شىنخۇا تورىنىڭ 3-ئاينىڭ30-كۈنىدىكى خەۋىرى، گۇگېلنىڭ باش ئىقتىسادشۇناسى ھال.ۋارىئان (Hal Varian) مۇشۇ ھەپتىنىڭ سەيشەنبە كۈنىدىكى Web 2.0 يىغىنىدا گۇگېلنىڭ قىممىتى توغرىسىدا سۆزلىگەن بولۇپ، ئۇ مۇنداق ئىككى مەسىلىنى ئوتتۇرىغا قويغان:«بۇنىڭ بىرى گۇگېلنىڭ ئابونتلارغا ئېلىپ كەلگەن قىممىتى، يەنى بىرى بولسا گۇگېلنىڭ ئېلان ئىگىلىرىگە ئېلىپ كەلگەن قىممىتىدىن ئىبارەت». ئۇ گۇگېلنىڭ ئېلان ئىگىلىرىگە ئېلىپ كەلگەن قىممىتىنى سۆزلەپ مۇنداق بىر فۇرمىلانى كۆرسەتتى: (vx-c(x . بۇنىڭ ئىچىدىكى v ئېلاننىڭ ھەر قېتىملىق چېكىلىش قىممىتىنى،x بولسا چېكىلىش قېتىم سانىنى،(c(x بولسا، چېكىلىش تەننەرخىنى بىلدۈرىدۇ. مۇشۇ فورمىلا بويىچە ھېسابلىغاندا، گۇگېلنىڭ تارقىتىش سودىگەرلىرى ۋە ئېلان ئىگىلىرىگە ئېلىپ كېلىدىغان ئىقتىسادىي قىممىتى 54 مىليارد ئامېرىكا دوللىرى بولىدىكەن.
گۇگېلنىڭ ئابونتلارغا ئېلىپ كېلىدىغان قىممىتىنى ھېسابلاپ، ئۇ «ئىزدەش ماتورىنى ئىشلەتمەيدىغان بىر كۈن» تەتقىقاتىنى تىلغا ئالدى. بۇ تەتقىقاتنىڭ نەتىجىسىدىن ئايان بولۇشىچە، ئوقۇغۇچىلارنىڭ كىتابخانىدىن ئۆزىگە كېرەكلىك كىتاب ئىزدىشى ئۈچۈن جەمئىي 22 مىنۇت ۋاقىت كېتىدىكەن. ئەمما گۇگېلدىن ئۆزىگە كېرەكلىك ماتېرىيال ئىزدىشى ئۈچۈن، پەقەت 7 مىنۇتلا ۋاقىت كېتىدىغان بولۇپ، 15 مىنۇت ۋاقىت تېجەپ قېلىنىدىكەن.
ئۇ يەنە گۇگېلنىڭ ئابونتلارنىڭ ۋاقتىنى تېجەيدىغانلىقى توغرىلىق تېخىمۇ ئىنچىكىلەپ ھېسابلاپ مۇنۇلارنى كۆرسەتكەن:« گۇگېل ئامېرىكىدىكى كىشىلەر ئۈچۈن ھەر كۈنى 3.75 مىنۇت ۋاقىت تېجەپ بېرىدۇ. ئامېرىكىدىكى سائەتلىك ئىش ھەققىنى 22 دوللار دەپ قارىغان ۋاقتىمىزدا، گۇگېل ھەر كۈنى ئابونتلارغا 1.37 دوللار تېجەپ بېرىدۇ. مۇشۇ ئۇسۇل بويىچە ھېسابلىغاندا، بىر يىلدا 500 دوللار بولىدۇ. ئامېرىكىدىكى ئىشقا ئورۇنلاشقانلارنىڭ سانىنى 130 مىليون دېسەك، ئۇ ھالدا گۇگېل ھەر يىلى ئامېرىكىلىقلار ئۈچۈن 65 مىليارد ئامېرىكا دوللىرى تېجەپ بېرىدۇ».
يۇقىرىدىكى ئىككى تۈرلۈك سانلىق مەلۇماتنى ئۆزئارا قوشقاندا، گۇگېل ھەر يىلى ئامېرىكىلىق كىشىلەر ئۈچۈن 119 مىليارد ئامېرىكا دوللىرى ئىقتىسادى قىممەت يارىتىدىكەن. ئۇ يەنە مۇنۇلارنى بىلدۈرگەن:« بىز بۇ يەردە تېخى گۇگېلنىڭ ئىشقا ئورۇنلاشمىغان ئابونتلىرىنى تىلغا ئالمىدۇق، سىز بىلىشىڭىز كېرەك، بۇ ئەڭ تۆۋەن مۆلچەر، ئەمەلىيەتتە گۇگېلنىڭ باشقىلارغا ئېلىپ كېلىدىغان قىممىتى بۇنىڭدىنمۇ ئارتۇق».