كورىيە بانكىسى 3-چېسلا ئېلان قىلغان سانلىق مەلۇماتتا كۆرسىتىلىشىچە، 4-ئاينىڭ ئاخىرىغىچە، كورىيىنىڭ تاشقى پېرېۋوت زاپىسى 316 مىليارد 840 مىليون ئامېرىكا دوللىرىغا يەتكەن بولۇپ، ئالدىنقى ئايدىكىدىن 890 مىليون ئامېرىكا دوللىرى ئېشىپ، يەنە بىر قېتىم تارىختىن بۇيانقى ئەڭ يۇقىرى سەۋىيىنى ياراتقان.
كورىيىنىڭ تاشقى پېرېۋوت زاپىسى ئىچىدە، دۆلەت زايومى قاتارلىق باھالىق ئاكسىيىلەر 284 مىليارد 620 مىليون ئامېرىكا دوللىرى بولغان بولۇپ، ئالدىنقى ئايدىكىدىن 30 مىليون ئامېرىكا دوللىرى ئاشقان؛ مەبلەغ سېلىش زاپاس فوندى 23 مىليارد 830 مىليون ئامېرىكا دوللىرى بولغان بولۇپ، ئالدىنقى ئايدىكىدىن 840 مىليون ئامېرىكا دوللىرى ئاشقان؛ خەلقئارا پۇل فوندى تەشكىلاتىنىڭ ئالاھىدە پۇل ئېلىش ھوقۇقى سوممىسى 3 مىليارد 550 مىليون ئامېرىكا دوللىرى بولغان بولۇپ، ئالدىنقى ئايدىكىدىن 10 مىليون ئامېرىكا دوللىرى ئاشقان؛ خەلقئارا پۇل فوندى تەشكىلاتىدىكى زاپاس پۇلى 2 مىليارد 670 مىليون ئامېرىكا دوللىرى بولغان بولۇپ، ئالدىنقى ئايدىكىدىن 10 مىليون ئامېرىكا دوللىرى ئاشقان؛ ئالتۇن زاپىسى 2 مىليارد 170 مىليون ئامېرىكا دوللىرى بولغان بولۇپ، ئالدىنقى ئايدىكى بىلەن ئاساسەن تەڭ بولغان.
كورىيە مەركىزى بانكىسى، ياۋرو قاتارلىق پۇللارنىڭ پېرېۋوت نىسبىتى ئېشىشى ۋە تاشقى پېرېۋوت زاپىسى پايدىسىنىڭ كۆپىيىشى كورىيە تاشقى پېرېۋوت زاپىسىنىڭ يەنە بىر قېتىم يۇقىرى سەۋىيە يارىتىشىدىكى ئاساسلىق سەۋەب، دەپ كۆرسەتكەن. كورىيە مەركىزى بانكىسى تاشقى پېرېۋوت زاپىسىنىڭ كۆپ مەنبەلىشىشىنى يەنىمۇ كېڭەيتىش ئۈچۈن، 4-ئايدىن باشلاپ جۇڭگونىڭ دۆلەت زايومىغا مەبلەغ سېلىشنى باشلىغان. 3-ئاينىڭ ئاخىرىغىچە بولغان مەزگىلدىكى كورىيىنىڭ تاشقى پېرېۋوت زاپىسى كۆلىمى جۇڭگو، رۇسىيە، جۇڭگو تەيۋەن، برازىلىيە، شۋېتسارىيە قاتارلىق دۆلەتلەردىن قالسىلا دۇنيا بويىچە 7-ئورۇنغا تىزىلغان.