ئۇيغۇرسوفت تەرجىمە ياردەمچىسى يۇمشاق دېتالىمىز بۈگۈن تۇخۇمىدىن چىقتى، ھازىرقى نەشرى نومۇرى: 0.0.0.0 بولۇپ، بۇ دېتالىمىزنىڭ شۇئارى «بۇنىڭدىن كېيىن ئوخشاش بىر جۈملىنى قايتا تەرجىمە قىلمايسىز، تەرجىمانلار جاپا چەكتىڭلار».

ئىشلەش پىرىنسىپى مۇنداق: تەرجىمە قىلماقچى بولغان تېكىستنى بۇ دېتالغا چاپلىسىڭىز، ئۇنى جۈملىلەرگە پارچىلايدۇ، جۈملىدىكى مۇھىم سىياسىي ئاتالغۇ، رەھبەرلەرنىڭ ئىسمى، جۇغراپىيەلىك يەر-جاي ناملىرى، پەن-تېخنىكا ئاتالغۇلىرى،…قاتارلىقلارنى ئاپتوماتىك بايقاپ، ئۇنىڭ ئۆلچەملىك تەرجىمىسىنى ئەسكەرتىدۇ، ئىلگىرى تەرجىمە قىلىنغان پۈتۈنلەي ئوخشايدىغان جۈملىنى تاپالىسا ئاپتوماتىك تەرجىمە قىلىدۇ، ياكى شۇنىڭغا ئوخشايدىغان ئالدىنقى 10 جۈملىنى تەۋسىيە قىلىدۇ، لۇغەت ۋە ئىملا تەكشۈرۈش ئىقتىدارى تەمىنلىنىدۇ، تەرجىمە تاماملانغاندا ئەسلىي تېكىست بىلەن ئوخشاش فورماتتا بەت ياساپ، Word ھۆججىتىنى ھاسىل قىلىدۇ، ئاتالغۇ ۋە جۈملە ئامبىرىنى خالىغانچە كېڭەيتەلەيسىز، ئىشلەتكەن ئادەم كۆپ بولغانسېرى، تەرجىمە سۈپىتى ۋە تېزلىكى تېخىمۇ ئاشىدۇ، بۇ دېتال پات يېقىندا ئېلان قىلىنىدۇ.

بۇ دېتالدا يەنە ئۇيغۇر تىلىنىڭ ئىپادىلەش ئادىتىگە خىلاپ بولغان جۈملىلەرنى ئاپتوماتىك بايقاپ ئاگاھلاندۇرۇش بېرىدىغان ئىقتىدارىمۇ سىناق قىلىنىۋاتىدۇ، مەسىلەن:
داۋالاش ئېلىپ باردى=داۋالىدى
سۆھبەت ئۆتكۈزدى=سۆھبەتلەشتى
تەربىيەلەش ئېلىپ باردى=تەربىيەلىدى
ئايرۇپىلان ئارقىلىق كەلدى=ئايرۇپىلاندا كەلدى
پىيادە مېڭىش ئارقىلىق كەلدى=پىيادە كەلدى
رەھمەت ئېيتىدىغانلىقىمنى بىلدۈرىمەن=رەھمەت ئېيتىمەن=رەھمەت
خۇشال ھالدا يېتىپ كەلدى=خۇشال كەلدى
يىغىن روھىنى چوڭقۇر قانات يايدۇرۇش=يىغىن روھىنى كەڭ قانات يايدۇرۇش
ئۈنۈملۈك ئۇسۇل ئارقىلىق ھەل قىلىندى=ئۈنۈملۈك ئۇسۇلدا ھەل قىلىندى
مەكتەپ ئىچىدە نۇرغۇن بالىلار بار=مەكتەپتە نۇرغۇن بالا بار
300 ئوقۇغۇچىلار تىزىملاتتى=300 ئوقۇغۇچى تىزىملاتتى
ھايۋاناتلار دۇنياسى=ھايۋانات دۇنياسى
…=…
ئىزدىنىشتا چۈشكەن تەكلىپ-پىكىرلەر مۇنداق:
يەر تەۋرەش ئاپىتى ئالتە ئادەمنىڭ ئۆلۈشى ئىككى ئادەمنىڭ يارىلىنىشىنى كەلتۈرۈپ چىقاردى.
ئۆلچەملىكى : يەر تەرۋەشتە ئالتە ئادەم قازا قىلىپ ئىككى ئادەم يارىلاندى.
پىروگىراممىمىزغا قاتناشقانلىقىڭىزغا رەھمىتىمىزنى بىلدۈرىمىز.
ئۆلچەملىكى : پىروگىراممىمىزغا خۇش كەلدىڭىز ياكى پىروگىراممىمىزغا قاتناشقانلىقىڭىز ئۈچۈن رەھمەت ئېيتىمىز، پىروگىراممىمىزغا قاتناشتىڭىز، كۆپ رەھمەت.
كادىرلار…قارارىغا قارىتا پىكىر بايان قىلدى.
ئۆلچەملىكى : كادىرلار….قارارىغا پىكىر بەردى.
….قارارىنى چىڭ تۇتۇپ ئەمەلىيلەشتۈردى.
ئۆلچەملىكى : ….قارارىنى پۇختا ئەمەلىيلەشتۈردى.
سالامەتلىكىڭىز ياخشىكەن. ساغلاملىقىڭىز ياخشىكەن.
ئۆلچەملىكى : سالامەتكەنسىز، ساغلامكەنسىز.
بۇ ئىچىملىك ياخشىكەن. تەمى ياخشىكەن.
ئۆلچەملىكى : بۇ ئىچملىك بولىدىكەن، تەملىككەن.
بالىنىڭ باش سۈيى ياخشىكەن.
ئۆلچەملىكى : بالىنىڭ باش سۈيى نورمالكەن.
ئەكبەرنىڭ بۇ كىتاپنى ئۇنىڭغا بەرگەن-بەرمىگەنلىكىنى بىلمەيمەن.
ئۆلچەملىكى : ئەكبەر بۇ كىتاپنى ئۇنىڭغا بەردىمۇ-يوق بىلمەيمەن.
=====
ئېلىپ بېرىش، ئىلگىرى سۈرۈش، ئالغا سىلجىتىش، قانات يايدۇرۇش، دەپ كۆرسىتىش، ماس قەدەمدە راۋاجلاندۇرۇش، قاراپ چىقىش، كۆزدىن كەچۈرۈش، قولغا كەلتۈرۈش، مەنئى قىلىش، ئوتتۇرىغا قويۇش، يولغا قويۇش، ھاسىل قىلىش، كەلتۈرۈپ چىقىرىش………
مۇشۇ ئىبارىلەرنىڭ ئىشلىتىلىشىدىمۇ ئېغىر نامۇۋاپىقلىق بار.. .

مۇشۇنداق كېسەل جۈملىلەرگىمۇ ئاگاھلاندۇرۇش بېرىدىغان قىلماقچى ئىدىم، ياخشى تەكلىپ بولسا بەرسەڭلار.

• يازما كۆرۈلۈشى: 11,843 قېتىم
• يوللانـغان ۋاقىت:2015-يىلى 04-ئاينىڭ 9-كۈنى pm 14:30
• ئالدىنقى يازما :Civil and Societal Uses of Drones
• كېيىنكى يازما :Brainwashing or the effectiveness of media channels: the direction they make our thoughts.