ئافرىقا زامانىۋى تۇرمۇش ئىچىدە ئىپتىدائىي قىياپىتىنى ئىزچىل بۇرۇنقىدەكلا ساقلاپ كېلىۋاتقان بىر قىتئە، بىراق ئىقتىسادنىڭ تەرەققىياتى سەۋەبىدىن، يېقىنقى يىللاردىن بېرى ئافرىقىنىڭ تەبىئىي بايلىقلارنى ئېچىشىمۇ بارغانسېرى كۆپىيىپ قالدى. يېقىندا، چەت ئەل ئاخبارات تاراتقۇلىرى فوتوگرافلارنىڭ ئافرىقىنىڭ گامبىيە دەرياسى بويىدىكى يەرلىك قەبىلىلەردە تارتقان بىر گۇرۇپپا سۈرەتلىرىنى ئېلان قىلىپ، سۇ ئېلېكتىر ئىستانىسىسى قۇرۇش سەۋەبىدىن كۆچۈرۈلۈش خەۋپىگە دۇچ كېلىۋاتقان كەنتلەرنىڭ ئەڭ ئاخىرقى بىر ئىپتىدائىي قىياپىتىنى مۇشۇ ئۇسۇل ئارقىلىق ساقلاپ قېلىشنى ئۈمىد قىلغان.
خەۋەردە دېيىلىشىچە، گامبىيە دەرياسى ئافرىقىدىكى ساناقلىقلا تەبىئىي دەريا ئېقىنلىرىنىڭ بىرى ئىكەن. بۇ دەريا ئېقىنى ئۈستىگە بىر چوڭ تىپتىكى سۇ ئېلېكتىر ئىستانسىسى قۇرۇلىدىغانلىق خەۋىرىنى ئاڭلىغاندىن كېيىن، فوتوگراف Jason Florio ۋە ئۇنىڭ ئايالى Helen Jones-Florio ئاپپارات ئارقىلىق دەريا ئېقىنى ئەتراپىدىكى كەنتلەر كۆچۈرۈلۈشتىن بۇرۇنقى كىشىلەرنىڭ تۇرمۇش ئۇسۇلىنى خاتىرىلەۋېلىشنى قارار قىلغان. ئۇلار دەريانىڭ مەنبەسى گۋىنېئا ئېگىزلىكىدىن يولغا چىقىپ، سېنېگال ۋە گامبىيە جۇمھۇرىيىتىدىن ئۆتۈپ، ئەڭ ئاخىرىدا دەريانىڭ ئاتلانتىك ئوكيان بىلەن كېسىشكەن جايىغا كەلگەن. جەيسون قاتارلىق تۆت ئادەم بىر ئاي سەرپ قىلىپ، تەخمىنەن 700 مىل (تەخمىنەن 1100 كىلومېتىر) يول بېسىپ، دەريا قىرغىقىدىكى يەرلىك قەبىلىلەرنىڭ تۇرمۇش مەنزىرىسىنى خاتىرىلىگەن.
گەرچە سەپەر ئىنتايىن جاپالىق بولسىمۇ، دائىم تۈرلۈك تاسادىپىي ئەھۋاللارغا ئۇچراپ تۇرسىمۇ، ئەمما جەيسون قىيىنچىلىققا قەتئىي بوي سۇنمىغان، ئۇ تېخى كېلەر قېتىملىق گامبىيە سەپىرىنىمۇ پىلانلاپ بوپتۇ.
