ئامېرىكا ئالەم قاتنىشى ئىدارىسى نۆۋەتتە ‹‹دەرىجىدىن تاشقىرى شارسىمان ماشىنا ئادەم››نى تەتقىق قىلغان. ئالىملارنىڭ قارىشىچە بۇ دەرىجىدىن تاشقىرى شارسىمان ماشىنا ئادەم ساتۇرننىڭ ئالتىنچى ھەمراھى ‹‹تىتان›› نىڭ سىرتقى يۈزىدىن 100 كىلومېتىر ئېگىزلىكتىن چۈشسىمۇ بۇزۇلمايدىكەن. يەرگە چۈشسىلا دومىلاپ مېڭىۋېرىدىكەن. شارسىمان تۈزۈلۈشلۈك قونغۇچى قۇرۇلما نىسبەتەن ياخشى بولغان ئېنېرگىيە يىغىش ئالاھىدىلىكىگە ئىگە ئىكەن.مەسىلەن:‹‹جاسارەت›› ۋە ‹‹پۇرسەت›› ناملىق مارس ماشىنىلىرىغا سوقۇلۇشنى ئاجىزلاتقۇچى يەل خالتىسى ئىشلىتىلگەن بولۇپ، قونغاندا مارس يۈزىدە كۆپ قېتىم قاڭقىش ئارقىلىق ئېنېرگىيەسىنى تەدرىجىي كېمەيتىپ، ئاخىرىدا توختايدىكەن. ئەمما يېڭىدىن لايىھەلىنىۋاتقان قونغۇچى ماشىنا ئادەم ئاددىي ھالدىكى سوقۇلۇشنى ئاجىزلاتقۇچى يەل خالتىلىق قۇرۇلما بولماستىن، ئۇنىڭ سىرتقى يۈزى بىر قەۋەت سوقۇلۇشنى ئاجىزلاتقۇچى قۇرۇلما بىلەن ئورالغان بولۇپ، ئېنېرگىيە يىغىش ئىقتىدارى ئاشۇرۇلغان. قۇرۇلما ئۆزگەرتىش ئارقىلىق تېزلىك كېمەيتكۈچى باشقا تەدبىرلەر قىسقارتىلغان بولۇپ، بۇ ئارقىلىق تەكشۈرگۈچ (دېتېكتور) نىڭ ئېغىرلىقىنى كېمەيتكىلى، بىر قېتىمدا كۆپلىگەن تەكشۈرگۈچى شارسىمان ماشىنا ئادەملەرنى ئورۇنلاشتۇرغىلى بولىدۇ.