ئاسىيا كىندىكى تورىنىڭ 4-مارت خەۋىرى: 3-ئاينىڭ 3-كۈنى ئېلان قىلىنغان «شىنجاڭنىڭ 2014-يىللىق خەلق ئىگىلىكى ۋە ئىجتىمائىي تەرەققىيات ئىستاتىستىكا دوكلاتى» دا كۆرسىتىلىشىچە، 2014-يىلى شىنجاڭدا سېتىلغان جەمئىيەت ئىستېمال بۇيۇملىىرى ئىچىدە تاۋار تۈرى بۇيىچە قارىغاندا، كىيىم كېچەك، ئاياغ، باش كىيىم، توقۇلما بۇيۇم تۈرىدىكى مەھسۇلاتلار، ئائىلە ئېلېكتىر سايمانلىرى ۋە ئۈن سىن بۇيۇملىرى تۈرىدىكى مەھسۇلاتلار، نېفىت ۋە نېفىت مەھسۇلاتلىرى قاتارلىق تاۋارلارنىڭ سېتىلىش مىقدارىدا ئازراق ئېشىش كۆرۈلگەن، ئەمما ئالتۇن كۈمۈش، ئۈنچە مەرۋايىت تۈرىدىكى تاۋارلار، ئاپتوموبىل تۈرىدىكى تاۋارلارنىڭ سېتىلىش مىقدارى ئازراق تۆۋەنلىگەن، بۇنىڭ ئىچىدە ئالتۇن كۈمۈش، ئۈنچە مەرۋايىت تۈرىدىكى مەھسۇلاتلارنىڭ سېتىلىش مىقدارى %18.1 تۆۋەنلىگەن بولۇپ، چۈشۈش نىسبىتى ئەڭ چوڭ بولغان.
مۇخبىرنىڭ ئاپتونوم رايونلۇق ئىستاتىستىكا ئىدارىسىدىكى مۇناسىۋەتلىك كەسىپ بۆلۈملىرىدىن ئىگىلىشىچە، گەرچە 2014-يىلى ئالتۇن باھاسى يەنىلا بىر تۆۋەن باھادا ماڭغان بولسىمۇ، ئەمما ئىستمالچىلار تەدرىجىي ھالدا نەرسە سېتىۋالغاندا ئاقىلانە يول تۇتۇشقا باشلىغان؛ توي قىلغاندا سوۋغا تەقدىم قىلىدىغان زۆرۈر ئېھتىياج يەنىلا ئاشقان، ئەمما كۆپىنچە كىشىلەر ئالتۇن كۈمۈش، ئۈنچە مەرۋايىتقا مەبلەغ سالمىغان. 2013-يىلى ئالتۇن باھاسى زور دەرىجىدە چۈشكەن، بىر قىسىم كىشىلەر ھاياجاندا ئۆزىنى تۇتۇۋالماي كۆپ مەبلەغ سېلىپ، ئالتۇن باھاسى چۈشىۋەرگەندە سېتىۋىتىشكە مەجبۇر بولغان، 2014-يىلى شىنجاڭلىقلار مەبلەغ سېلىشتا تېخىمۇ ئاقىلانە يول تۇتقان.
«دوكلات» تا كۆرسىتىلىشىچە، 2014-يىلى شىنجاڭدىكى ئۆي زېمىن بازىرىدىكى مەبلەغ سېلىنمىسىدا ئېشىش يۈزلىنىشى كۆرۈلگەن ، ئەمما سېتىلىش كۆلىمى تۆۋەنلىگەن، بۇنىڭ ئىچىدە مەبلەغ سېلىنمىسىنىڭ ئېشىش نىسبىتى پۈتۈن مەملىكەتتىكىدىن %12.4 يۇقىرى تۇرغان، تۇرالغۇ ئۆيلەرگە مەبلەغ سېلىش نىسبىتى پۈتۈن مەملىكەتتىكىدىن %1.7 يۇقىرى بولغان، تاۋار ئۆيلەرنىڭ سېتىلىش كۆلىمىنىڭ تۆۋەنلەش نىسبىتىمۇ پۈتۈن مەملىكەتنىڭ %7.6 لىك سەۋىيەسىدىن %2.4 يۇقىرى بولغان.
تەرجىمىدە: ھاجىم
