە دەپ رەيھاننى سەندىن ئىزدىدىم...

2012-يىلى، 10–ئاينىڭ 10-كۈنى، يېڭىسار.

ۋادەرىخا

ۋادەرىخا، بۇ مېنىڭ ھەسرەتلىرىمنى نە قىلاي؟
يەتمىدىم يار ۋەسلىگە، كۈلپەتلىرىمنى نە قىلاي؟

نۇش ئېتەرگە يار لېۋىدىن قەترەئى ئابىم قېنى،
سۈپسۈزۈك باغرىمدىكى شەربەتلىرىمنى نە قىلاي؟

سىر تۆكەرمەن بىر جۇنۇن ئاشىققا كۆرگۈم ئالدىدا،
ھۆر-پەرىلەر قەسرىدە سۆھبەتلىرىمنى نە قىلاي؟

يالتىرايدۇ مىڭ قىلىچ يارنىڭ قىرىقتال ساچىدا،
ئول فەنالىق دەشتىدە رىغبەتلىرىمنى نە قىلاي؟

بەر قارار تۇلپارلىرىم، تاغلار ئېگىز، يوللار چۆكۈك،
ئۆتكۈلەرنىڭ چۈشىدە شەۋكەتلىرىمنى نە قىلاي؟

قاغجىراق دەريالىرىمدا ئاقىدۇ چۆللەر يېشى،
تەن يەنە تۇپراق بىلەن ۋەھدەتلىرىمنى نە قىلاي؟

قۇش ئۆلەر، سۇنغاي قانات، چۈشمەس يېرىم ئاسمان ئاڭا،
ئالتە كۈنلۈك بۇ جاھان، قىسمەتلىرىمنى نە قىلاي؟...

2012-يىلى، 10-ئاينىڭ 12-كۈنى، يېڭىسار.

سەلكىن01

روھلان تورىغا ئەزىز مېھمان بولۇپ كەلگەنلىكىڭىزنى قىزغىن قارشى ئالىمىز.مانا تۇنجى تېمىڭىز بىلەن يۈرەكلەرگە مەلھەم بولغۇچى ئابى چەشمە ئەپ كەپسىز. روھلان يەنە بىر تالانت ئىگىسىگە، مۇنەۋۋەر قەلەم ساھىبىغا ئىگە بوپتۇ. چاڭقاق يۈرەكلىرىمىز بۇ مۇھەببەت لېرىكىسىدىن يەتكىچە ھۇزۇرلىنىپ، تەشنالىقىنى قاندۇردى.سىزگە ئالەمچە رەھمەتلەر ئېيتىش بىلەن بىرگە، كېيىنكى ئىجادىيەتلىرىڭىزگە ئۇتۇقلار تېلەيمەن!...

مېھرى

     ئەسسالامۇ ئەلەيكۇم ، ئالاھىددىن مۇئەللىم !  روھلانغا تەشرىپ قىلغان مۇبارەك قەدەملىرى مەرھابا !
     بىلىشىمچە بۇ سىلىنىڭ روھلانغا يوللىغان تۇنجى تېمىلىرى . تۇنجى قېتىمدىلا مۇشۇنداق ئېسىل غەزەلنى ئېلىپ كەلگەنلىىرى ئۈچۈن سىلىگە رەھمەت.  ئۆزلىرىدەك مائارىپچىلار توپلاشقان روھلان تورىمىز سىلىنىڭ مائارىپ ئۈچۈن كۆيگەن يۈرەكلىرىدىن چىققان  چىن، ئۆتكۈر ساتىرالىرى ، ئىنسانىي سەزگۈدە يېزىلىۋاتقان بىر -بىرىدىن ئېسىل غەزەللىرى ئۈچۈن كەڭ سەھنە بولۇپ قالغۇسى .
    ئۇستازنىڭ  بۇ تۇنجى قەدىمىنىڭ ھۆرمىتىگە ،  «نىدا» غەزەلگە ياندىشىپ ، ئانچە قاملاشمىغان بولسىمۇ يېزىپ باققان مۇشائىرەمنى سۇناي ! كەڭ تورداشلارنىڭمۇ ياندىشىپ بېقىشىغا تەكلىپ بېرىمەن :

ئاي دىمە، چولپان دىمە ، قانچە گۈزەل جانان بولاي،
ئىزلىمە ۋەسلىمنى كۈندىن، ئەڭ ئاۋال ئىنسان بولاي.

چاچ ئەمەس، ئەھدىڭ بىلەن ھەققە بويۇننى باغلىساڭ،
تىلىمە ئىمكان يەنە  ،ئەھدىڭگە مەن قۇربان بولاي.

ئاقمىسۇن دەريا يېشىڭ، ئۆرتەنمە چاقماق ئاھىدا،
مۇزلىسا دەريالىرىڭ ،ئېرىتكىلى گۈلخان بولاي.

مەشغۇلۇڭ بولسا ئۆمۈرلۈك شۇ چىمەنلەر پەرۋىشى،
ئۈنگىلى تۇپراقلىرىڭدا لالەيۇ-رەيھان بولاي.

ئۇستاز  تەلىم بەرگەي!