پۇتبول تورى خەۋىرى لەگلەك تورى تەرجىمىسى

ئەنگىلىيەنىڭ تەسىر كۈچكە ئىگە ئاخبارات ۋاستىلىرىنىڭ بىرى بولغان « كۈندىلىك ئەينەك گېزىتى» نىڭ خەۋەر قىلىشىچە بۇ يىل يازدا لىۋىرپول كۇلۇبىدىن ئايرىلىشنى قارار قىلغان كوماندا باشلىقى سىتىۋىن گېررادنىڭ كېيىنكى بارار جايى ئاساسەن ئامېرىكا چوڭ ئىتتىپاقى بۇلۇپ قېلىشى مۇمكىن ئىكەن. گېرراد جەمئىي قىممىتى 20 مىلىيۇن پوند سىتىرلىڭ لىق توختامغا ئېرىشىدىكەن. « ھاياتىمدىكى ئەڭ قىيىن چىقارغان قارار » ( گېرراد ئۆزىنىڭ لىۋىرپولدىن ئايرىلىدىغانلىقىنى جاكارلىغاندا شۇنداق دېگەن) نى چىقارغاندىن كېيىن بۇ قىزىل ئارمىيەنىڭ باشلىقى بېكخامنىڭ ئىزىنى بېسىپ لىۋىرپول كۇلۇبىدىن ئايرىلغاندىن كېيىن لوس ئانجىلىس سامانيولى كوماندىسىغا قۇشۇلۇپ پۇتبولچىلىق ھاياتىنى داۋاملاشتۇرىدىكەن.

11-ئايدىن باشلاپ لوس ئانجىلىس سامانيولى كوماندىسى ئىزچىل ئىشلارنىڭ تەرەققىياتىغا كۆڭۈل بۆلۈپ كېلىۋاتقان. ئۇلار ئىسمى ھەممىگە تۇنۇش بولغان بىر توپچى ئارقىلىق تېخى ئەمدىلا پۇتبول دۇنياسىدىن چېكىنگەن دورنۋاننىڭ ئورنىنى تۇلۇقلىماقچى بولغان. ئۇلارنىڭ ئەڭ ياخشى تاللىشى دەل قىزىل ئارمىيىنىڭ باشلىقى گېرراد ئىدى. لوس ئانجىلىس سامانيولى كۇلۇبى گېرراد ئۈچۈن ھەپتىسىگە 100 مىڭ پوند سىتىرلىڭ  مائاش بېرىدىغان تۆت يىللىق توختام بىلەن تەمىنلىگەن. بۇ بېكخامنىڭ ئەينى چاغدا لوس ئانجىلىس سامانيولى كوماندىسىدىكى كۈتۈلىشى بىلەن ئوخشاش بۇلۇپ بۇنىڭدىن كۇلۇبنىڭ بۇ ئىشقا شۇنچىلىك ئېتىبار بېرىۋاتقانلىقىنى كۆرۈۋېلىشقا بولىدۇ.

قانداق بىر كوماندىغا قۇشۇلىشىدىن قەتئىينەزەر گېرراد ئىلگىرى كۆپ قېتىم ئۆزىنىڭ رەقىب سۈپىتىدە لىۋىرپول بىلەن مۇسابىقىگە قاتناشماسلىقنى ئۈمىد قىلىدىغانلىقىنى بىلدۈرگەن. ئەمما ئائىلىسىنى ئويلىشىپ گېرراد ئوتتۇرا شەرق رايۇنلىرى ۋە جۇڭگۇدىن كەلگەن توختاملارنى رەت قىلغان.

مۇشۇنداق بىر ئۇلۇغ كوماندا باشلىقىدىن ئايرىلىپ قېلىشقا نىسبەتەن لىۋىرپول كۇلۇبىنىڭ ئاتاقلىق تۆھپكارى فىل تامپىسىن گېررادنىڭ ئامېرىكىدا ئۆزنىڭ كەسپىي ھاياتىنى داۋاملاشتۇرىشىغا ئامەت تىلەپ مۇنداق دەيدۇ: « بەلكىم ئۇ ئۆزىنىڭ ئېنگىلاند دەرىجىدىن تاشقىرى بىرلەشمىسىدەك يۇقىرى دەرىجىلىك مۇسابىقە ئويناشقا ماس كەلمەيدىغانلىقىنى ھېس قىلغان بۇلۇشى مۇمكىن. بىراق ئامېرىكىدا ئۇ ئۆزىنىڭ قالتىس ماھارىتىنى نامايەن قىلالايدۇ. مەن ئۇنىڭ ئامېرىكىدا گۈزەل خاتىرىسى بۇلۇشىنى تىلەيمەن. »