جىلى ئاپتوموبىلچىلىقى بۇ يىل ساپ پايدىسىنىڭ يېرىم ئازلاپ كېتىدىغانلىقىنى ئېيتتى
پۇل-مۇئامىلە ۋاقىت گېزىتى تورىنىڭ 17-دېكابر خەۋىرى: جۇڭگو ئاپتوموبىل ياساش كارخانىسى جىلى ئاپتوموبىل گۇرۇھى ئاگاھلاندۇرۇپ، رۇسىيە رۇبلىسىنىڭ كۇرسى «زور دەرىجىدە» چۈشۈپ كەتكەنلىكى ھەمدە دۆلەت ئىچى ۋە سىرتىدىكى ئاپتوموبىل سېتىش مىقدارىنىڭ ھالسىزلىنىشى سەۋەبلىك بۇ يىل پايدىسىنىڭ يېرىمى ئازلاپ كېتىدىكەن. جىلىنىڭ پېيىنىڭ باھاسى 17-دېكابر چۈشۈپ كەتتى، چۈشۈش دەرىجىسى بىر مەھەل %20 كە يەتتى.
جىلىنىڭ پېيى شىياڭگاڭدا بازارغا سېلىنغان، ئانا شىركىتى شۋېتسىيە ۋولۋو ھەمدە لوندون قارا رەڭلىك تاكسى ياساش كارخانىسىغا ئىگە. جىلى 16-دېكابر بازار يېپىلغاندىن كېيىن بىلدۈرۈشىچە، 12-ئاينىڭ ئاخىرىغىچە بولغان بىر يىلدا مەزكۇر شىركەتنىڭ ساپ پايدىسى 2013-يىلدىكى 2 مىليارد 700 مىليون يۈەندىن تەخمىنەن %50 چۈشۈپ كېتىدىكەن.
جىلىنىڭ پېيىنىڭ باھاسى 17-دېكابر ئەتىگەندە ئەڭ كۆپ بولغاندا %19 چۈشۈپ كەتتى، ئۆتكەن بىر ئايدا مەزكۇر شىركەتنىڭ پاي باھاسى جەمئىي %14 كە يېقىن چۈشۈپ كەتى. مەزكۇر شىركەت ئىلگىرى دوكلات قىلىشىچە، بۇ يىل ئالدىنقى يېرىم يىلدا ساپ پايدىسى 1 مىليارد 100 مىليون يۈەن بولغان. بۇلتۇرقى ئوخشاش مەزگىلدىكىگە قارىغاندا %20 چۈشۈپ كەتكەن. تەھلىلچىلەرنىڭ دېيىشىچە، بۇ قېتىمقى پايدا سىگنالى بۇ يىلنىڭ كېيىنكى يېرىمىدىكى ساپ پايدىسىنىڭ پەقەت 220 مىليون بولىدىغانلىقىدىن دېرەك بېرىدۇ.
بېرنستېيىن تەتقىقات شىركىتى (Bernstein Research)نىڭ شىياڭگاڭدا تۇرۇشلۇق ئاپتوموبىل تەھلىلچىسى ماكس ۋاربۇرتون (Max Warburton) نىڭ قارىشىچە، جىلىنىڭ «سوت ھۆكۈم كۈنى» يېتىپ كەلگەن.
ئۇ:«بىز 8-ئايدىلا جىلىنىڭ ئوتتۇرا مەزگىللىك نەتىجىسىنىڭ زور دەرىجىدە چۈشۈپ كېتىدىغانلىقىنى مۆلچەرلىگەن. بۇ قېتىمقى پايدا سىگنالى پەقەت بىزنىڭ قارىشىمىزنى چوڭقۇرلاشتۇردى، يەنى مەزكۇر شىركەت ئېغىر مەسىلىگە دۇچ كەلمەكتە» دېدى.
2014-يىلىڭ ئالدىنقى 10 ئېيىدا، جىلى گۇرۇھىنىڭ جۇڭگودىكى ئاپتوموبىل سېتىش مىقدارى %20 تۆۋەنلەپ كەتكەن بولۇپ، 267 مىڭ دانە سېتىلغان، بىرلا ۋاقىتتا جۇڭگودىن ئىبارەت يەر شارىدىكى ئەڭ چوڭ ئاپتوموبىل بازىرىنىڭ ئاستىلىشىغا بولغان ئەندىشە كۈچەيمەكتە. مەزكۇر شىركەتنىڭ ئاپتوموبىل ئېكسپورت قىلىش مىقدارى ئىككى ھەسسە سۈرئەت بىلەن تۆۋەنلىمەكتە، تۆۋەنلەش دەرىجىسى %46گە يەتتى.
بۇنىڭدىن سىرت، جىلى گۇرۇھى جۇڭگودىكى سېتىش ۋە بازار كەسپىنى قايتىدىن تەشكىللىمەكتە.
تەرجىمىدە: ئوكيان
