【TechWeb تورىنىڭ 1-ئاينىڭ 10-كۈنىدىكى خەۋىرى】چەتئەل تاراتقۇلىرىنىڭ خەۋەرلىرىگە ئاساسلانغاندا، 2011-يىلى ئالما شىركىتىنىڭ يېڭىدىن ۋەزىپىگە ئولتۇرغان باش ئىجرائىيە ئەمەلدارى تىم كۇك (Tim Cook) ئۈچۈن خېلى ئوبدانلا بىر يىل بولغان. ئالمىنىڭ تاپشۇرغان ئەڭ يېڭى ھۆججىتىدىن مەلۇم بولۇشىچە، تىم كۇكنىڭ 2011-يىلىدىكى ئومۇمىي مائاشى 378 مىليون ئامېرىكا دوللىرى بولغان.
2011-يىلىدا تىم كۇكنىڭ ئومۇمىي مائاشى 378 مىليون ئامېرىكا دوللىرى بولۇپ، بۇ 376 مىليون 200 مىڭ ئامېرىكا دوللىرىلىق پاي چېكى قەرەل ھوقۇقىنىمۇ ئۆز ئىچىگە ئالىدىكەن. شۇنداق بولغاندا تىم كۇكنىڭ يىللىق ئاساسىي مائاشى 900 مىڭ ئامېرىكا دوللىرى بولىدىكەن. ئالما شىركىتى 2-ئاينىڭ 23-كۈنى يىللىق پايچېكلار يېغىنى ئېچىشنى قارار قىلغان.
بۇلتۇر 8-ئايدا،  ئالما شىركىتىنىڭ مۇدىرىيەت يېغىنى تىم كۇكقا 1 مىليون ئامېرىكا دوللىرىلىق چەكلىمىلىك پاي چېكى قەرەل ھوقۇقى بېرىشنى تەستىقلىغان. ئالما شىركىتىنىڭ مۇدىرىيەت يىغىنى نۆۋەتتە ئارت لېۋىنسون (Art Levinson) نىڭ رەھبەرلىكىدە بولۇپ، تىم كۇكنى بۇنداق زور سوممىلىق پاي چېكى قەرەل ھوقۇقىغا ئىگە قىلىشتىكى مەقسەت ئۇنىڭ «تالا قاراپ قىلىش» ىنىڭ ئالدىنى ئېلىش ئىكەن.
بۇلتۇر 10-ئايدا، ئالما شىركىتىنىڭ قۇرغۇچىسى ۋە ئالما شىركىتىنى پۈتۈن دۇنياغا تونۇتقان رىۋايەت خاراكتېرلىك شەخس سىتىۋى جوبىز ئالەمدىن ئۆتكەندىن كېيىن، تىم كۇك سىتۋ جوبىزنىڭ ئورنىغا ۋارىسلىق قىلىپ، ئالما شىركىتىنىڭ كېيىنكى بىر نۆۋەتلىك باش ئىجرائىيە ئەمەلدارى بولدى. ئەلۋەتتە، تىم كۇك مىليون دوللارلىق پايچېكى قەرەللىك ھوقۇقىغا ئېرىشكەن تۇنجى كىشى ئەمەس. سىتىۋى جوبىز باش ئىجرائىيە ئەمەلدارى بولغان ۋاقىتتا، ئۇنىڭ يىللىق مائاشى ئاران بىر ئامېرىكا دوللىرى ئىدى، ئەمما ئۇ 5 مىليون 500مىڭ دوللارلىق پاي چېكى ھوقۇقىنى كونترول قىلاتتى. سىتىۋى جوبىز ۋاپات بولۇشتىن بۇرۇن ئۈچ قېتىم كېسەل سەۋەبىدىن دەم ئالغان، بۇ ۋاقىتتا ئالما شىركىتىنىڭ كۈندىلىك خىزمەتلىرىنى تىم كۇك بىر تەرەپ قىلغانىدى.