تېڭشۈن مالىيە ئىقتىساد قانىلىنىڭ 19-فېۋرال خەۋىرى: 2-ئاينىڭ 18-كۈنى ئېلان قىلىنغان سانلىق مەلۇماتتا كۆرسىتىلىشىچە، غەرب دۆلەتلىرىنىڭ جازاسى ھەمدە خام نېفىت باھاسىنىڭ تۆۋەنلىشى بېسىمىدا، رۇسىيە ئىقتىسادى يەنىمۇ ئىلگىرىلەپ چېكىنىش دەۋرى يۆلىنىشگە قاراپ ماڭغان.
سانلىق مەلۇماتلار ئىپادىلەپ بەردىكى، گەرچە پۇل پاخاللىقى نىسبىتى سەل تۆۋەنلىگەن بولسىمۇ، ئەمما پارچە سېتىشنىڭ زور دەرىجىدە تۆۋەنلىشىشى ھەمدە ئەمەلىي ئىش ھەققىنىڭ تۆۋەنلىشىشى ئىستېمالچىلار ئىقتىساد بېسىمى پەيدا قىلغان زەربىگە ئۇچراۋاتقانلىقىنى دېرەك بېرىدۇ. رۇسىيە ھۆكۈمىتى مۆلچەرلىشىچە، 2015-يىلى رۇسىيەنىڭ GDP سى %3 تۆۋەنلەيدىغان بولۇپ، 2009-يىلدىن بۇيان تۇنجى قېتىم تۆۋەنلەش كۆرۈلىشى بولۇپ قالىدۇ؛ ئاۋام ئارىسىدىكى كۆپلىگەن ئىقتىسادشۇناسلارنىڭ مۆلچەرلىشىچە، بۇ يىل رۇسىيەنىڭ GDP سىدا تېخىمۇ زور دەرىجىدە تۆۋەنلەش كۆرۈلىشى مۇمكىن ئىكەن.
رۇسىيە فېدېراتسىيە ئىستاتىستىكا ئىدارىسى 2-ئاينىڭ 18-كۈنى ئېلان قىلغان سانلىق مەلۇماتتا كۆرسىتىلىشىچە، رۇسىيەنىڭ دۆلەت ئىچى ئېھتىياجىدا تۆۋەنلەش كۆرۈلگەن. ئۆتكەن نەچچە يىلدا دۆلەت ئىچى ئېھتىياجى ئىزچىل رۇسىيە ئىقتىسادىنىڭ ئاساسلىق تۈرتكىلىك كۈچلەرنىڭ بىرى بولۇپ كەلگەن، ئەمما ئىستېمالچىلار ئىشەنچىسىنىڭ تۆۋەنلىشى سەۋەبلىك ئوڭۇشسىزلىققا ئۇچرىدى.
2-ئاينىڭ 16-كۈنىگىچە رۇسىيەنىڭ ئىستېمالچىلار باھا كۆرسەتكۈچى %0.4 ئاشقان بولۇپ، بۇ يىللىق پۇل پاخاللىقى نىسبىتىنىڭ %15.9 ئىكەنلىكىدىن دېرەك بېرىدۇ. ئەمما شۇ ھەپتە رۇسىيەنىڭ ئىستېمالچىلار باھا كۆرسەتكۈچىنىڭ ئېشىش دەرىجىسى 2014-يىلى 12-ئاينىڭ ئوتتۇرىدىن بۇيان ئەڭ تۆۋەن سەۋىيەگە چۈشۈپ قالدى، ئەينى چاغدا رۇبلىنىڭ كۇرسى زور دەرىجىدە چۈشۈپ كېتىشى پۇل پاخاللىقى سانلىق مەلۇماتىنى تارىختىكى ئەڭ يۇقىرى سەۋىيەگە كۆتۈرۈۋەتتى.
رۇسىيە مەركىزىي بانكىسىنىڭ نۆۋەتتىكى ئۆلچەملىك ئۆسۈم پىرسەنتى %15، رۇسىيە بانكىسى ۋە كارخانىلىرى قەرز ئېلىش تەننەرخىنى تۆۋەنلىتىشنى تەلەپ قىلماقتا، چۈنكى غەرب دۆلەتلىرى ئۇكرائىنا كىرىزىسى سەۋەبلىك رۇسىيەنى جازالىشى ئۇلارنى خەلقئارا بازارغا كىرىشكە ئامالسىز قويدى.
2015-يىلى 1-ئايدا رۇسىيەنىڭ پارچە سېتىش سوممىسى 2009-يىلدىن بۇيان تۇنجى قېتىم تۆۋەنلىگەن، ئەمەلىي ئىش ھەققىنىڭ چۈشۈش دەرىجىسىمۇ تارىختىن بۇيانقى ئەڭ چوڭ چۈشۈش نىسبىتىنى ياراتقان. 1-ئايدا رۇسىيەنىڭ پارچە سېتىش سوممىسى ئوخشاش مەزگىلدىكىدىن %4.4 تۆۋەنلىگەن، ئەمەلىي مائاشى بولسا ئوخشاش مەزگىلدىكىدىن %8 تۆۋەنلىگەن.
بۇنىڭ بىلەن بىرگە، 1-ئايدا رۇسىيەنىڭ مۇقىم كاپىتالغا مەبلەغ سېلىشىدىمۇ داۋاملىق تۆۋەنلەش ۋەزىيىتى كۆرۈلگەن، ئوخشاش مەزگىلدىكىدىن %6.3 تۆۋەنلىگەن.
تەرجىمىدە: ئوكيان
