سىنا تورىنىڭ 4-مارت خەۋىرى: چەتئەل تاراتقۇلىرىنىڭ خەۋىرىگە ئاساسلانغاندا، سەئۇدى ئەرەبىستان 3-ئاينىڭ 3-كۈنى ئاسىيادىكى سېتىۋالغۇچىلارغا قارىتىلغان باھا بېكىتىش تەدبىرىنى ئۆزگەرتىپ، ئاسىيا بازىرىغا ئېكسپورت قىلىنىدىغان خام نېفىت باھاسىنى چوڭ كۆلەمدە ئۆستۈرگەن. سەئۇدى ئەرەبىستان بۇنىڭدىن ئىلگىرى ئاسىياغا خام نېفىت ئېكسپورت قىلىش باھاسىنى ئىزچىل تۆۋەنلىتىش ئارقىلىق بازاردىكى ئىگىلىگەن نىسبىتىنى قولغا كەلتۈرگەن.
خەۋەر قىلىنىشىچە، خام نېفىت سېتىۋالغۇچىلىرىغا تاپشۇرۇلىدىغان بىر پارچە سېتىش جەدۋىلىدە، سەئۇدى ئەرەبىستان دۆلەت نېفىت شىركىتى 4-ئايدا ئاسىياغا ئېكسپورت قىلىنىدىغان خام نېفىتنىڭ ھەر باكىنىڭ باھاسىنى 1.4 ئامېرىكا دوللىرى يۇقىرى كۆتۈرۈپ، بۇنىڭدىن بۇرۇنقى بىر قانچە ئايدىكى باھانى تۆۋەنلىتىش تەدبىرىنى ئۆزگەرتكەن. مەزكۇ سەئۇدى ئەرەبىستان دۆلەت نېفىت شىركىتى يەنە ئامېرىكىغا ئېكسپورت قىلىنىدىغان خام نېفىت باھاسىنى ھەر باكىنى 1 ئامېرىكا دوللىرى ئۆستۈرگەن.
سەئۇدى ئەرەبىستاننىڭ بۇ قېتىملىق باھا ئۆستۈرۈش كۆلىمى بۇنىڭدىن بۇرۇنقى كۆپ قېتىملىق باھا تەڭشەش كۆلىمىدىن خېلىلا چوڭ بولۇپ، بۇرۇن سەئۇدى ئەرەبىستاننىڭ ئەڭ تۆۋەن باھا تەڭشەش كۆلىمى ئارانلا نەچچە سېنت بولغان.
تەرجىمىدە: ئاينۇر
