ئەسسالامۇ ئەلەيكۇم، ئەزىز قېرىنداشلار:
تولىمۇ ئازاب ۋە ئەپسۇسلۇق ئىچىدە شۇنى جاكارلايمەنكى، ئۇيغۇربەگ تور تۇرايى ۋە ئۇيغۇربەگنىڭ كەپىسى قاتارلىق بلوگلارنىڭ تور نامى يامان نىيەتلىك كىشىلەر تەرىپىدىن بۇلانغانلىقى ئۈچۈن مەزكۈر بلوگلار تور دۇنياسىدىكى مەۋقۇدلىقىدىن ئايرىلىدىغان بولدى. بۇ بلوگلارغا سىڭدۈرگەن ئەجرىمىزگە ئىنتايىن ئېچىنىمىز، شۇنداقلا مۇشۇ بلوگلارنى ئۆز ئىچىگە ئالغان 20 نەچچە بلوگ-بېكەتلەرنىڭ تەڭلا تاقىلىپ قالغانلىقىغا سەۋەبچى بولغان ئاشۇ نۇمۇسسىز ئوغرىنى قاتتىق ئەيىبلەيمىز. ئۇيغۇربەگ تور تۇرايى «ئۇيغۇرلاردىكى ئون چوڭ بلوگ» پائالىيىتىدە ئۇدا ئۈچ قېتىم نامزاتلىققا سايلانغان ئىدى، WordPress سېستىمىسىنىڭ ئۇمۇملىشى ئۈچۈن ھەسسە قوشقان نادىر بلوگ ئىدى، بۇ بلوگلارنىڭ ۋەيران بولغانلىقىغا قاتتىق قايغۇرىمىز، ئۇيغۇربەگ تور تۇرايى قەلبىمىزدە مەڭگۈ ھايات(سەل جۇڭگوچە بوپ قالدى، شۇنداقتىمۇ)، شۇنداقلا شۇنى جاكارلايمىزكى uyghurbeg.net، uyghurbeg.com قاتارلىق تور ناملىرى ئاستىدا ئېچىلغان بلوگلار ئاشكارا بايانات بەرمىگۈچە، ئەسلىدىكى ئۇيغۇربەگ تور تۇرايى بىلەن مۇناسىۋەتسىز، شۇنداقلا uyghurbeg@yahoo.com ناملىق بۇ ئېلخەتمۇ ئوغىرلانغان بولغاچقا، بۇ ئېلخەت ئارقىلىق قىلىنغان ئالاقە مەن بىلەن مۇناسىۋەتسىز، يۇقارقى تور نام ۋە ئېلخەتلەر ئارقىلىق كېلىپ چىققان ھەرقانداق ئاقىۋەتكە مەن ئىگە بولمايمەن.
مەزكۇر ۋەقەنىڭ باش-ئاخىرى
2013-يىلى 4-ئاينىڭ 8-كۈنى مېنىڭ QQ ھېساۋاتىمدا قالايمىقانلىق كۆرۈلدى
2013-يىلى 4-ئاينىڭ 9-كۈنى مەن باشقۇرۇۋاتقان بلوگ بوشلۇقلىرىدا ۋىروس پەيدا بولۇپ، بوشلۇق تەمىنلىگەن بېكەت بۇ بوشلۇقلارنى توڭلىىتپ قويدى
2013-يىلى 4-ئاينىڭ 10-كۈنى uyghurbeg@yahoo.com نامىدىكى ياخو ئېلخېتىمنىڭ پارولى ئۆزگىرىپ كەتكەنلىكى مەلۇم بولدى، ئوخشاش شۇ كۈنى مۇشۇ ئېلخەتكە باغلانغان Godaddy تور نامى ھېساۋاتىم ۋە Paypal ھېساۋاتىمنىڭمۇ پارولى ئۆزگىرىپ كەتكەنلىكى مەلۇم بولدى. شۇ كۈنى Godaddyنىڭ مۇلازىمەتچىسىگە تېلىڧون قىلىپ ئەھۋالنى مەلۇم قىلغان بولساممۇ، ئوغرى مېنىڭ ھېساۋاتىم ئۇچۇرلىرى شۇنداقلا تور ناملىرىنى ئۇچۇرلىرىنى ئۆزگەرتىلىپ بولغاچقا، Godaddy مۇلازىمەتچىسى ماڭا باشقا ئۇچۇرلارنى ئەۋەتىپ بېرىشىمنى سورىدى. شۇ كۈنى كەچتە مەن ئۇلار تەلەپ قىلغان ماتىرىياللارنى ئەۋەتتىم.
2013-يىلى 4-ئاينىڭ 11-كۈنى Godaddy ھېساۋاتىمدىكى تور ناملىرىنىڭ ئۇچۇرلىرى ئۆزگەرتىلگەنلىكى مەلۇم بولدى ھەمدە مۇشۇ ناملار ئاستىدىكى بلوگ-بېكەتلەر ئېچىلمىدى. شۇ كۈنى ئاخشىمى Godaddy مۇلازىمەت مەركىزىدىن خەۋەر كېلىپ، مەن ئەۋەتكەن ماتىرىياللار مېنىڭ ھېساۋاتىمنىڭ ھازىرقى ئۇچۇرلىرى بىلەن ماس كەلمىگەنلىكىنى باھانە قىلىپ، ئەرزىمنى قايتۇرۇۋەتتى. شۇ كۈنى، يەنە بۇرۇنقى ئۇچۇرلارنى تولۇقلاپ، ئېلخەت ئەۋەتتىم، ئەمما…
2013-يىلى 4-ئاينىڭ 12-كۈنى، يەنى بۈگۈن ئەڭ ئاخىرقى ئۈمىدمۇ يوق بولدى…
ئاخىرقى سۆز
شۇ تاپتا ئوقۇش پۈتتۈرۈش ماقالىسى يېزىۋاتقان، مۇشۇ ئىش تۈپەيلى 4 كۈن ۋاقتىم ۋەيران بولدى، يەنە زېھنىمنى چاچسام بولمايتى، شۇڭا ئامالسىز يەنە تىركىشىشدىن ۋاز كەچتىم، ئەمما ئارىلىقتا بوش ۋاقىت تاپساملام تور ناملارنى قايتۇرۇپ ئەپ كېلىش ئۈچۈن تىرىشىمەن، ناۋادا ئەپكېلەلمىسەم، شۇ سەۋەبلىك بلوگلىرى نورمال ئېچىلماي قالغان بلوگداشلارنىڭ مېنى توغرا چۈشىنىشىڭلارنى ئۈمىد قىلىمەن. ئاخىرىدا، نەچچە يىلدىن بىرى بىزنى قوللاپ كەلگەن ۋە ياردەم بەرگەن بارلىق قېرىنداشلارغا رەھمەت ئېيتىمەن، نەچچە يىللىق بلوگچىلىق ھاياتىمدا سىلەر بىلەن نۇرغۇن خۇشاللىقلارغا ئېرىشكەن ئىدىم، سىلەرنى سۆيۈپ:
- م . نىياز ئەلقۇت(ئۇيغۇربەگ)
2013-يىلى 4-ئاينىڭ 12-كۈنى، ئولۇغ جۈمە كۈنى
