1-ماددا بۇ قانۇن ھايۋانات يۇقۇم مۇداپىئەسى پائالىيىتىنى باشقۇرۇشنى كۈچەيتىش ، ھايۋانات يۇقۇمىنىڭ ئالدىنى ئېلىش ، ئۇنى تىزگىنلەش ۋە يوقىتىش ، باقمىچىلىقنىڭ تەرەققىياتىنى ئىلگىرى سۈرۈش ، جىسمانىي ساغلاملىق ، جامائەت ساغلاملىقىنى ساقلاش مەقسىتىدە چىقىرىلدى .
2-ماددا بۇ قانۇن جۇڭخۇا خەلق جۇمھۇرىيىتى تەۋەسىدىكى ھايۋانات يۇقۇم مۇداپىئەسى ۋە ئۇنى نازارەت قىلىپ باشقۇرۇش پائالىيىتىدە تەتبىقىلىنىدۇ .
چېگرىدىن كىرگۈزۈلىدىغان – چىقىرىلىدىغان ھايۋانات ۋە ھايۋانات مەھسۇلاتلىرىنى كارانتىن قىلىشتا ، «جۇڭخۇا خەلق جۇمھۇرىيىتىنىڭ چېگىرىدىن كىرگۈزۈلىدىغان - چىقىرىلىدىغان ھايۋانات – ئۆسۈملۈك كارانتىن قانۇنى » تەتبىقلىنىدۇ .
3-ماددا بۇ قانۇندا ئېيتىلغان ھايۋانات ئۆي ھايۋانلىرى ، ئۆي قۇشلىرىنى ۋە قولدا بېقىلغان ، قانۇنلۇق تۇتۇلغان باشقا ھايۋانلارنى كۆرسىتىدۇ .
بۇ قانۇندا ئېيتىلغان ھايۋانات مەھسۇلاتلىرى ھايۋاناتنىڭ گۆشى ، تېرىسى ، يۇڭى ، تىۋىتى ، ئىچكى ئەزاسى ، يېغى ، قېنى ، ئىسپىرمىسى ، تۇخۇمى ، تۆرەلمىسى ، ئۇستىخىنى ، تۇيىقى ، بېشى ، مۈڭگۈزى ، سىڭىرى شۇنىڭدەك ھايۋانات يۇقۇمى تارقىتىش ئېھتىمالى بولغان ، سۈت ، تۇخۇم قاتارلىقلارنى كۆرسىتىدۇ .
بۇ قانۇندا ئېيتىلغان ھايۋانات يۇقۇمى ھايۋاناتتا بولىدىغان يۇقۇملۇق كېسەلنى ، پارازىت قۇرت كېسىلىنى كۆرسىتىدۇ .
بۇ قانۇندا ئېيتىلغان ھايۋانات يۇقۇم مۇداپىئەسى ھايۋانات يۇقۇمىنىڭ ئالدىنى ئېلىش ، ئۇنى تىزگىنلەش ۋە يوقىتىش ، ھايۋانات ۋە ھايۋانات مەھسۇلاتلىرىنى كارانتىن قىلىشنى كۆرسىتىدۇ .
شىنجاڭ يېزا-ئىگىلىك ئۇچۇر تورىدىن ئېلىندى
<ئاقيول ئۇيغۇر تور بىكىتى سىزنى قارشى ئالىدۇ>
