ئالاھىدىن ئابدۇرېشىت: يېرىل تاشىم

alahidin

يېرىل تاشىم

ئالاھىدىن ئابدۇرېشىت

تۈنەي ئۆڭكۈرلىرىڭ ئىچرە، پىغانىمدىن يېرىل تاشىم،
كېتەي چاڭگام چۇۋۇلغان بۇ ماكانىمدىن، يېرىل تاشىم.

ئېچىلماس-باغرى تاش يارنىڭ، ئوچۇق باغرىم پايانلارغا،
جۇدا ئەتتى مېنى ھىجران نىشانىمدىن، يېرىل تاشىم.

بولۇر غايىپلىقىڭ ئەسرا يىگانە تۈنلىرىم بالبال،
ئېتىلغايمەن ياۋانىڭغا كامانىمدىن، يېرىل تاشىم.

ئىچىمدە ئوت، ئۆچۈرمەككە مېنىڭ پايناپلىرىم نەدە؟
تۆكۈلگەي زەپىران تۇپراق خازانىمدىن، يېرىل تاشىم.

يېرىلماق باركى تۇپراققا، يەنە ئاسمانغا مەھشەردە،
يېرىلدىم جانغا دار ئىزلەپ جاھانىمدىن، يېرىل تاشىم.

سوغامنى تاشلىدىم باشتىن، تېشىپ زەردابلىرىم ئاندىن،
قويايمەن نوھنى ھەيرەتتە قىيانىمدىن، يېرىل تاشىم.

تېنىم تاشمۇ، جېنىم تاشمۇ، نىگار ئوينامدۇ تاش تەرمەك؟
تېرىپ ئال، بەلكى تاشتۇرمەن داۋانىمدىن، يېرىل تاشىم!

2013-يىلى، 10-ئاينىڭ 25-كۈنى، يېڭىسار.

ئىدرسجان

ئىسل شىئىر يارايسىز، شىئىرلىرىڭىز ئۇزۇلۇپ قالمىسۇن.

azat007

ئېچىلماس-باغرى تاش يارنىڭ، ئوچۇق باغرىم پايانلارغا،
جۇدا ئەتتى مېنى ھىجران نىشانىمدىن، يېرىل تاشىم.

تولىمۇ پەيزى چىقىپتۇ ھارماڭ ئۇستاز

pisan

ئېسىل غەزەلكەن!

anvar

مەن سىز يازغان شىئېرلىرىڭىنى(غەزەللېرىڭىزنى) ياقتۇرۇپ ئوقۇيمەن،رەخمەت .

bahadirbiz

كۈزۈم ئېچىلىپلا قالدى دىسسە.

ئەلتبەر

شۇنداق ئسل شېر ئىرلىرىڭز بىلەن تورداشلارنڭ قەلبىنى لەرزىگە سېلىۋاتسىز    ئاپرىن رەخمەت  ئاللاھ ئائىلىڭىزىگە  بەركەت بەرسۇن

arkinjuma

رەھمەت! قەلىمىڭىزگە بەرىكەت ،ئائىلىڭىزگە شادلىق،خىزمىتىڭىزگە ئۇتۇق تىلەيمەن.