ئۆتكەن نەچچە ئون يىل ئىچىدە جۇڭگونىڭ ئالىي مەكتەپلىرى تەكلىپ قىلغان چەتئەللىك ئالىملار بارغانسېرى كۆپىيىپ بارغان. چەتئەل تارقاتقۇچىلىرى، جۇڭگو ھۆكۈمىتى چەتئەللىك ئالىملارنىڭ ئېقىپ كېرىش قەدىمىنى تېزلىتىدىغان چارە ئىزدىمەكتە، دېگەن.
ئاۋسترالىيە «دەۋر گېزىتى»نىڭ دوكلاتىغا ئاساسلانغاندا، ئاۋسترالىيە ئۇنىۋېرسىتېتىدا 14 يىلغا يېقىن ئىشلىگەن بۇرس.سىتېنىك پروفېسسور بېيجىڭ ئۇنىۋېرسىتېتىدا دەرس ئۆتۈشكە تەكلىپ قىلىنغان بولۇپ، دەسلەپتە زىيارەتتىكى پروفېسسور بولغان، ھازىر بولسا بېيجىڭ ئۇنىۋېرسىتېتى خەلقئارا MBAيۇقىرى قاتلامدىكى باشقۇرغۇچىلار سىنىپىنىڭ مەسئۇلى بولغان. ئۇ جۇڭگودىكى ئالىي مەكتەپلەرگە كېلىۋاتقان غەرب ئەللىرى ئالىي مەكتەپلىرىدىكى ئوقۇتقۇچىلارنىڭ بىرى.
مۆلچەردە بۇنىڭدىن كېيىنكى بىر قانچە يىل ئىچىدە بۇ خىل يۈزلىنىشنىڭ قەدىمى تېخىمۇ تېزلەشكىدەك. جۇڭگو ئالىي مەكتەپلەر مائارىپ سىستېمىسىنى كېڭەيتىش ھەمدە كۈچەيتىش ئۈچۈن ئىزدىنىۋاتقان بولۇپ، جۇڭگو ھۆكۈمىتى تەدبىر قوللىنىپ ئالىي مەكتەپلەرنىڭ چەتئەللىك پروفېسسورلارنى جەلپ قىلىش كۈچىنى ئاشۇرۇشىغا ياردەم بېرىۋاتقان بولۇپ، يېڭى بىر تۈرلۈك پىلان بولسا ھەر تۈرلۈك مۇكاپاتلار بىلەن تەمىنلەش ئىكەن.
بۇ پىلاندا بۇندىن كېيىنكى 10 يىل ئىچىدە تەكلىپ قىلىنىدىغان 1000 نەپەر چەتئەللىك ئالىملارغا ياردەم قىلىپ ئۇلارنىڭ تەتقىقات ۋە يېڭىلىق يارىتىش ئىشلىرىنى ئىلگىرى سۈرۈشكە تەييارلىق قىلىنىۋاتقان بولۇپ، دۆلەتلىك چەتئەللىك ئالىملار ئىدارىسى ئۆتكەن يىلنىڭ ئاخىرىدا ئوتتۇرىغا چىقارغان بۇ چەتئەللىك پروفېسسورلارنى يېتەرلىك جەلپ قىلىش كۈچىگە ئىگە بولغان شارائىتلار بىلەن تەمىنلەش پىلانى 10 مىليون يۈەن خەلق پۇلىغا يەتكەن ياردەم پۇلىنى ئۆز ئىچىگە ئالىدىكەن. ئالىي مەكتەپ ئوقۇتقۇچىلىرى يەنە 30 مىليون يۈەندىن 50 مىليون يۈەنگىچە بولغان تەتقىقات خىراجىتى ئىلتىماس قىلسا بولىدىكەن. شىنخۇا ئاگېنتلىقى، بۇ يىلى 2-ئايغىچە بولغان ۋاقىت ئىچىدە ئامېرىكا، ياپونىيە ۋە گېرمانىيە قاتارلىق دۆلەتلەردىن كەلگەن 200دىن كۆپرەك ئالىم، پروفېسسورلار بۇ پىلانغا قاتنىشىشنى ئىلتىماس قىلغان، دېگەن.
دوكلاتتا، نۇرغۇنلىغان غەرب ئەللىرى ئالىي مەكتەپلىرىدىكى ئوقۇتقۇچىلار ئۆز دۆلەتلىرىدىكى كۈندىن-كۈنگە ئازىيىپ كېتىۋاتقان تەتقىقات خىراجىتى ئۈستىدە تالاش-تارتىش قىلىشقا مەجبۇرىي بولۇپ تۇرۇۋاتقان ۋاقىتتا، بۇ پىلان ئادەمنى ناھايىتى قىزىقتۇرىدىغان بىر ئىش، دەپ كۆرسىتىلگەن. شياڭگاڭ ئۇنىۋېرسىتېتىنىڭ جۇڭگو مائارىپ تەتقىقات مۇتەخەسسىسى گېرارد.پاستى.رىئال: «جۇڭگودىكى نۇرغۇنلىغان ئالدىنقى قاتاردىكى ئالىي مەكتەپلەرنىڭ خىراجىتى يېتەرلىك، گۈزەل مەكتەپ قورۇسى قۇرۇپ چىققان. شۇڭا غەرب ئالىي مەكتەپلىرىدىكى ئوقۇتقۇچىلار بارغانسېرى بۇ مەكتەپلەرگە كېلىپ ئۇلار ئېھتىياجلىق بولغان يۇمشاق دېتاللار بىلەن تەمىنلەشنى خالايدۇ.» دېگەن.